„Ferðaþjónustan á Vesturlandi stendur á sterkum grunni og horfir til framtíðar með bjartsýni,“ segir í tilkynningu frá Markaðsstofu Vesturlands. „Með auknum umsvifum og vexti ferðaþjónustunnar eykst einnig þörfin fyrir gott samtal og samvinnu milli atvinnulífs, sveitarfélaga of samfélags – með það að markmiði að skapa aðstæður fyrir fólk sem starfar í greininni og vill setjast að í samfélaginu. Til að stuðla að þessu samtali og stilla saman strengi verður haldið opið málþing á Hótel Hamri í Borgarnesi fimmtudaginn 3. apríl kl. 10:00–13:00.“

Tilefni málþings er spurningakönnun sem Áfangastaða- og Markaðsstofa Vesturlands sendi ferðaþjónustuaðilum á Vesturlandi í byrjun mars. Þar var meðal annars spurt um stöðu og væntingar ferðaþjónustufyrirtækja varðandi fjölda starfsfólks árin 2025 og 2030, hvernig gengi að finna húsnæði fyrir starfsfólk og hvort fólk í ferðaþjónustu hefði raunveruleg tækifæri til að setjast að í samfélaginu.

„Niðurstöðurnar gefa skýrar vísbendingar um jákvæðar væntingar og vöxt í greininni, en einnig að húsnæðismál eru víða áskorun – sem getur hamlað frekari vexti og dregið úr möguleikum starfsfólks til að festa rætur á svæðinu. Á málþinginu verður fjallað um mikilvægi þess að vinna saman, samhæfa aðgerðir og byggja upp aðstæður sem styðja við starfsfólk, búsetu og inngildingu í samfélagið. Dagskráin samanstendur af erindum, reynslusögum og samtali um hvernig við getum skapað umhverfi sem laðar að gott starfsfólk í ferðaþjónustuna – og gerir því kleift að setjast að og verða hluti af samfélaginu. Ferðaþjónustuaðilar, sveitarstjórnarfólk og allir sem bera hag svæðisins fyrir brjósti eru hvattir til að mæta og taka virkan þátt í þessu mikilvæga samtali. – mikilvægt er að skrá þátttöku: 

Skráning og nánari upplýsingar hér.