Karlakórinn Saqqarsik frá Qaqortoq á Grænlandi er væntanlegur í vinaheimsókn til Íslands dagana 22.-24. apríl. Qaqortoq er vinabær Akraness og má því segja að kórinn sé að koma í opinbera heimsókn þar sem hann mun halda tónleika í Vinaminni, Safnaðarheimili Akraneskirkju föstudaginn 25. apríl kl. 19.30 eftir móttöku í boði bæjarstjórnar. Þar koma einnig fram Karlakórinn Söngbræður undir stjórn Viðars Guðmundssonar og Karlakórinn Smaladrengir af Kjalarnesinu. Saqqarsik mun einnig syngja á Dvalarheimilinu Höfða á Akranesi og í Skálholtskirkju á Sumardaginn fyrsta kl. 14 ásamt Smaladrengjum.

Kórinn Saqqarsik fagnar um þessar mundir 20 ára starfsafmæli og samanstendur af kennurum, skrifstofumönnum, veiðimönnum, verkamönnum og trukkabílstjórum. Stjórnandi hans er Angerdla Kielsen-Olsen, sem er þekktur trúbador á Grænlandi. Á efnisskránni er tónlist úr mörgum áttum, allt frá þjóðlögum, kirkjutónlist og dægurlögum m.a. eftir stjórnandann sem útsetur flest lögin sem þeir syngja. Kórfélagar eru rómaðir fyrir glaðværð og skemmtilegheit á tónleikum þar sem þeir skýra frá textum og sögum frá Grænlandi. Aðgangur er ókeypis á báða þessa tónleika.

Þess má svo geta að síðasta vetrardag, miðvikuaginn 23. apríl kemur Saqqarsik einnig fram á árlegri sumarhátíð Söngfjelagsins í Iðnó kl. 20 en þar verður sumri fagnað að hætti Söngfjelagsins með söngskemmtun og dansleik. Þar býður Söngfjelagið vinakórnum sínum Kór Akraneskirkju ásamt hljómsveit og ýmsir gestir stíga á stokk s.s. Herbert Guðmundsson, Þokkabót, Smaladrengir og Saqqaarsik frá Grænlandi. Miðasala á tónleikana í Iðnó er á tix.is og þar er takmarkaður miðafjöldi.

Hilmar Örn Agnarsson er stjórnandi Söngfjelagsins og Kórs Akraneskirkju. Hann er fjölhæfur listamaður með mikla reynslu af kórstjórn og er ekki síst þekktur fyrir líflega og skemmtilega tónlistarviðburði, s.s. á vegum Söngfjelagsins.

Grænlensk kóraveisla með íslensku ívafi