Snæfellsbær auglýsir nú eftir áhugasömum rekstraraðila að Pakkhúsinu í Ólafsvík með umsóknarfresti til næstu mánaðamóta. Húsið á sér merka sögu og skal viðeigandi rekstur taka mið af sögu hússins og safni á efri hæðum þess. Pakkhúsið í Ólafsvík er gamalt verslunarhús, byggt árið 1844. Það er eitt fárra verslunarhúsa frá 19. öld sem stendur enn og var friðað 31. ágúst 1970. Í upphafi gegndi Pakkhúsið hlutverki birgðageymslu en síðar var m.a. rekin verslun í því. Þar spurði fólk frétta, skiptist á skoðunum og dreypti á kaupmannsbrennivíni sem geymt var undir búðarborðinu. Þess má geta að Ólafsvík telst elsti verslunarstaður landsins, en árið 1687 gaf konungur út tilskipun þar sem hann viðurkenndi Ólafsvík sem verslunarstað.