Músíktilraunir er tónlistarhátíð sem stendur að þessu sinni yfir dagana 27. mars til 6. apríl og fram fer í Hörpu í Reykjavík.. Ungmenni á aldrinum 13 til 25 ára geta skráð sig til leiks en í ár taka nokkur ungmenni þátt frá Vesturlandi. Blaðamaður Skessuhorns heyrði í þessu unga og efnilega tónlistarfólki.

*Tónlistarmaðurinn Bjarki Berg. Ljósm. vaks*

Bjarki Berg

Bjarki Berg, tónlistarmaður frá Akranesi mun stíga á fjalir Eldborgar á fyrsta kvöldi músíktilrauna, fimmtudagskvöldið 27. mars, en hann leggur áherslu á vandaða framleiðslu í tónlistarsköpun sinni en þrjú lög frá Bjarka eru komin inn á forritið Spotify og má lýsa þeim sem blöndu af poppi og rappi. „Þegar ég var yngri hafði ég gaman að því að búa til lög heima í Garageband, en svo árið 2023 byrjaði ég að nota annað forrit og festist í því. Ég bjó til mitt eigið stúdíó í herbergi mínu, samdi lög frá grunni, bætti söng við og gaf það út á Spotify,“ segir Bjarki.

Bjarki æfði á gítar þegar hann var yngri en hætti þegar hann var í 9. bekk. En hvaðan kom tónlistaráhuginn? „Þegar ég horfði á Eurovision sem krakki hafði ég gríðarlega mikinn áhuga á keppninni og dreymdi um að keppa í Eurovision með mitt eigið lag,“ segir hann. Þetta er í fyrsta skipti sem Bjarki tekur þátt í Músíktilraunum en hann hefur ágæta reynslu af að stíga á svið. „Ég keppti í söngkeppni SamVest eftir að hafa unnið hæfileikakeppni Arnardals og grunnskólanna á Akranesi. Svona viðburður eins og Músíktilraunir gefur mér frekari reynslu á sviði, sýnir mér hvernig svona keppnir virka og gefur vonandi einhverja vinsældahækkun í tónlistinni minni,“ segir Bjarki Berg.

Borgir

Borgir er hljómsveit úr Borgarnesi sem gerir aðallega Noiserock/Instrumental tónlist. Hljómsveitarmeðlimir nota mikið af gítar og synthum í lögum sínum og vilja helst bara gera tónlist sem þeim finnst skemmtilegt að hlusta á. Meðlimir hljómsveitarinnar eru þeir Atli Snær Júlíusson sem spilar á gítar og synth, Hörður Gunnar Geirsson sem syngur og Julian Golabek sem spilar á gítar og synth. „Við höfum verið saman í um tvö ár og höfum gefið út eina safnplötu en erum að vinna við að gera heila plötu,“ segir Atli Snær. Hljómsveitin Borgir tók þátt í Músíktilraunum í fyrra en einnig tók Hörður þátt einn sem Hyperlistic. „Þetta er fyrsta skiptið sem Julian tekur þátt. Við höfum allir haft áhuga á tónlist en við ólumst allir upp í kringum tónlist. Afi minn spilaði á harmonikku, pabbi Julian spilaði á bassa á hátíðum í Póllandi og Hörður á móður sem tók þátt í Músiktilraunum með hljómsveit sem hét Worm is Green,“ nefnir Atli.

Bakgrunnur þeirra félaga i tónlist hafi verið svipaður. „Við byrjuðum allir snemma í grunnskóla að fikta við tónlist en svo erum við allir bara góðir vinir og ákváðum að fara að gera tónlist saman. Okkur finnst að viðburður eins og Músíktilraunir sé geggjað tækifæri fyrir hljómsveitir og ungt tónlistarfólk til að spila sína eigin tónlist á sviði. Það er eitthvað sem okkur finnst vanta svolítið á Íslandi og sérstaklega utan höfuðborgarsvæðisins. Þetta er gott fyrir okkar reynslu og gæti opnað dyr í framtíðinni,“ segir Atli að lokum. Hljómsveitin Borgir stígur á svið föstudaginn 28. mars.

SÓT

Hljómsveitin SÓT er upprunalega frá Stykkishólmi og Akureyri. Tveir meðlimir sveitarinnar eru úr Stykkishólmi, þeir Ívar Leó Hauksson og Ísleifur Jónsson. Hljómsveitin SÓT gerir úr fagurt rokk, með blöndu af gleði, reiði, fegurð og örvæntingu. Ívar og Ísleifur voru báðir byrjaðir ungir í tónlistarnámi í Stykkishólmi en áhugi þeirra á tónlist kom frá foreldrum þeirra. „Ég var í tónlistarskólanum í Stykkishólmi, þar sem ég byrjaði á trommum, færði mig yfir á gítar, svo á píanó og að lokum á bassa en ég hef haldið mig á honum síðan. Ég var í lúðrasveitinni í Stykkishólmi frá því að ég var í 3. bekk og upp í 10. bekk,“ segir Ívar Leó.

Hljómsveitin SÓT hefur spilað saman í meira en ár og hafa þeir verið að koma fram víða. „Við höfum náð að spilað oft, þá aðallega á Akureyri en við erum byrjaðir að spila annars staðar á landinu, t.d. höfum við spilað í Reykjavík og í Stykkishólmi en þetta er í fyrsta skipti sem við keppum í Músíktilraunum og hlakkar okkur ekkert eðlilega mikið til en við höfum trú á því að þessi viðburður hjálpi listamönnum að koma fram og í leiðinni kynni fyrir landsmönnum góða tónlist,“ segir Ívar að lokum. Hljómsveitin SÓT stígur á svið laugardaginn 29. mars.

Guðbrandur Örn

Guðbrandur Örn er ungur tónlistarmaður úr Borgarnesi sem spilar á gítar og er tónlist hans kántrí miðuð en lögin hans fjalla gjarnan um ástina og áhrif eða kringumstæður sem myndast gegnum hana. „Ég hef alltaf dýrkað tónlist og mótaði skoðun á tónlistarsmekk svolítið eftir eldri bræðrum mínum en ég samdi mitt fyrsta lag ábyggilega í kringum 10-12 ára aldurinn og fór það í Jólalagakeppni Rásar 2. Ég man nú ekkert hvernig það var eða hvað það hét,“ segir Guðbrandur en bætir við: „Ég byrjaði svo að semja aftur mína tónlist fyrir um fimm árum síðan og flutti mín lög fyrst á sviði fyrir framan aðra árið 2023 í lýðháskóla í Noregi og svo byrjaði boltinn svolítið að rúlla eftir það,“ segir Guðbrandur.

Áhuginn fyrir tónlist hefur ávallt verið til staðar hjá Guðbrandi. „Það var svo mikið sungið heima, mamma lærði söng í langan tíma og er mikil söngkona, pabbi söng mikið í karlakór og eldri bræður mínir voru í tónlistarnámi frá unga aldri og maður hermdi bara eftir þeim,“ nefnir Guðbrandur. „Ég hef komið fram á ýmsum viðburðum í Borgarnesi, bæði spilað sjálfur og verið í hljómsveitum. Ég komst inn í aðal bandið í Borgarnesi, Leyndarmál frægðarinnar, í fyrra og höfum við spilað á ýmsum viðburðum hérna í bænum,“ nefnir Guðbrandur.

Guðbrandur kemur fram á þriðja kvöldi Músíktilrauna en þetta er ekki í fyrsta skipti sem hann tekur þátt. „Ég tók þátt í fyrra en tók skyndiákvörðun um að taka þátt í ár. Ég var ekki búinn að skipuleggja neitt í ár og ég verð á sviði einn með gítarinn sem mér finnst líka bara ágætt. Það er fyrst og fremst upplifun að fá að koma fram á svona flottum stað eins og Hörpunni, fyrir framan óþægilega mikið af fólki, sem gerir augnablikið líka bara meira spennandi og eftirminnilegt. Svo er líka bara gaman að kynnast alls konar tónlistarfólki sem tekur þátt, opnar dyr fyrir alls kyns tónlist sem er ekki endilega í meginstraumnum – og búa til tengsl sem gæta fylgt manni síðar. Þetta er klárlega eitthvað sem ég mæli með að ungt tónlistarfólk prófi,“ segir Guðbrandur að lokum.

Ungmenni af Vesturlandi taka þátt í Músíktilraunum