Rætt við Valdísi Marselíu um tannlækningar og Skagabros á samfélagsmiðlum

„Það er í raun bara markmiðið mitt að fólk fatti að það er ekki erfitt að sinna þessu, þetta tekur bara nokkrar auka mínútur. Þú færð tvö sett gefins; barnatennur og fullorðinstennur. Fyrir þriðja settið þarftu að borga.“ Skagamenn eru ekki bara þekktir fyrir knattspyrnu, heldur hefur Skagabrosið gripið athygli þúsunda Íslendinga á samfélagsmiðlum undanfarin ár. Konan sem stendur fyrir Skagabrosinu er Valdís Marselía Þórðardóttir, 30 ára tannlæknir. Auk tannlækninganna sjálfra hefur Valdís brennandi áhuga á að fræða aðra um tannheilsu og hefur notið vinsælda bæði á TikTok og Instagram, þar sem hún er dugleg að deila efni um tannheilsu bæði barna og fullorðinna undir nafninu Skagabros. Auk þess að starfa sem aðstoðartannlæknir á Akranesi er hún stundakennari við HÍ á tannlæknadeild. Hún er gift Ingimar Elí Hlynssyni og eiga þau tvo syni; Þórð Elí og Matthías Elí. Eftir mikið flakk víða um Evrópu í æsku og á unglingsárum settist Valdís að á Akranesi ásamt fjölskyldu sinni. Hún tók hlýlega á móti blaðamanni á tannlæknastofunni og svaraði nokkrum spurningum um líf sitt og starf.

Komið gott af flakkinu

Valdís kemur af þekktri fótboltafjölskyldu á Skaganum, pabbi hennar er Þórður Guðjónsson og móðir hennar Anna Lilja Valsdóttir. Þar sem pabbi hennar var atvinnumaður í fótbolta bjó hún fyrstu tólf ár ævinnar víða í Evrópu. Þrátt fyrir það segist Valdís samt vera Skagakona. „Ég kem í sjötta bekk hingað og er til sautján ára aldurs hér, þá fer ég sem skiptinemi í eitt ár til Frakklands og svo flyt ég til Reykjavíkur til að stunda nám. En ég fékk eiginlega pínu leið á því þannig að við fluttum í eitt ár til útlanda aftur, ég, maðurinn minn og sonur okkar. En svo var bara komið gott af þessu flakki og við settumst að hérna á Akranesi.“

Það sem kallaði á Valdísi að setjast að á Akranesi var tengslanetið sem hún hefur í bænum og einnig nálægðin við Reykjavík. „Öll fjölskylda mín og vinir eru hér. Það er stutt að fara til Reykjavíkur, þannig að mér fannst eiginlega kjörið tækifæri að vera hér með allt baklandið en samt eiga möguleika á því að vera stutt frá bænum þar sem meirihlutinn af þjónustunni er. En það er alveg meira en nóg að gera hér á Akranesi fyrir mig og mína fjölskyldu.“ Hún segir það besta við að búa á Akranesi vera frelsið. „Sérstaklega fyrir börn. Ég á sjö ára strák og hann getur farið hvert sem er; labbandi, hjólandi, bara skiptir ekki máli.“ Hún bætir við að hún sakni ekki umferðarinnar í höfuðborginni.

*Valdís leggur mikla áherslu á fræðslu og forvarnir í starfi sínu. Ljósm. bmh*

Vissi frá unga aldri hvert hún stefndi

Valdís segist hafa vitað að hún vildi verða tannlæknir frá unga aldri. „Það var augnablik þegar ég var sjö ára sem er rosalega sterkt í huga mér. Þá var ég bara úti að leika mér og ég man ég hugsaði „ég ætla að verða tannlæknir“. Og ég veit það, þetta er svona alls konar sem krakkar segja; „ég ætla að verða búðarkona“, „ég ætla að verða þetta“, en ég var bara búin að ákveða þetta sjö ára.“ Málið flæktist þó aðeins þegar það kom að því að fara í háskóla, þar sem hún hafði engan áhuga á því að fara í klásus. Klásus kallast þegar nemendur þurfa að taka inntökupróf til að hefja nám í ákveðinni námsgrein og þurfa einnig að taka samkeppnispróf þegar fyrstu önninni er lokið til þess að fá að halda áfram í náminu. Samkeppnisprófið í tannlæknisfræði er mjög erfitt, einungis átta nemendur komast áfram. Valdís fór því aðra, „einfaldari“ leið í háskólanum til að byrja með. „Þannig að ég byrja á fyrstu önninni í tölvunarfræði og ég held ég hafi grátið nánast annan hvern dag. Ég hugsaði bara; „þetta er ekki mitt, þetta er ekki mitt.“.“ Hætti hún því í tölvunarfræði fyrir fyrstu lokaprófin og fór að undirbúa sig fyrir það að hefja nám í tannlæknafræði. Henni tókst að komast áfram í náminu í annarri tilraun árið 2016.

Þakklát sjö ára Valdísi

Valdísi langaði að hjálpa fólki, þar sem hún vissi að hún væri góð í því. Hún segist líka hafa íhugað að fara í læknisfræði, en að sjö ára Valdís hafi verið búin að ákveða hvaða leið hún ætti að fara. „Ég er rosalega þakklát sjö ára Valdísi sem hafði ákveðið að verða tannlæknir en ekki einhver sérfræðimenntaður læknir þar sem ég þyrfti ennþá að vera í námi. Ég er mjög þakklát fyrir allt fólkið sem nennir því, en sjálf er ég mjög ánægð að hafa farið mína leið.“

En hvað er það skemmtilegasta við að vera tannlæknir? „Mér finnst skemmtilegast að hitta börn. Mér finnst þau æðisleg og að fá að vinna við það að nánast leika við þau þegar maður er með þau í skoðun.“ Valdís segir erfiðast að finna gott jafnvægi milli vinnunnar og einkalífs. „Það getur reynst erfitt að geyma vinnuna í vinnunni og vera ekki að vinna stundum of mikið. Þá getur orkan klárast, sem er ekki boðlegt þegar það eru litlir strákar sem bíða eftir mér heima, sem þurfa sína athygli og ást.“

Vildi líka verða kennari

Hægt er að segja að hugmyndin að því að auka fræðslu almennings varðandi tannheilsu hafi einnig verið hugmynd sjö ára Valdísar, að hluta til. „Þessi sjö ára Valdís ákvað að vera tannlæknir en hún ákvað líka að hún ætlaði að vera kennari. Mér fannst ég sem tannlæknir ekki ná að kenna nóg. Ég hef bara smá tíma með þessari einu manneskju og svo kemur næsta. Og ég veit ekkert hvort hún sé búin að meðtaka eitthvað af því sem ég segi.“ Því ákvað hún að byrja að deila efni um tannheilsu á samfélagsmiðlum, þar sem hún vissi að þessar upplýsingar væru ekki sjálfsagður hlutur fyrir flesta.

Í dag er hún með í kringum fimm þúsund fylgjendur á TikTok og þrjú þúsund á Instagram. „Það er svo gaman af því að ég er þannig manneskja að mér er alveg sama hvað ég set frá mér, ef ég set það bara fram á flottan hátt. Mér er sama hvað öðrum finnst. Ég ákvað að byrja að bomba út fræðslu, sem varð til þess að fleiri tækifæri opnuðust. Ég greip þau af því að ég vissi að ef ég færi til dæmis í samstarf við fyrirtæki myndi ég stækka meira, sem þýddi að þá myndu fleiri sjá fræðsluna mína.“

Hópurinn sem Valdís er að reyna að ná til með fræðslunni sinni er stór. „Það sem ég segi og er að fræða um er eitthvað sem allir geta tekið til sín af því að það eru allir með tennur. Eða flestir alla vega ennþá.“ Fræðslan beinist þó mikið að unglingum og foreldrum. „Mér finnst mjög mikilvægt að tannheilsa barna okkar sé góð og þess vegna vil ég ná helst til foreldra, en vil samt líka ná unglingunum sem er jafnvel kannski bara alveg sama um tannheilsuna sína og fatta ekki alveg afleiðingarnar.“

*Valdís er dugleg að deila efni um líf sitt og starf á samfélagsmiðlum. Myndir af Instagram*

Maður á bara eitt líf

Valdís segir sjálfstraustið sitt vera meðfætt, henni hafi alltaf verið sama hvað öðrum finnst um sig. „Ég veit hvað í mér býr og ég veit að þó að einhverjum finnist ég ekki eins flott og mér finnst ég vera, þá er það bara þannig. Og hvað á þessi manneskja að hafa áhrif á mig?“

Hvað myndirðu ráðleggja þeim sem eru hræddir við að stíga fyrstu skrefin af ótta við álit annarra? „Það sem ég vil að fólk pæli í er að þú átt bara eitt líf. Mun skipta þig máli eftir fimm ár hvað þessari manneskju finnst? Ef það myndi ekki skipta þig máli eftir fimm ár, af hverju ertu að láta það skipta þig máli núna? Flestir óttast því pottþétt að gera mistök og ég geri það alveg sjálf. En þú þarft alltaf að taka fyrstu skrefin hvort sem þér mistekst. Þá er alltaf betra að mistakast tíu sinnum og ná svo einhverju markmiði heldur en að gera aldrei neitt og mistakast aldrei, en þá ertu líka bara á sama punktinum.“

Munnurinn er byrjunin á öllum líkamanum

Mikilvægi tannheilsunnar er í forgrunni í starfi Valdísar og stefnir hún að því að stækka merkið Skagabros enn meira til að ná fræðslunni lengra, sérstaklega á samfélagsmiðlum. Hún fékk nýlega þann heiður að komast í fræðslunefnd fyrir Tannlæknafélag Íslands til að gera einmitt það. „Það er í raun bara markmiðið mitt að fólk fatti að það er ekki erfitt að sinna þessu, þetta tekur bara nokkrar auka mínútur. Munnurinn er í rauninni byrjunin á öllum líkamanum, þannig að ef munnheilsan er í lagi eru meiri líkur á að líkaminn sé í lagi.“ Hún vill leggja áherslu á forvarnir og fræðslu til að fyrirbyggja skemmdir. „Þú færð tvö sett gefins, barnatennur og fullorðinstennur. Fyrir þriðja settið þarftu að borga! Auðvitað erum við tannlæknar hérna til þess að hjálpa til ef það koma skemmdir en tannlæknar eiga helst að geta veitt forvarnir og fræðslu áður en eitthvað gerist.“

Að opna sína eigin tannlæknastofu er ekki á dagskrá á næstunni fyrir Skagabros. „Mér finnst rosalega notalegt að vera aðstoðartannlæknir, sem þýðir í rauninni bara að ég mæti í vinnuna, sinni vinnunni og ég fer heim. Það að vera með sína eigin stofu og rekstur felur í sér starfsmannahald, leigu, maður þarf að kaupa stóla og efni, alls konar. Þetta er bara aðeins stærri pakki en ég er tilbúin í akkúrat núna.“

Hún útilokar þó ekki möguleikann alveg. „En hver veit? Við erum mörg hérna á Skaganum tannlæknar og það eru nokkrar í náminu líka sem eru Skagastelpur og vilja vera hér, þannig að það eru alveg spennandi möguleikar í boði fyrir okkur að gera eitthvað stórt og flott hérna á Akranesi á næstu fimm til tíu árum.“

Texti og myndir: Birta María Hallsteinsdóttir

*Valdís Marselía útskrifaðist sem tannlæknir árið 2024 frá tannlæknadeild Háskóla Íslands. Ljósm. úr einkasafni*

Ákvað sjö ára að verða tannlæknir

Rætt við Valdísi Marselíu um tannlækningar og Skagabros á samfélagsmiðlum

Rætt við Valdísi Marselíu um tannlækningar og Skagabros á samfélagsmiðlum