Snæfell í Stykkishólmi heimsótti Hamar á laugardaginn í þriðja leik liðanna í átta liða úrslitum 1. deildar karla í körfubolta. Leikið var í Frystikistunni, heimavelli Hamars. Liðið sem vinnur fyrst þrjá leiki heldur áfram í fjögurra liða úrslit en staðan í einvíginu fyrir leik var 1-1.

Fyrstu mínútur leiksins einkenndust af miklu jafnræði en þegar fimm mínútur voru liðnar var staðan 14-14. Gestirnir náðu að síga örlítið fram úr fyrir lok leikhlutans og var staðan 20-24 fyrir Snæfell eftir 1. leikhluta.

Það tók heimamenn stuttan tíma að jafna metin í öðrum leikhluta. Meiri grimmd í varnarleik Hamars gerði það að verkum að Snæfell fór að brenna af skotum og náðu heimamenn að komast í 36-31, þegar Fotios hin gríski, setti niður þriggja stiga körfu þegar leikhlutinn var hálfnaður og myndaðist stemning í Frystikistunni. Hittni gestanna var ekki upp á marga fiska á meðan heimamenn náðu að spila vel saman og fundu ávallt vel valin skot. Staðan í hálfleik var 56-44 fyrir Hamri.

Heimamenn komu mikið mun grimmari en gestirnir út í seinni hálfleik og Gunnlaugur þjálfari Snæfells þurfti að taka leikhlé eftir eingöngu tvær mínútur, þegar staðan var strax orðin 62-44. Snæfell náði í nokkur skipti að ná muninum niður fyrir tíu stigin en ávallt var Hamar með svör. Heimamenn náðu að koma muninum upp í 20 stig, 84-64 þegar þrjár mínútur voru eftir af þriðja leikhluta en gestirnir náðu að minnka muninn fyrir lok leikhlutans og var staðan 89-73 fyrir Hamar.

Snögg fimm stig frá Matt Treacy leikmanni Snæfells gaf áhorfendum úr Stykkishólmi von um endurkomu í fjórða leikhluta en sú von var snögglega kæfð. Lúkas Aron Stefánsson og Jose Medina, leikmenn Hamars, settu á svið þriggja stiga flugeldasýningu þegar fjórði leikhluti var hálfnaður og náðu heimamenn 102-82 forystu. Töluverður pirringur leit dagsins ljós hjá leikmönnum beggja liða undir lok leiks og mátti sjá tæknivillur og brottrekstrarvillur hjá báðum liðum en Hamar fór samt sem áður með sigur af hólmi, 115-86.

Stigahæstur í liði Snæfells var Khalyl Waters með 30 stig en þeir Matt Treacy, Juan Navarro og Alejandro Rubiera voru allir með 14 stig hvor. Stigahæstur í liði Hamars var Jose Medina með 32 stig, Lúkas Aron Stefánsson skoraði 20 stig og Fotios Lampropoulos skoraði 17 stig.

Næsti leikur liðanna verður í Stykkishólmi, miðvikudaginn 9. apríl og hefst hann klukkan 19:15. Ef Hamar vinnur þann leik fara þeir áfram í fjögurra liða úrslit en ef Snæfell sigrar verður hreinn úrslitaleikur spilaður í Hveragerði sunnudaginn 13. apríl.

Stórt tap Snæfells í Hveragerði