Rætt við Skarphéðin Magnússon þjálfara kvennaliðs ÍA um komandi tímabil

Kvennalið ÍA leikur í sumar annað árið í röð í Lengjudeildinni í knattspyrnu eftir að hafa endað í 5. sæti á síðasta tímabili og Skarphéðinn Magnússon er þjálfari liðsins eins og í fyrra. Blaðamaður Skessuhorns heyrði í Skarphéðni í liðinni viku en fyrsti leikur ÍA í Lengjudeildinni þetta sumarið verður á móti Fylki á gervigrasvellinum í Árbænum næsta laugardag og hefst klukkan 14 .

Nú ert þú á þínu öðru ári með meistaraflokk kvenna í Lengjudeildinni í sumar. Hefur undirbúningur liðsins verið svipaður í vetur og fyrir mótið í fyrra? „Já, hann hefur verið með svipuðu móti og á síðasta ári. Okkur gekk ágætlega á síðasta tímabili og því var ekki mikil ástæða til að gera miklar breytingar. Auðvitað hefur eitthvað verið fínpússað og við erum alltaf að reyna að gera aðeins meira og aðeins betur heldur en síðast.“

Hverjar eru helstu breytingarnar á liðinu frá síðasta tímabili? „Við höfum fengið inn fjóra nýja leikmenn, Elizabeth Bueckers sem kom frá Bandaríkjunum, Ísabel Jasmín Almarsdóttur frá Grindavík, Láru Ósk Albertsdóttur frá Vestra og Sigrúnu Evu Sigurðardóttur frá Aftureldingu. Þá hafa þær Jaclyn Poucel og Róberta Lilja Ísólfsdóttir nýlega komið til baka eftir smá hlé og munu vafalaust styrkja hópinn þegar líður á sumarið. Það hafa hins vegar orðið nokkrar breytingar á þjálfarateyminu. Þorsteinn Magnússon og Aldís Ylfa Heimisdóttir fóru út og vil ég þakka þeim samstarfið á síðasta tímabili. Inn hafa síðan komið Guðrún Þorbjörg Sturlaugsdóttir og Dino Hodzic í þeirra stað. Fyrirliðinn okkar, Bryndís Rún Þórólfsdóttir, verður ekki með okkur á vellinum í sumar þar sem hún á von á sínu fyrsta barni. Hún er hins vegar ennþá mikilvægur hluti af hópnum og gefur mikið af sér.“

Ekkert gefins í þessu

Þið fóruð taplausar í gegnum B deild Lengjubikarsins í vetur þar sem þið mættuð flestum þeim liðum sem spila með ykkur í Lengjudeildinni í ár. Það hlýtur að gefa ykkur góða von fyrir tímabilið sem er fram undan? „Já, það gefur okkur sjálfstraust inn í sumarið og stelpurnar geta komið inn í mótið fullar sjálfstrausts. Það er hins vegar ekkert gefins í þessu og þær verða að mæta í mótið tilbúnar til að gefa allt í þetta.“ Ertu sáttur við núverandi hóp eða er von á meiri styrkingu fyrir mót? „Við erum virkilega sátt með hópinn sem við höfum. Það eru reynslumiklir leikmenn í þessu liði ásamt yngri leikmönnum sem eru virkilega góðar. Hópurinn hjá okkur er ekki stór en hann er góður. Við höfum síðan alltaf augun opin ef það er leikmaður á lausu sem gæti styrkt hópinn.“

Nú eru þrír erlendir leikmenn í herbúðum ÍA. Markvörðurinn Klil Keshwar og útileikmennirnir Elizabeth Bueckers og Madison Brooke Schwartzenberger. Hvernig styrkja þær hópinn og hafa þær ekki góð áhrif á aðra leikmenn? „Þetta eru topp leikmenn og góðar manneskjur. Madi og Klil eru að fara inn í annað tímabilið hjá okkur og eru orðnar miklar Skagakonur. Liz kemur ný inn hjá okkur og getur leyst margar stöður í liðinu sem er alltaf kostur. Að fá inn erlenda leikmenn styrkir að sjálfsögðu hópinn og eykur gæði á æfingum sem verður svo til þess að allur hópurinn tekur framförum.“

Þú ert líklegast reynslunni ríkari sem þjálfari eftir tímabilið í fyrra. Hvernig kemur það til með að hjálpa þér og þínu teymi í deildinni í sumar? „Maður er alltaf að læra í þessu og eins og félagið er sett upp þá vinnum við öll mjög vel saman. Við erum með öflugan þjálfarahóp hjá félaginu sem vinnur afar vel saman og allir eru tilbúnir að veita aðstoð ef þarf. Maður þekkir deildina og liðin betur heldur en á síðasta ári og maður veit aðeins meira við hverju maður má búast í sumar.“

Mjög sátt með umgjörðina að flestu leyti

Skarphéðinn segir að Lengjudeildin sé miklu erfiðari deild heldur en margir halda, liðin séu mjög jöfn og allir geti unnið alla. Hann gerir ráð fyrir því að það verði nokkur félög sem munu berjast um það að vera í toppbaráttu eins og Keflavík, HK, ÍBV og Grótta ásamt ÍA. En hvað með umgjörðina í kringum liðið? Hvað er hann mest sáttastur við og hvar mætti gera betur? „Við erum mjög sátt í dag með þá umgjörð sem er í kringum liðið eftir að við fórum nýverið inn í nýju aðstöðuna á Jaðarsbökkum. Við erum með allt til alls hér á Skaganum. Í kringum liðið höfum við tvo sjúkraþjálfara og nuddara ásamt okkar þjálfarateymi og það er góður stuðningur frá stjórn og starfsmönnum félagsins. Það sem mætti kannski betur fara í umgjörðinni eru vallarmálin. Við munum spila aftur í Akraneshöllinni í sumar því Elkem völlurinn ber það ekki að hafa báða meistaraflokkana að spila og æfa á honum. Þar eru tvímælalaust tækifæri fyrir framfarir.“

Hver eru markmið liðsins fyrir sumarið? „Langtímamarkmiðið hjá okkur er að enda ofar í töflunni heldur en á síðasta ári og við tökum síðan einn leik í einu. Fyrsti leikur er á móti Fylki og við förum í þann leik eins og alla aðra til að vinna.“ Eitthvað að lokum? „Við hvetjum alla til að koma á leiki hjá okkur í sumar. Það var góð mæting hjá okkur á síðasta ári og við viljum sjá enn fleiri í sumar. Ég skora á Skagamenn að mæta á völlinn í sumar og styðja okkur í baráttunni.“

„Við erum virkilega sátt með hópinn sem við höfum“

Rætt við Skarphéðin Magnússon þjálfara kvennaliðs ÍA um komandi tímabil

Rætt við Skarphéðin Magnússon þjálfara kvennaliðs ÍA um komandi tímabil