Rætt við frumkvöðlana Sunnevu Dís B. Freysdóttur, Rakel Ösp Margrétardóttur og Viktoriu Korpak um verkefnið þeirra – TónLjós

Nemendur í lokaáfanganum STEAM þrjú, í Menntaskóla Borgarfjarðar í Borgarnesi, fá tækifæri að taka þátt í keppninni JA Iceland – Ungir frumkvöðlar, sem fer fram í Smáralind dagana 4. – 5. apríl næstkomandi. Stúlkurnar þrjár; tvær úr Hvalfjarðarsveit og ein frá Akranesi fara þá fyrir hönd MB með TónLjós og kynna fyrir gestum og gangandi. Blaðamaður Skessuhorns forvitnaðist um verkefnið, sem byggir á tónlistarskotinni kertagerð, og ræddi við stúlkurnar.

*Vörur þeirra sem verða til sölu í Smáralind um helgina. Is it True, Skína og Klisja.*

Þetta er orðið frægt í Borgarnesi

Hugmyndin að kertagerðinni kviknaði hjá Sunnuevu þegar hún ákvað að breyta til á nýju ári. „Við elskum kerti og tónlist og við ákváðum að sameina þetta tvennt og hafa tengingu á milli. Við byrjuðum í Kviku í MB, höfðum samband við tónlistarfólk og erum nú komnar með þrjár týpur af kertum. Við ætlum ekki að hafa meira strax en við hugsum að við stækkum við okkur smám saman. Þetta er orðið mjög frægt hér í Borgarnesi allavega,“ segir Sunneva og hlær.

Eins náttúrulegt og hægt er

Inni í eldhúsi hjá stelpunum er að finna ýmis verkfæri og efni. „Við erum hér með hreint sojavax, ilmkjarnaolíur en við ætlum að breyta uppskriftinni aðeins. Við ætlum að bæta við bývaxi með sojavaxinu en þegar það er sett saman þá brennur það hægar og verður meiri lykt. Við ætlum að fá hreina ilmkjarnaolíu seinna en við erum að læra af öðrum og lærum af okkar mistökum líka. En fyrst og fremst langar okkur til að halda hreinum efnum í kertunum, ekkert eitur og langar okkur til að hafa þetta eins náttúrulegt og hægt er,“ nefnir Viktoria.

*Stúlkurnar ásamt Emmsjé Gauta með kertið Klisja. Ljósm. röm*

Kveikja, skanna og hlusta

Stúlkurnar funduðu með tónlistarmanninum Emmsjé Gauta og var hann spenntur fyrir verkefninu. „Við erum síðan í samstarfi við tónlistarkonuna Jóhönnu Guðrúnu og tónlistarmennina Patr!k og Luigi en þeir gáfu saman út lagið Skína. Við sendum marga tölvupósta en fengum svör frá sjö. Þau fjögur sem við nefndum en einnig Sölku Sól, Heru Björk og Gugusar. Það er kóði á krukkunum sem hægt er að skanna inn á forritinu Spotify og þá kemur lagið beint upp. Kveikja á kertinu og skanna kóðann, þá kemur lagið og hægt er að njóta,“ segir Rakel.

Sultukrukkulokin með vesen

Ungir frumkvöðla keppnin í Smáralind er vinsæl keppni en í fyrra voru yfir 180 fyrirtæki með bás en stúlkurnar eru spenntar fyrir helginni. „Þó við vinnum ekki, þá ætlum við samt að halda áfram við það sem við erum að gera. Okkur finnst þetta skemmtilegt, þetta er okkar áhugamál og erum við með okkar starfsheiti. Sunneva er framkvæmdastjóri, Rakel er vefstjóri og ég er forstjórinn,“ segir Viktoria og brosir. Stúlkurnar eru á öðru ári í MB og hefur forsala á kertunum gengið mjög vel. „Og ef við náum að selja eitthvað í Smáralind, þá þurfum við að fara á fullu í framleiðslu. Helsta vandamálið núna eru að sultukrukkulokin eru með vesen en ég er búin að vera að vinna við þær í meira en mánuð og alveg að vera brjáluð yfir þeim,“ segir Viktoria og hlær.

Ýmsar vinnustöðvar

Inn í íbúðinni er að finna ýmsar framleiðslustöðvar. „Við gerum fjögur kerti í einu og það tekur á milli hálftíma og upp í klukkutíma að framleiða. Vandamál er að lokin á krukkunum þurfa málningu en þau verða komin fyrir næstu helgi,“ segir Rakel og brosir til Viktoriu en greinilegur pirringur er hjá stúlkunum vegna þessara loka. „En síðan setjum við límmiða á allar krukkurnar, öryggismiða undir og ýmsar upplýsingar. Við erum núna að bíða eftir að fá bómullar kertaþráðinn en við erum eingöngu með eina krukku af Skína en við förum að framleiða meira af því fyrir helgina. Annars eru hér stöðvar út um alla íbúð þar sem við geymum krukkurnar, önnur þar sem við blöndum efni og svo framvegis,“ segir Viktoria.

Margar hugmyndir

Stúlkurnar eru stútfullar af frábærum hugmyndum sem detta út úr þeim þegar blaðamaður spyr um framhaldið. „Við viljum sleppa krukkunum og prófa að búa til úr silikoni. Ein hugmynd var að hafa setningu úr lagi og setja það á kerti. Svo læknakerti, með góðum efnum fyrir heilsuna, en einnig að búa til kerti úr svona spes kremi sem mæður nota á ungabörn. Við ætlum að halda áfram með þessa taupoka en Rakel var að spá í að búa til fermingarkerti. Eins og þú heyrir eru margar hugmyndir, jafnvel að hafa eitthvað inni í kertunum og þegar það brennur niður, þá birtist eitthvað, jafnvel texti eða perlur með nafni á laginu. Við tökum á móti allskonar hugmyndum,“ nefnir Viktoria. Blaðamaður kemur með hugmynd að texta úr lagi Sigurrósar, Viðrar vel til loftárasa. Þær rita það hjá sér. Áhugasamir geta farið og hitt á stúlkurnar í Smáralind um næstu helgi.

*„Is it True“ kerti í vinnslu hjá stúlkunum. Ljósm. röm*

Tengja kerti og tónlist

Rætt við frumkvöðlana Sunnevu Dís B. Freysdóttur, Rakel Ösp Margrétardóttur og Viktoriu Korpak um verkefnið þeirra - TónLjós

Rætt við frumkvöðlana Sunnevu Dís B. Freysdóttur, Rakel Ösp Margrétardóttur og Viktoriu Korpak um verkefnið þeirra - TónLjós