Snæfell heimsótti Hamar á sunnudagskvöldið í hreinum úrslitaleik um hvort lið færi áfram í fjögurra liða úrslit 1. deildar karla í körfubolta. Staðan í einvíginu var 2-2 fyrir kvöldið.

Fyrstu mínútur leiksins einkenndust að örlitlum taugatrekkingi þar sem liðin voru ekki að nýta opin skot og mátti sjá nokkra tapaða bolta. Þegar fyrsti leikhluti var hálfnaður var staðan 10-12 fyrir Snæfelli en Birkir Máni og Ragnar Ágúst náðu góðu áhlaupi fyrir heimamenn og komust í 17-16 þegar skammt var til leikhluta skipta. Sturla Böðvarsson kom með frábæra innkomu af varamannabekk Snæfells og setti niður síðustu sex stig leikhlutans og staðan því 17-22 fyrir Snæfell eftir fyrsta leikhlutann.

Sturla setti niður fyrstu þrjú stig annars leikhluta og náðu leikmenn Snæfells upp átta stiga forystu, 20-28 snemma í leikhlutanum. Hamarsmenn náðu hægt og rólega að minnka mun Snæfells, þeir hertu varnarleik sinn og það kviknaði á Spánverjanum Jose Medina. Birkir Máni náði einnig að snögghitna fyrir utan þriggja stiga línuna og fóru heimamenn á svaðalegt áhlaup til að loka fyrri hálfleiknum en þeir fóru á 25-8 áhlaup og voru þannig með níu stiga forystu í hálfleik, 45-36.

Snæfell náði að minnka muninn í 50-44 þegar Khalyl Waters skoraði og fékk víti að auki sem hann setti niður en ávallt náðu heimamenn að svara þeim áhlaupum sem Snæfellingar gerðu. Birkir Máni, Jose Medina og Jaeden King sáu til þess að heimamenn voru ávallt með yfir tíu stiga forystu og þeir þrír sáu til þess að heimamenn voru með sextán stiga forystu fyrir loka leikhlutann, 76-60.

Snæfell náði að minnka muninn í þrettán stig, 83-70 um miðbik fjórða leikhluta en þeir Jose Medina og Birkir Máni settu næstu sjö stig á töfluna fyrir Hamar og náðu heimamenn þannig 20 stiga forystu, 90-70 þegar eingöngu þrjár mínútur voru eftir. Gestirnir úr Stykkishólmi reyndu að setja pressu á heimamenn en sigur Hamars var ekki í hættu eftir þessar körfur frá Birki og Jose, sigur Hamars staðreynd 99-85 og Snæfell því úr leik í úrslitakeppni 1. deildar karla þetta árið.

Khalyl Waters skoraði 30 stig fyrir Snæfell, Sturla Böðvarsson skoraði 11 stig og Matt Treacy skoraði 10 stig. Í liði Hamars skoraði Jose Medina 29 stig, Birkir Máni Daðason skoraði 24 stig og Jaeden King skoraði 19 stig.

Hamar mætir Fjölni í fjögurra liða úrslitum á meðan Ármann mætir Breiðabliki og hefst úrslitakeppnin næstkomandi miðvikudag.

Snæfell komið í sumarfrí eftir tap í Hveragerði