Rætt við Leif Björn Björnsson forritara um fyrirtækið Locatify

Leifur Björn Björnsson og Steinunn Anna Gunnlaugsdóttir kona hans fluttu í Borgarnes árið 2018 en árið 2009 stofnuðu þau íslenskt hugbúnaðarfyrirtæki, þá til að virkja nýjustu farsímatæknina til að deila staðbundnum sögum með ferðamönnum. Skessuhorn ræddi við Leif um starfsemi Locatify.

Kísildalurinn í fjögur ár

Leifur ólst upp við Grandaveg, vestast í Reykjavík, sonur Guðrúnar Ásmundsdóttur leikkonu og Björns heitins Björnssonar flugvirkja. „Grandavegurinn var þá iðnaðarhverfi og leiksvæðin voru á lóðum Lýsis hf, Fóðurblöndunnar, Bæjarútgerðarinnar, vörugeymsla Sambandsins og blessuð fjaran sem einu sinni var líka öskuhaugar en var á þeim tíma ennþá full af rusli sem gaman var að safna saman og brenna,“ nefnir Leifur.

Hann gekk í Landakotsskóla, Hagaskóla og Iðnskólann en eftir að hafa kynnst forritun og unnið hjá Kristjáni Ó Skagfjörð í forritun og síðan hjá Pósti og síma, lá leið Leifs til Kaliforníu. „Ég var þá 25 ára gamall og fór í frekara nám í tölvunarfræði í Chico State í Kaliforníu og vann svo í Kísildalnum í fjögur ár eftir nám í Dot.com ævintýrinu. Ég kynntist Steinunni konu minni 18 ára gamall á Borginni og á með henni fjögur börn, það síðasta þegar ég var 26 ára gamall en Steinunn er alin upp í gamla miðbæ Reykjavíkur og hefur unnið í fjölmiðlun og kennslu. Við tókum okkur saman og stofnuðum Locatify, þar sem hún er forstjóri og allt hvað eina,“ segir Leifur.

*Leifur Björn ásamt Elvar Thormari árið 2011 á ráðstefnu Nordic Games, þar sem Locatify fékk veglegan styrk til að hefja þróun ratleikjakerfinu. Ljósm. lbb.*

Búa hvar sem er

Spurður út í hvers vegna þau hafi ákveðið að flytja í Borgarnes svarar Leifur. „Við fluttum í Borgarnes árið 2018 einfaldlega vegna þess að Borgarnes er besti bærinn í nágrenni við borgina og börnin okkar voru upp komin. Vinnan okkar gefur okkur kost á að búa hvar sem er en stjúpi minn, Kjartan Ragnarsson, var fluttur í Borgarnes og stofnaði þar Landnámssetur Íslands og þá komst Borgarnes á kortið hjá okkur,“ nefnir Leifur.

Ástríða fyrir sögum og sagnfræði

Leifur segir að með tilkomu snjallsíma, hafi þau séð tækifæri til að smíða kerfi sem miðlar á auðveldan hátt staðbundnum upplýsingum og sögum. „Við höfum alltaf haft ástríðu fyrir sögum og sagnfræði ýmiskonar. Að ferðast og fræðast um staðhætti gefur umhverfinu meira gildi eins og hóll er bara hóll þar til þú veist hvað átti sér stað á honum. Við vinnum með ferðaþjónustufyrirtækjum, söfnum, menntastofnunum og fleirum en við smíðum kerfið og vinnum svo með aðilum sem gera efnið, setja það inn í kerfið okkar og gefa síðan út í sérmerktum öppum sem við búum til fyrir snjallsíma,“ segir Leifur.

Verkefni víða

Leifur segir að fyrirtækið hafi byggt inn ratleikjakerfi sem var vel tekið. „Við byggðum inn í þetta rafleikjakerfi þannig að fólk getur búið til þrautir eins og spurningar, púsl, tekið myndir og annað sem leyst er á staðnum og safnað stigum og hægt að keppa við aðra. Ratleikirnir hafa verið sérstaklega vinsælir fyrir skólahópa og hópeflisfyrirtæki en við erum með eitthvað efni hér á Íslandi en mest í Evrópu og víðar. Erum einnig með okkar öpp sem heita TurfHunt og SmartGuide,“ nefnir Leifur. „Verkefnin okkar eru víða en hér á Íslandi er til að mynda leiðsögn í Landnámssetrinu hér í Borgarnesi og Eldheimum í Vestmannaeyjum en það er ansi stórt safn sem mjög margir Íslendingar hafa heimsótt og þekkja. Svo er það heimsþekkt líka með tugi þúsunda ferðamanna og leiðsögn um útilistaverk í borginni á vegum Listasafns Reykjavíkur. Svo eru minni aðilar hér á landi sem koma í styttri eða lengri tíma eins og skólar og rútufyrirtæki,“ segir Leifur.

*Starfsfólk Locatify árið 2013 þegar Locatify var með aðsetur hjá Nýsköpunarmiðstöð Íslands við Lækjargötu í Reykjavík. Ljósm. lbb.*

Sex manna kjarnateymi

Sex starfa hjá Locatify en oft koma verktakar að auki að einstaka verkefnum. „Við erum með sex manna kjarnateymi sem vinnur hjá Locatify. Við erum tvö hér á Íslandi og svo eru tveir í Túnis, einn á Spáni og einn í Kína. Allt þetta fólk hefur verið á Íslandi og unnið með okkur hér og síðan haldið áfram að vinna með okkur eftir að það flutti til síns heima,“ nefnir Leifur en bendir á að það séu mörg spennandi verkefni í gangi hjá fyrirtækinu. „Það er alltaf eitthvað í gangi hjá okkur en eins og stendur er ekkert nýtt verkefni í gangi fyrir íslenska viðskiptavini en við erum að vinna að stóru verkefni í Þýskalandi fyrir fyrirtæki sem gerir bæði leiðsagnir og ratleiki um Þýskaland. Einnig erum við með annað verkefni í gangi í Hollandi fyrir endursöluaðila þar en í Hollandi erum við með marga viðskiptavini,“ segir Leifur.

Byggja upp hóp viðskiptavina

Að lokum forvitnast blaðamaður um hvernig þróunin hafi verið á fyrirtækinu síðan 2009 og hvernig Leifur sjái fyrirtækið á næstu árum. „Við erum að fá stöðugri tekjur sem byggja frekar núna á áskriftum viðskiptavina sem nota kerfið okkar til að gera út leiðsagnir og ratleiki í staðinn fyrir að vera mest að fá tekjur af einstaka verkefnum. Við erum að þróa öppin okkar frekar með viðbættum veruleika sem fer í prófanir hjá völdum viðskiptavinum í vor. Við byggjum bara hægt og rólega upp góðan hóp viðskiptavina í gegnum grasrótina. Við rekum þetta sem svona lífstílsfyrirtæki og erum ekki með neina fjárfesta í þessu og samkeppnin er bara holl og viðráðanleg,“ segir Leifur að lokum.