Tillögur að breytingu á Aðalskipulagi Stykkishólms vegna fyrirhugaðra breytinga á athafnasvæðum við Kallhamar, Hamraenda og Flugstöð voru kynntar á opnum fundi á Amtsbókasafninu í Stykkishólmi í gær.

Bæring Bjarnar Jónsson skipulagshönnuður fór yfir deiliskipulagstillögu fyrir Hamraenda en þar er gert ráð fyrir frekari athafnasvæði og teygir sig yfir óbyggt svæði í suðvestur átt. Markmið með þessu nýja deiliskipulagi er að fella nýja byggð fallega að landinu með því að byggja milli holta og vinna þannig að sem best ásýnd svæðisins, ekki síst frá Stykkishólmsvegi ásamt því að tryggja skynsamlega nýtingu innviða og möguleika á svæðinu.

Deiliskipulagstillaga fyrir Kallhamar svæðið var einnig kynnt en sú útfærsla verður með áherslu á að þar verði grænn iðngarður, lóðir og byggingarreitir og gerð grein fyrir nýrri hafnaraðstöðu á því svæði. Lögð verði áhersla á sjálfbæra nýtingu auðlinda í og við Breiðafjörð, hafntengda starfsemi og nýsköpun. Endurskoða þarf og breyta lengd flugbrautar og helgunarsvæðis hennar í samráði við ISAVIA en ekki er reglulegar flugsamgöngur við Stykkishólm en flugbrautin nýtist meðal annars fyrir sjúkraflug.

*Deiliskipulagsteikning af Hamraendasvæði. Teikn. Skipulagsgatt.*

*Deiliskipulagsteikning af Kallhamarssvæði.*

*Fundargestir skoða tillögur á opnum íbúafundi í gær. Ljósm. jse.*

Skipulag við Kallhamar og Hamraenda kynnt í Stykkishólmi