Smáforritið Agga, á vegum nýsköpunarfyrirtækisins Alda Öryggi, býðst íslenskum smábátasjómönnum þeim að kostnaðarlausu. „Um er að ræða sérhannað öryggisstjórnunarkerfi, sem nútímavæðir, auðveldar og einfaldar allt utanumhald öryggismála smábáta. Forritið heldur öllum upplýsingum er varðar öryggismál bátsins á einum stað,“ segir í tilkynningu.

Nú eru leyfðir fleiri veiðidagar en undanfarin sumur og má því búast við aukinni sjósókn á strandveiðunum. Til að tryggja öryggi sem best er mikilvægt að smábátasjómenn framkvæmi eigin skoðanir á bátnum og búnaði hans. Agga auðveldar þá vinnu alla og leiðir sjómenn í gegnum allt það sem mikilvægt er að athuga og hafa í huga hvað öryggi þeirra varðar. Í smáforritinu eru gátlistar sem leiða sjómenn í gegnum eigin skoðun og áhættumat á ástandi og öryggi bátsins. Gátlistarnir eru gerðir af Landssambandi smábátaeigenda, Samgöngustofu og Slysavarnaskóla sjómanna.

„Í Öggunni geta sjómenn einnig skoðað ýmsa öryggisfræðslu til upprifjunar og framkvæmt nýliðafræðslu. Sömuleiðis geta smábátasjómenn tilkynnt sjóatvik eins og vélarbilun, strand, eld um borð eða slys á sjómönnum í ATVIK-sjómenn gegnum appið. Þær tilkynningar berast beint til Rannsóknarnefndar samgönguslysa (RNSA) en lögbundið er að smábátasjómenn tilkynni slík atvik til þeirra. Mikilvægt er að það sé gert svo hægt sé að nýta upplýsingar um atvik í forvarnarskyni í öryggismálum til sjós.

Agga er frítt fyrir alla smábátasjómenn og er fáanlegt á App Store og Google Play. Sjómenn þurfa bara að sækja appið, nýskrá sig og geta þá strax hafist handa við eigin skoðanir og áhættumat til að tryggja að þeir séu tilbúnir og öruggir fyrir komandi veiðitímabil. Hægt er að fá leiðsögn um notkunina og nálgast nánari upplýsingar á heimasíðunni agga.is. Einnig má sjá myndband um kerfið þar sem farið er yfir helstu aðgerðir þess.“

Aggan er frítt smáforrit sem bætir öryggi sjómanna