Ærnar og nýfædd lömb þeirra nánast buguðust í hitanum

Einhver heitasti dagur maímánaðar frá upphafi mælinga var í Borgarfirði í gær. Af opinberum veðurstöðvum mældist mestur hiti á landinu í Húsafelli, þar sem hann náði 25,7 stigum og mældist einnig yfir 25 stig í Stafholtsey. Á nokkrum stöðum í uppsveitunum mældist hiti síðdegis allt upp í 29 gráður í forsælu. Þær tölur gilda þó ekki til mets enda ekki um viðurkennda hitamæla að ræða.

Mannfólkið naut veðurblíðunnar, en áður óþekkt vandamál kom upp hjá sauðfjárbændum sem voru að setja lambærnar út í gróskumikinn nýgræðinginn. Lömbum og mæðrum þeirra varð svo heitt við að fara út að þær leituðu uppi skugga hvar sem þá var að finna. Einhverjum bændum leist ekki á blikuna og tóku féð á hús aftur. Íris Þórlaug Ármannsdóttir bóndi á Kjalvararstöðum í Reykholtsdal lýsir því svo síðdegis í gær: „Lömbin sem voru sett út í morgun fengu bara hálfgert hitasjokk og eltu ekki mæðurnar. Það fé sem er úti sést varla því það er búið að finna skugga. Þær sem eru inni finna líka fyrir hitanum þó þær séu í skugga og kaldara inni en úti,“ skrifaði Íris á FB.

Veðurstofan gerir ráð fyrir svipuðu veðri í dag og á morgun fyrir vestanvert landið og að víða verði sólríkt og hlýtt. Svo þegar líður á vikuna dregur úr hita og síðdegis á fimmtudaginn og næstu daga á eftir má búast við einhverri úrkomu.

*Lambféð leitaði uppi skugga hvar sem hann var að finna. Myndin er tekin utan við fjárhúsin á Sámsstöðum. Ljósm. þg*

Heitast var í Borgarfirði í gær

Ærnar og nýfædd lömb þeirra nánast buguðust í hitanum

Ærnar og nýfædd lömb þeirra nánast buguðust í hitanum