Seinni partinn síðasta miðvikudag var opinn dagur á Breið nýsköpunarsetri við Bárugötu á Akranesi og heppnaðist hann með eindæmum vel. Fjöldi gesta lagði leið sína í húsið, naut dagsins og kynnti sér fjölbreytta og spennandi frumkvöðlastarfsemi sem þar fer fram.

Fjölmörg fyrirtæki og einstaklingar voru með kynningar á starfsemi sinni og þeim verkefnum sem þau eru með í gangi. Í tækni og nýsköpun mátti skoða til dæmis Fab Lab smiðju Vesturlands þar sem sýnikennsla var í þrívíddarprentun, laserskurði og skartgripagerð, Sedna biopack kynnti lífrænar umbúðir úr þara og lúpínu og Grammatek var með kynningu á nýjum talgervilausnum fyrir íslensku. Tengt sjávarrannsóknum bauð Böðvar Ingvason til að mynda upp á gómsætar grjótkrabbabollur úr Faxaflóa, Brim var með kynningu á þörungaklasastöð og Sedna Biopack kynnti lífrænar umbúðir úr þara og lúpínu. Í ráðgjöf og þjónustu var KPMG með ráðgjöf fyrir frumkvöðla og nýsköpunarfyrirtæki, SHP Consulting var með kynningu á starfsemi í verkefnaþróun og Skúrinn kynnti áætlanir um nýja trésmíðaaðstöðu á Breið.

Skipstjórarnir Þorvaldur Guðmundsson, Viðar Gunnarsson og Eiríkur Óskarsson deildu nokkrum sögum af sjónum fyrir áhorfendum sem vöktu mikla lukku. Hægt var að skoða alls konar myndir af skipum og sjómönnum á árum áður og þá voru í boði vöfflur með nýstárlegu sniði sem gestir kunnu vel að meta.

*Margir hlustuðu á sögur skipstjóranna. Ljósm. Breið*

*Kristleifur Brandsson og Anna Steinsen sáu um vöfflubaksturinn.*

*Hægt var að skoða myndir frá gamla tímanum.*

*Hlédís Sveinsdóttir og Kristrún Sigurbjörnsdóttir létu fara vel um sig.*

Fjöldi gesta á opnum degi á Breið