Rætt við Sigurð Rúnar Friðjónsson eftir aðalfund Hollvinafélags Dagverðarneskrikju

Dagverðarnes er mikil náttúruperla og sögufrægur staður á einstökum stað á landföstu nesi í eyjaklasa í minni Hvammsfjarðar, innst í Breiðafirði. Þarna eru miklar sögu- og menningarminjar sem rekja má til landnáms og frá því þegar mikil og blómleg byggð var í eyjum Hvammsfjarðar þar sem búsetan byggðist á nýtingu hlunninda og sátt við náttúruna.

Í Dagverðarnesi er einnig merkileg kirkja sem reist var árið 1848 og endurbyggð 1935 en saga er um bænahús á sama stað allt frá 13. öld. Á undanförnum allmörgum árum hefur verið rætt um nauðsyn þess að endurbyggja Dagverðarneskirkju en verkefnið er stórt og mikið að umfangi fyrir fámenna sókn en íbúar, fyrrverandi íbúar og aðrir áhugasamir aðilar tengdir svæðinu komu að umræðunni. Skessuhorn hafði samband við Sigurð Rúnar Friðjónsson eftir aðalfund hollvinafélags kirkjunnar til að hlera um helstu atriðin sem fram komu.

*Framkvæmdir í kirkjugarðinum. Ljósm. ue.*

Stefnt á hátíðarmessu á næsta ári

Sóknarnefnd Dagverðarneskirkju tók ákvörðun á seinni hluta ársins 2023 að ráðast í verkefnið. „Verkefnið endurbygging Dagverðarneskirkju var sett af stað og setti sér áætlun sem hófst með vettvangsskoðun. Skoðun á kirkjunni, kirkjugarði og nánasta umhverfi hennar og komu að því verki ýmsir sérfróðir aðilar. Eftir fundahöld, áætlanagerð og viðræður varð síðan til framkvæmdaáætlun. Á síðasta ári var undirbúningur framkvæmda, gerð áætlana vegna framkvæmda, fjármögnun en einnig var verkefnið kynnt fyrir ýmsum. Nú í ár er aðalframkvæmdaárið þar sem kirkjan, lóðin, kirkjugarður, bifreiðastæði og fleira verður á áætlun,“ segir Sigurður Rúnar. „Á næsta ári er stefnt á lok framkvæmda og er stefnt á hátíðarmessu í Dagverðarneskirkju 16. ágúst. Þetta er metnaðarfull áætlun en góð samstaða er um verkefnið og mikilvægi þess,“ segir hann.

Hollvinafélag stofnað

Dagverðarneskirkja var friðlýst árið 2009 en allt náttúrufar á staðnum er viðkvæmt, bæði mikið og fjölbreytt fuglalíf og landið þar sem skiptast á klappir, melar, mýrar, móar, votlendi, tjarnir, vogskorin strönd og fjörur. Enda tilheyrir þessi staður verndun Breiðafjarðar. Gamall vegslóði liggur að kirkjunni en vegurinn er 10 km langur og liggur frá Klofningsvegi og var endurbættur sumarið 2024. „Verkefnið tryggir varðveislu menningar, kynnir sögu, lífsbaráttu forfeðra okkar og minjar á svæðinu fyrir íbúum og öðrum áhugasömum aðilum en auk þess verður umferð og umgengni um svæðið með skipulögðum hætti. Þeir sem njóta munu góðs af verkefninu eru íbúar, aðilar með tengsl við svæðið og aðrir gestir. Á síðastliðnu ári eða 16. desember 2024 var stofnað Hollvinafélag Dagverðarneskirkju en aðal markmið þess er að styðja við sóknarnefnd og heimamenn en tilgangur félagsins er að styðja við uppbyggingu kirkjunnar, kirkjulegt og menningarlegt starf í Dagverðarneskirkju, Dagverðarnesi. Halda á lofti mikilvægi staðarins og varðveita þær minjar sem felast í kirkjunni og umhverfi hennar,“ segir Sigurður.

Aðalfundur

Fyrsti aðalfundur hollvinafélagsins var haldinn 29. apríl og var góð mæting. „Félagsmenn eru 65 í dag en félagaskrá er opin og það fjölgar enn í félaginu. Á aðalfundinum var gerð grein fyrir stöðu viðhalds framkvæmda, sem eru þegar hafnar að hluta, og munu væntanlega komast á fullt skrið í næsta mánuði en yfirsmiður er Baldur Þorleifsson úr Stykkishólmi og Unnsteinn Elíasson frá Ferjubakka sér um hleðslu garða og fleira. Fundarmenn fögnuðu verkefninu og fram kom mikill vilji og einhugur til stuðnings við stjórn verkefnisins. Sóknarnefndin og Hollvinafélag Dagverðarneskirkju vinnur nú að lokaátaki í fjármögnun verkefnisins,“ segir Sigurður.

Gluggarnir fyrsti naglinn

Í stjórn Hollvinafélags Dagverðarneskirkju eru þau Bára H. Sigurðardóttir formaður, Sigurður Rúnar Friðjónsson, Grétar Guðmundur Sæmundsson, Kjartan Eggertsson og séra Snævar Jón Andrjesson. „Hollvinafélaginu hefur borist myndarlegur styrkur kr. 1.000.000 frá Kristbirni Egilssyni tileinkaður minningu Langeyjarnes fjölskyldunnar þeirra Elínar Elimundardóttir (1898 – 1987) Jóhannesar Þórðar Jónssonar (1899 – 1992) og Bergur Jóhannesson (1929 – 2016). Kvenfélagið Fjólan gaf 150.000 kr til verkefnisins en þess má einnig geta að kirkjunni barst höfðingleg gjöf fyrir nokkrum árum þegar nýir gluggar í kirkjuna komu frá Kristni Sveinssyni húsasmíðameistara og Margréti Jörundsdóttur konu hans en segja má að gluggarnir hafi verið fyrsti naglinn í endurbyggingu á kirkjunni,“ segir Sigurður að lokum.

*Frá aðalfundi Hollvinafélags Dagverðarneskirkju. F.v. Sigurður Rúnar Friðjónsson, Bára H. Sigurðardóttir og Grétar Guðmundur Sæmundsson. Ljósm. aðsend*