Rætt við fjallaleiðsögufólkið og frumkvöðlana Pál Einarsson og Agnesi Hjaltalín Andradóttur um útivistarmöguleika í Borgarnesi

Verkefnið Úti er ævintýri hlaut einnar milljónar króna styrk úr Uppbyggingarsjóði Vesturlands við síðustu úthlutun. Verkefnisstjórar eru þau Páll Einarsson og Agnes Hjaltalín Andradóttir í Borgarnesi. Saman hafa þau staðið fyrir útivistarkennslu í Borgarnesi undanfarin misseri, þar á meðal fjallamennskuáfanga í Menntaskóla Borgarfjarðar og umsjón ungliðasveitarinnar Glanna. Blaðamaður Skessuhorns hitti á þau í fyrrverandi húsnæði björgunarsveitarinnar Brákar í Brákarey.

*Nemendur úr fjallamennskuáfanga MB á Sólheimajökli.*

Prófa klifurvegginn

Við göngum inn í gamla tækjasal björgunarsveitarinnar og gamli klifurveggurinn er farinn að taka á sig mynd. „Við erum að byggja upp klifurvegginn og stefnum á að nýta hann í námskeið og þjálfun, jafnvel halda viðburði eða reglulega æfingatíma þar sem fólk getur komið og prófað,“ segir Páll en þau fengu styrk frá Erasmus til að kaupa útivistar- og klifurbúnað og þannig hófst verkefnið. „Við erum nú þegar komin með helling af búnaði sem við notuðum t.d. í klifurnámskeið í sumar. Þetta er mest klifurbúnaður en í raun er hægt að nota búnaðinn til að fara út í náttúruna og gera hvað sem er,“ segir Agnes.

*Klifrað í klettum við íþróttasvæðið í Borgarnesi.*

Krakkarnir elskuðu þetta

Blaðamaður treystir sér ekki í klifur þennan dag en hugsanlega mætir hann í framtíðinni. En hvernig voru móttökur við þessum fjallamennskuáfanga? „Það gekk ótrúlega vel og krakkarnir virtust mjög ánægðir,“ segir Páll. Þau voru einnig með námskeið á smiðjuhelgi í Grunnskólanum í Borgarnesi og eitt námskeið fyrir vinnuskólann. „Okkur þykir þetta ótrúlega gaman, sérstaklega að sjá krakkana njóta sín í nýjum aðstæðum,“ segir Agnes. „Við ætlum að vera með námskeið í sumar á vegum vinnuskólans en einnig ætlum við vonandi að halda eitt námskeið á okkar vegum líka,“ segir Páll.

Nóg til af klettum hérna

Páll nefnir að þau langi til að skoða hvort að þetta sé eitthvað sem gæti virkað. „Það er um að gera að fjölga afþreyingarmöguleikum á svæðinu. Bæði fyrir Borgnesinga og til að hvetja fólk til að koma í Borgarnes, bæði nærsveitunga og ferðamenn,“ segir Páll og bætir við. „Svo höfum við verið að skoða að verða með hópefli fyrir vinnustaði. Það gæti t.d. verið klettaklifur eða fólk gæti prófað að síga. Það er nóg til af klettum hér í bænum og er Borgarnes kjörinn bær fyrir svona starfsemi,“ segir Páll. Styrkurinn sem þau fengu frá Uppbyggingarsjóði Vesturlands er fyrir gerð viðskiptaáætlunar og markaðssetningar svo að þau geta vonandi haldið áfram að vinna við það sem þeim þykir skemmtilegast.

*Agnes að síga niður frá bæjarskrifstofu Borgarbyggðar.*

Góð forvörn og nýjar áskoranir

Agnes og Páll eru sammála um að varla sé hægt að finna heilbrigðari afþreyingu. „Þú lærir mjög mikið á því að vera í klifri og útivist, það er adrenalín fyrir krakka sem vilja prófa eitthvað nýtt, nýjar áskoranir og stundum hentar kennslustofan ekki,“ nefnir Agnes og Páll bætir við. „Þetta er frábær forvörn fyrir ungt fólk. Oft geta líka krakkar sem passa ekki inn í fótbolta eða körfubolta fundið sig í klifri. Okkur langar til að byggja upp klifursvæði í Borgarnesi og bjóða upp á kennslu fyrir fullorðna og ungmenni.“

Miklir möguleikar

Páll þekkir vel til í Borgarnesi en hann er fæddur og uppalinn Borgnesingur. Agnes kemur frá Reykjavík en hefur búið í Borgarnesi undanfarin þrjú ár. „Við sjáum fyrir okkur að þetta gæti verið góð leið fyrir fólk sem er ekki héðan að komast inn í samfélagið. Ég veit um fullt af fólki sem er að leita að einhverju nýju og spennandi að gera hér á svæðinu. Þá sérstaklega úti og klifur er tilvalið. Hingað til höfum við verið að setja upp tímabundnar klifurleiðir hér og þar í Borgarnesi fyrir krakkana, en það væri frábært að geta verið með alvöru klifursvæði í bænum,“ nefnir Agnes. „Það er fullt af ósnertum grænum svæðum í Borgarnesi þar sem hægt er að gera eitthvað skemmtilegt. Það eru miklir möguleikar fyrir útivist hér í Borgarnesi og okkur langar til að ná að virkja það og ýta undir að hér verði útivistarsamfélag,“ segir Páll.

Vilja byggja upp öflugt útivistarsamfélag

Rætt við fjallaleiðsögufólkið og frumkvöðlana Pál Einarsson og Agnesi Hjaltalín Andradóttur um útivistarmöguleika í Borgarnesi

Rætt við fjallaleiðsögufólkið og frumkvöðlana Pál Einarsson og Agnesi Hjaltalín Andradóttur um útivistarmöguleika í Borgarnesi