Snæfell tók í gær á móti Hamri í öðrum leik liðanna í átta liða úrslitum 1. deildar karla í körfubolta og var leikurinn í Stykkishólmi. Hamar vann fyrsta leikinn í Hveragerði síðastliðinn laugardag, 103-96 en Snæfell lék þá án Juan Navarro sem tók út leikbann.

Hamar byrjaði leikinn af miklum krafti og komst fljótlega í 1-11 og var með öll völd á vellinum. Þó nokkur bið var á leiknum þegar einhver villa kom á ritaraborð og má segja að þetta hlé hafi náð að þjappa liði Snæfells betur saman. Heimamenn komu út úr biðinni með meiri áræðni og kjark en aftur kom upp villa á ritaraborðinu og þurfti að gera annað hlé á leiknum. Staðan var þá 13-21 fyrir Hamri. Snæfell náði að minnka muninn undir lok leikhlutans, staðan 27-28 fyrir Hamar eftir 1. leikhluta.

Heimamenn komu út í annan leikhluta með miklum látum. Khalyl Waters stal boltanum og tróð en við það tók þétt áhorfendastúkan við sér og myndaðist gríðarleg stemning í húsinu. Snæfell skoraði fyrstu átta stig leikhlutans og þeir Sturla Böðvarsson og Aron Ingi Hinriksson bættu við stigaskorið og allt í einu var Snæfell komið með 12 stiga forystu, 43-31, og leikhlutinn hálfnaður. Hamar náði að laga stöðuna fyrir hálfleik og gengu liðin til búningsklefa í stöðunni 54-49 fyrir Snæfelli.

Gestirnir komu út í seinni hálfleik með Ragnar Ágúst í byrjunarliði og myndaðist stemning í kringum hann í liði Hamars. Gestirnir komust snemma yfir, 58-59 og virtist þessi breyting á liði Hamars setja sóknarleik heimamanna úr takti. En Matt Treacy skoraði snögg átta stig og Khalyl stal enn einum boltanum, skoraði og kom heimamönnum í stöðuna 70-62. Aftur náðu gestirnir frá Hveragerði áhlaupi og náðu að minnka munninn fyrir lokaleikhlutann, 75-72.

Aron Ingi hóf fjórða leikhluta með að setja niður þriggja stiga körfu og náði að kveikja í áhorfendastúkunni. Snæfell spilaði góðan varnarleik á fyrstu mínútum leikhlutans og náði upp níu stiga forystu þegar títt nefndur Aron Ingi setti aðra þriggja stiga körfu, 83-74. Gestirnir þurftu að taka leikhlé og fara yfir sín mál og komu úr leikhléinu með meiri grimmd varnarlega og hófu að saxa á forskot heimamanna. Við tóku spennandi lokamínútur þar sem Fotios minnkaði muninn í 92-88 þegar tvær mínútur voru til leiksloka. Leikmenn Snæfells náðu ekki að svara með körfu og Birkir Máni minnkaði muninn í tvö stig þegar ein mínúta var eftir, 92-90. Snæfell náði að komast á vítalínuna og þeir Alejandro Rubiera, Juan Navarro og Alex Rafn settu niður mikilvæg vítaskot undir lok leiks og vann Snæfell góðan sigur, 96-93.

Juan Navarro skoraði 21 stig fyrir Snæfell, Khalyl Waters 20 stig auk þess sem hann stal fimm boltum og Matt Treacy skoraði 17 stig. Sex leikmenn Snæfells skoruðu meira en 10 stig í leiknum. Hjá gestunum var Jaeden King stigahæstur með 28 stig, Fotios Lampropoulos skoraði 24 stig og Jose Medina 18 stig.

Þriðji leikur liðanna verður laugardaginn 5. apríl í Hveragerði og hefst hann klukkan 17.

Snæfell jafnaði metin gegn Hamri