Tveir nemendur Fjölbrautaskóla Snæfellinga í Grundarfirði fóru í skiptinám á vegum AFS á Íslandi í upphafi síðustu annar. Það voru þau Eyþór Júlíus Hlynsson og Ólöf Harpa Aðalsteinsdóttir. Á vef skólans er sagt frá ferð þeirra og forvitnast um upplifun þeirra og lærdóm af því að fara erlendis í skiptinám.

Eyþór Júlíus fór til Slóvakíu í þrjá mánuði í bæ sem heitir Vráble sem er í suðvestur Slóvakíu. Skólinn sem Eyþór fór í heitir Gymnázium Vráble og er með um 150 nemendur. „Það sem var áhugaverðast við skólann var hvernig tímarnir voru. Í tíma voru kennararnir að tala allan tímann og nemendur glósuðu. Það voru líka fastar stofur á hvern bekk og pásurnar voru mjög stuttar milli tíma, en það gerði skóladaginn mikið styttri og var honum lokið um hádegi,“ segir Eyþór. Það sem stóð upp úr þessu námi var aukið sjálfstraust og að sjálfur hafi hann þroskast mikið af námsdvölinni. Eyþór segir að Slóvakía sé fallegt land með fullt af kastölum og kirkjum sem vert sé að skoða.

Ólöf Harpa fór til Ungverjalands í fimm mánuði. Bærinn sem hún var í heitir Veszprém sem er staðsettur suðvestur af Búdapest og er 15 km frá Balaton vatninu. Skólinn sem hún var í heitir Vetési Albert Gimnázium. Þar stunda 600-700 nemendur nám. Það sem Ólöfu Hörpu þótti áhugavert við skólann var að hann virkaði meira eins og grunnskóli en framhaldsskóli fyrir sig. „Það voru tölvuherbergi og það voru einu tímarnir sem þú þurftir að nota tölvu til að læra í, en í hinum tímunum varstu með skólabækur og það var allt lærdómsefnið þitt. Það sem var frábrugðið þessum skóla við FSN er að þú fékkst heimavinnu fyrir daginn en þurftir ekki að skila henni til kennara. Kennarar treystu bara á þig að læra heima hjá þér fyrir næsta tíma. Það voru aldrei nein sérstök skil á föstudögum, þar sem það voru engin verkefni nema heimavinna sem enginn fór yfir! Aðra hverja viku voru próf og þannig fékkstu einkunnir og endurgjöf fyrir áfangann.“

Fóru sem skiptinemar frá FSN til tveggja landa