Í styttri læknatímum ræði fólk heilsufarsmál sín fremur en pólitík

Starfsfólk á Heilsugæslustöð HVE í Borgarnesi skrifaði færslu á samfélagsmiðla um miðja síðustu viku þar sem bent var á að vegna forfalla í læknahópnum yrði að gera breytingar á bókunarfyrirkomulagi á heilsugæslustöðinni næstu einn til tvo mánuði. Bókuð viðtöl styttast úr 20 í 10 mínútur. Með þessum breytingum var leitast við að tryggja aðgengi að heimilislæknum fyrir fleira fólk en hvert viðtal verður óneitanlega styttra sem gæti komið niður á gæðum þjónustunnar. Áfram var bent á símanúmerið 1700 vegna veikinda, verkja og slysa en þar ráðleggja hjúkrunarfræðingar á upplýsingarmiðstöð heilsugæslunnar fólki og sinnir forgangsflokkun og kemur öllum í skoðun hjá lækni eins fljótt og auðið er. Hildigunnur Þórsdóttir, læknir á heilsugæslustöð HVE í Borgarnesi, nefndi í færslunni að þetta ástand væri tímabundið og ekki fullkomið. Starfsfólk væri að reyna að gera það besta í stöðunni og að allir væru að leggja hart að sér til að reyna að tryggja aðgengi að þjónustu. Hildigunnur benti einnig á tvo mikilvæga hluti meðan ástandið varir:

„Vinsamlegast ekki eyða læknatímanum ykkar í að ræða skipulag eða stjórnmál. Kvörtunum og hrósum má koma á framfæri til HVE og Landlæknis rafrænt ef mikið liggur við,“ skrifaði hún. „Ennfremur biðjum við læknar einlæglega um frið frá vinnutengdum málum utan vinnutíma, svo sem í búðinni, leikskólanum og íþróttamiðstöðinni.“

Hildigunnur segir í samtali við Skessuhorn að viðbrögðin við þessari færslu hafi verið jákvæð. „Fólk hefur mætt okkur bara af rósemi og skilningi. Allir hafa gengið brosandi inn til mín í dag, sem ég auðvitað elska. Tilkynningin var náttúrulega tvíþætt. Fyrst og fremst vorum við að útskýra okkar viðbrögð á stöðinni vegna óvænts læknaskorts. Við reynum að tryggja aðgengi sem flestra að lækni með því að stytta viðtalstíma hvers og eins og koma þannig til móts við eftirspurn eftir bókuðum tímum. Til að þetta gangi upp er þó mikilvægt að fólk forgangsraði erindum sínum og taki aðeins eitt fyrir í hverju viðtali. Annars höldum við ekki tíma og drukknum í pappírsvinnu. Þetta er síðan bara tímabundið verklag sem við endurskoðum strax fyrir næsta mánuð,“ nefnir Hildigunnur. „Annar hluti tilkynningarinnar, sá sem þótti athyglisverður, var sá að ég persónulega hvatti fólk til að nýta stutta læknistímann sinn í að ræða heilsufarsmál sín fremur en heilbrigðispólitík. Þetta var af gefnu tilefni. Margir hafa skoðun á skipulagi heilsugæslunnar og við viljum öll að hér gangi sem best, en það þyngir hjartað að eiga þetta samtal oft á dag. Vandi heilsugæslunnar verður bara því miður ekki leystur samhliða blóðþrýstingseftirliti á tíu mínútum! Því er alveg kjörið að halda sig við læknisfræðina á vinnutíma,“ sagði Hildigunnur í stuttu spjalli við blaðamann.

Viðbrögðin hafa verið jákvæð

Í styttri læknatímum ræði fólk heilsufarsmál sín fremur en pólitík

Í styttri læknatímum ræði fólk heilsufarsmál sín fremur en pólitík