Rætt við Þórarin Frey Konráðsson fatahönnuð á þrettánda ári

Á Hvanneyri í Borgarfirði býr Þórarinn Freyr Konráðsson, strákur á þrettánda ári sem segist alltaf hafa haft gaman að spá í föt og svolítið í tísku líka – ásamt því að líta vel út. Hann langaði mest að fá saumavél í jólagjöf fyrir síðustu jól svo hann gæti farið að sauma og skapa sína eigin tísku.

Alltaf haft áhuga á fötum

Þórarinn Freyr segist alltaf hafa haft gaman af fötum. Að klæðast alls konar flíkum sem honum þykja flottar og líka stúderað hvernig fólk klæddist. Hvort fötin væru flott, hvort þau klæddu þann vel sem var í þeim, sem sagt hvort viðkomandi væri smart í fötunum eða ekki. „Þegar ég var lítill, þá var Páll Óskar aðal fyrirmyndin. Mér fannst lögin hann skemmtileg og fötin flott sem hann notaði á þeim tíma. Þá fannst mér flott að ganga í jökkum og vera svolítið sparilega klæddur, sem sagt svolítið eins og Páll Óskar var þá. Meira að segja fórum við mamma að heimsækja hann. Þá langaði mig að eiga svipaða jakka og hann notaði. En það eru mörg ár síðan, smekkur minn hefur breyst og ég er ekki hrifinn af þeirri tísku lengur. Nú er ég komin með aðrar hugmyndir. Mér er samt ekki sama í hvernig fötum ég geng í og hefur aldrei verið, alla vega ekki þegar ég er að fara eitthvað. Það er öðruvísi þegar maður er bara heima. Þá er bara fínt að vera í kósý fötum,“ segir Þórarinn brosandi.

*Þórarinn við gömlu saumavélina sem hann fékk í jólagjöf. Hann langar að safna sér fyrir nýrri vél, þó að hún verði ekki endilega ný úr kassanum, eins og þar stendur.*

Hugmyndin kom frá vini

„Ég fékk hugmyndina að því að fara að breyta og sauma föt frá vini mínum sem er líka að breyta fötum. Það eru sem sagt fleiri en ég að gera þetta og enginn hefur sagt við mig að það sé asnalegt að strákar séu að sauma. Það eru auðvitað fullt af mönnum sem hanna og sauma föt bæði á Íslandi og úti í heimi svo mér finnst þetta ekkert öðruvísi.“ Þórarinn segir að hann hafi breytt eigin fötum, en þó ekki eingöngu. „Ég hef breytt mínum eigin fötum. Stundum er ég kominn með leið á einhverjum fötum og þá breyti ég þeim kannski og þá verða úr því eiginlega ný föt. En svo hef ég líka farið í Búkollu og Barnaloppuna og einhverja svona nytjamarkaði til að kaupa notuð föt sem ég breyti síðan. Ég er duglegur að nota fötin sem ég er að búa til. Ég er ekkert að sauma bara til að sauma, heldur af því að mig langar til þess að líta betur út og föt eru dýr. En ef ég kaupi ódýr föt og breyti þeim sjálfur, þá fæ ég líka fötin sem ég vil nota. Og svo er þetta rosalega skemmtilegt.“

Safna fyrir saumavél

Aðspurður hvort hann breyti fötunum og saumi svo í höndunum segir Þórarinn að svo sé alls ekki. „Til þess að prufa hvort ég gæti þetta og hvort ég hefði gaman af, þurfti ég að eignast saumavél svo ég bað pabba og mömmu um að gefa mér saumavél. Ég fékk eina gamla í jólagjöf. Hún er reyndar dálítið mikið gömul en það var samt ágætt að byrja á að nota gamla vél. Ég er búin að læra mjög margt með því að prófa mig áfram á henni. Til dæmis að finna út hversu þykkt efni saumavélarnálin þolir án þess að brotna og svoleiðis. Ég hef æft mig alveg heilmikið af því að mig langar til þess að verða svolítið góður í þessu. En gamla vélin mín dugar ekki í allt svo mig langar til að safna mér fyrir annarri saumavél.“

Hefur nú þegar saumað fyrir aðra

Þegar Þórarinn er spurður að því hvernig hann ætli að safna sér fyrir annarri saumavél, sem kosti töluvert, allavega ef um nýja vél yrði að ræða, stendur ekki á svarinu. „Öðrum krökkum finnast fötin mín flott. Það hafa nokkrir nú þegar beðið mig um að breyta fötum fyrir sig. Þá hafa þeir komið með einhver föt frá sér og ég hef svo breytt þeim. Stundum hafa þeir hugmyndir um hvernig þeir vilja að ég breyti, en ekki alltaf og þá má ég ráða hvað ég geri. Ég hef gert allt ókeypis en hef verið að spá í hvort ég ætti að taka eitthvað fyrir þetta. Og líka ef ég æfi mig áfram, þótt ég verði ennþá með gömlu saumavélina, þá geti ég kannski selt föt sem ég hef breytt eða saumað. Þú veist, föt sem ég hef keypt notuð og gert, breytt eins og ég vil og mér finnst flott. Þá gæti ég kannski safnað mér fyrir saumavél á þann hátt. Þetta er bara svona hugmynd ennþá.“

Gæti alveg hugsa sér að hanna föt

„Ég gæti alveg hugsað mér að hanna föt og læra fatahönnun,“ segir Þórarinn Freyr þegar hann er spurður út í það. „Allavega eins og ég er að hugsa núna þá sé ég fyrir mér að það gæti verið gaman og spennandi.“ Þótt Þórarinn læri textíl, eins og það er kallað, í skólanum, þá hefur hann ekki lært saumaskap þar. „Við skiptumst á að vera í verkgreinum. Þetta virkar eiginleg þannig að við erum ákveðið margar vikur í textíl, smíðum, matreiðslu, já og þannig. Ég er ekki byrjaður í textíl af því að það hefur verið svo mikið að gera í að æfa fyrir árshátíðina svo við höfum ekki farið í þá tíma ennþá. En það verkefni er að verða búið svo þá get ég mætt. Ég má mæta með föt og breyta og bæta, ef ég vil, sem mér finnst mjög gott. Af því að þá get ég lært meira. Kannski hvað er auðveldara að gera en annað, og eitthvað slíkt. En aðallega hef ég farið á netið til að læra. Skoða myndbönd t.d. á TikTok og fleiri slíkum síðum. Þar er þetta allt útskýrt vel svo það er minna mál.“

Hefur ekki enn saumað á fullorðna

„Nei, ég hef ekki saumað á neinn fullorðinn ennþá,“ svarar Þórarinn þegar talið berst að því. „En pabbi og mamma hafa sagt að ég þurfi nú að sauma á þau, hvort sem það hefur verið sagt í gríni eða ekki,“ segir hann brosandi. Þar sem hann á að fermast á næsta ári þá liggur beinast við að spyrja hvort hann ætli kannski að sauma fermingarfötin. „Neeeei, ég held ekki,“ svara hann og brosir; „ætli það sé ekki betra að einhver meira vanur geri það.“

Þegar blaðamaður spyr hvort það séu margir sem saumi mikið í hans fjölskyldu segist hann ekki muna eftir neinum, svona í fljótu bragði, alla vega ekki neinum sem saumi mikið. „En amma hans pabba, langamma mín, var saumakona og saumaði rosalega mikið hefur pabbi sagt mér. Hún var mjög flink og saumaði á fólk. Pabbi heldur að hún hefði ekki verið ánægð með hvernig ég falda buxur, sem dæmi. En amma mín, dóttir langömmu, segir að langamma hafi verið töffari og hefði ábyggilega haft gaman af því að sjá mig sauma. Mér finnst það dálítið flott.“

*Sýnishorn af buxum sem Þórarinn hefur breytt og er að breyta.*

„Ég ætla ekki að sauma fermingarfötin“

Rætt við Þórarin Frey Konráðsson fatahönnuð á þrettánda ári

Rætt við Þórarin Frey Konráðsson fatahönnuð á þrettánda ári