Snæfell í Stykkishólmi heimsótti á laugardaginn Hamar í Hveragerði í fyrsta leik liðanna í átta liða úrslitum 1. deildar karla í körfubolta. Vinna þarf þrjá leiki til að komast í fjögurra liða úrslit.

Gestirnir frá Stykkishólmi mættu af krafti á fyrstu mínútum leiksins og voru komnir í 2-11 þegar lítið var liðið á leikinn. Heimamenn tóku við sér og skoruðu 12 stig í röð og Gunnlaugur þjálfari Snæfells þurfti að taka leikhlé. Aftur náðu gestirnir áhlaupi en leikurinn jafnaðist út í lok leikhlutans og var staðan 25-27, fyrir Snæfelli eftir 1. leikhluta.

Heimamenn í Hamri náðu yfirhöndinni í byrjun annars leikhluta en þökk sé Khalyl Waters, Matt Treacy og Sturlu Böðvarssyni náðu gestirnir að halda í við Hamar. Þegar um þrjár mínútur voru til hálfleiks náðu heimamenn, þá sérstaklega Jaeden King, áhlaupi en þessi fyrrum leikmaður Snæfells gerði síðustu átta stig Hamars sem leiddi í hálfleik, 54-49.

Matt Treacy og Sturla Böðvarsson byrjuðu seinni hálfleik af krafti fyrir Snæfell en Sturla lék mjög vel í fjarveru Juan Navarro sem tók út leikbann í þessum leik. Þegar leikhlutinn var hálfnaður var staðan 65-63 fyrir Hamar og mikil spenna var í íþróttahúsinu í Hveragerði. Heimamenn, leiddir áfram af Jaeden King virtust vera að ná góðri forystu fyrir lokaleikhlutann en góð karfa frá Aroni Inga Hinrikssyni og frábær tilþrif frá Khalyl Waters, gerði það að verkum að leikurinn var í járnum. Hamar leiddi þó fyrir loka leikhlutann, 80-77.

Fyrstu mínútur fjórða leikhluta var eign heimamanna. Þeir fóru í 11-4 áhlaup og var staðan því 91-81. Gestirnir úr Stykkishólmi voru ekki á þeim buxunum að gefast upp og náðu frábæru áhlaupi þar sem þeir Alex Rafn Guðlaugsson og Khalyl Waters fóru fyrir liði Snæfells en þegar um tvær mínútur voru eftir var staðan 97-94 fyrir Hamar. Snæfell náði góðum skotum undir lok leiks en eingöngu Alejandro Rubiera náði að setja boltann í körfu heimamanna á meðan Hamarsmenn skoruðu sex stig og fóru með sigur, 103-96.

Þjálfari Snæfells nefndi það í viðtali eftir leik að mikil tilhlökkun er að mæta Hamri aftur strax á þriðjudaginn og ef að nokkur af þessum skotum, sem Snæfell átti á loka mínútum leiksins hefðu dottið niður, hefði niðurstaða leiksins mögulega orðið önnur.

Stigahæstur í liði Snæfells var Khalyl Waters en hann skoraði 35 stig, Matt Treacy skoraði 19 stig og Sturla Böðvarsson 18 stig. Í liði Hamars skoraði Jaeden King 38 stig, Fotios Lampropoulos skoraði 12 stig og Lúkas Aron Stefánsson 12 stig.

Næsti leikur liðanna er á morgun, þriðjudaginn 1. apríl, og verður leikurinn í Stykkishólmi en hann hefst klukkan 19:15.

Snæfell hársbreidd frá sigri í fyrsta leik