Alvarleg truflun varð á raforkudreifingu í landinu um klukkan 20 í kvöld þegar bilun varð hjá Norðuráli á Grundartanga. Steinunn Þorsteinsdóttir upplýsingafulltrúi Landsnets sagði í samtali við fréttastofu RUV nú klukkan tíu að af einhverjum orsökum hafi átt sér stað háspennutruflun og gríðarstórt högg komið á dreifikerfið. Steinunn sagði að þegar þetta gerist taki varnir við og skipti landinu í tvo hluta. Höggið olli hins vegar skammvinnu rafmagnsleysi og flökti víða. Á Vestfjörðum hafi varaafl verið virkjað. Höggið sem um ræðir þegar Norðurál leysti út er gríðarlega mikið, eða allt upp í 700 megavött, að sögn Steinunnar, jafnvel meira en orkuframleiðsla Kárahnjúkavirkjunar.