Landsnet boðaði til fundar á Hótel Hamri á þriðjudag í liðinni viku en þar voru kynnt drög að nýrri Kerfisáætlun fyrirtækisins. Sambærilegir fundir hafa verið haldnir á nokkrum stöðum á landinu undanfarna daga. Áhersla var lögð á að kynna framkvæmdir sem skipta sköpum fyrir afhendingaröryggi og orkuskipti á Vesturlandi, þar á meðal Holtavörðuheiðarlína 1, Vegamótalína 2, Vatnshamralína 2 og Akraneslína 2. Allt eru þetta verkefni sem eiga að bæta stöðugleika og afhendingaröryggi og möguleika til aukinnar verðmætasköpunar í landshlutanum. „Fundir sem þessir eru mikilvægir til að kynna framtíðarsýn okkar og hlusta eftir sjónarmiðum íbúa og hagaðila í hverjum landshluta,“ sagði Svandís Hlín Karlsdóttir, framkvæmdastjóri viðskipta- og kerfisþróunar hjá Landsneti. „Við viljum byggja upp öflugt flutningskerfi með samfélagið með okkur,“ bætti hún við.