Ræktunarstöðin Miðvogi er staðsett við gamla þjóðveginn hægra megin rétt fyrir ofan útivistarsvæði hunda á Akranesi og er Jón Þórir Guðmundsson garðyrkjufræðingur eigandi stöðvarinnar. Blaðamaður Skessuhorns kíkti í heimsókn til hans í blíðskaparviðri í lok síðustu viku til að athuga hvort einhver sumarblóm væri að sjá.

Að sögn Jóns Þóris er ekki mikið af blómum farin að blómstra enda er nú sá tími að þau eiga að vera að vaxa. Jón segir að veturinn hafi verið ágætur, mildur þannig lagað og svo fari vorið af stað með látum. „Það er eiginlega mánuði of fljótt, það er frekar óþægilegt því það er betra að vorið komi í rólegheitum og verði svo bara til friðs. Öll tré eru einnig mánuði of snemma og þá verða menn órólegir. Ef það kemur hret geta trén skemmst en ég er svo sem ekkert stressaður, þetta fer eins og það fer.“

Jón Þórir segir að stöðin verði ekki opnuð fyrr en um miðjan maí en hann verði þarna með annan fótinn þangað til. Fólk geti hringt á undan sér og hann reddað því sem hann á til. „Sumarblómin eiga í raun ekki að fara út strax, kannski um miðjan maí ef tíðin er mjög góð en ræktunin miðast við að hún sé tilbúin í byrjun júní. Ég reyni frekar að halda blómunum niðri. Ég rækta þau kalt og fæ þau þéttari og þannig að þau vaxi bara í rólegheitunum. Fólk er farið að koma til mín, ég er farinn að selja tré í garða sem er óvenjusnemmt og oftast er nú frost í jörðu á þessum tíma. Fólk er orðið æst að komast út í garð að dunda sér og það er mest núna þeir sem eru komnir með gróðurhús. Þeir eru að komast í stuð og þá redda ég því sem til er,“ segir Jón Þórir.

*Hér má sjá tóbakshorn sem er gamaldags sumarblóm.*

*Snædrífa er nýleg tegund sem margir eru veikir fyrir.*

*Ný ágrædd ávaxtatré eins og epli, perur og kirsuber.*

*Sýprus tré þurfa gott skjól og sólríkan stað.*

Í leit að sumarblómum