Guðmundur Runólfsson hf hefur selt togarann Hring SH-153 til ferðaþjónustufyrirtækisins Rútuferða ehf. Hjalti Allan Sverrisson var himinlifandi þegar fréttaritari Skessuhorns náði tali af honum eftir hádegið í dag. „Ég hef lengi gengið með þessa hugmynd í kollinum og hafði samband á dögunum við G.Run hf um hvort að þetta gæti gengið upp,“ sagði Hjalti. Hugmyndin er að nota skipið í ferðaþjónustu og mun það koma í ljós á næstu mánuðum hvernig verkefnið verður útfært. Guðmundur Smári Guðmundsson framkvæmdastjóri G.Run var einnig sáttur með þessar málalyktir enda hefur frá því í haust staðið til að selja skipið. Kaupverðið fæst ekki uppgefið en þó mátti sjá að báðir aðilar voru sáttir með viðskiptin.