Hans klaufi heilsar upp á fólk í Þinghamri

Leikdeild Umf. Stafholtstungna frumsýndi leikritið Hans klaufa síðastliðinn sunnudag fyrir fullum sal áhorfenda á öllum aldri. Margir kannast við gamla ævintýrið um Hans klaufa, sem var einfeldningur, en þó skarpari en flestir hnífarnir í skúffunni. Verkið, sem sett er á svið í félagsheimilinu Þinghamri í Stafholtstungum byggir á þeirri persónu þótt farið hafi verið skapandi höndum um söguna. Leikritið er eftir Leikhópinn Lottu sem notfærir sér nokkur þekkt ævintýri til að segja skemmtilega sögu þar sem aðalpersónan heitir einmitt Hans og er kallaður klaufi. Farið er víða í verkinu og ýmis alþjóðleg sagnaminni notuð, svo sem sagan af Öskubusku og prinsessunni og froskinum. En þær Ása Signý og Helga koma líka ósjálfrátt upp í huga þeirra sem þekkja íslensk ævintýri. Úr þessum litríka efniviði hefur orðið til splunkunýtt ævintýri sem bæði hentar börnum og fullorðnum, hér túlkað af Tungnafólki og nærsveitungum og leikstýrt af Gunnari Gunnsteinssyni.

Verkið er nokkuð flókið þótt það virðist einfalt. Ekki síst má þar nefna bæði dans og söng, sem leikhópurinn veldur af mikilli prýði. Hann samanstendur af áhugasömu fólki úr nærsveitunum, en auk hans má ekki gleyma baklandinu; svona sýning sprettur ekki upp af engu. Leikmyndin er vel nýtt og mjög flott og búningarnir líka auk þess sem bæði lýsing og hljóð komu vel út. Leikendur eru skýrmæltir og skila sínum hlut vel og áberandi er hversu vel hefur verið valið í hlutverkin. Þar rís sjálfur Hans klaufi hátt og segja má það sama um önnur meginhlutverk. Það er ljóst að að baki svona uppsetningu liggur gríðarleg vinna sem margar hendur hafa komið að. Sú samstaða sveif sannarlega yfir vötnunum á frumsýningunni og skapaði andrúmsloft sem gott var að upplifa. Blaðamaður Skessuhorns mælir heilshugar með því að fólk hverfi úr amstri dagsins yfir í heim ævintýranna með Leikdeild Umf. Stafholtstungna. Næsta sýning er að óbreyttu 16. mars kl. 17:00 eins og sjá má á tix.is.

Hans klaufi er fyrst og fremst skemmtilegt leikrit úr heimi ævintýranna, skreytt með dansi og söng. En þar má einnig finna boðskap um réttlæti og virðingu í samskiptum, auk mikilvægis þess að ganga vel um umhverfið og njóta náttúrunnar. Vitna má í orð leikstjóra í sýningarskrá: „Munum að vera góð hvert við annað – annars verður aftur leiðinlegt.“ Enda bendir verkið okkur á að gleðin felst oft í einfaldleikanum samanber þessa fallegu setningu í söngtexta: „Því bollur geta veröldinni breytt.“

Síðast en ekki síst ber að nefna sígilda minnið um baráttu góðs og ills. Á þeim tímum sem nú ríða yfir heimsbyggðina er gott að vita að hið góða getur sigrað að lokum.

*Leikendum var vel fagnað í lok frumsýningar.*

„Því bollur geta veröldinni breytt“

Hans klaufi heilsar upp á fólk í Þinghamri

Hans klaufi heilsar upp á fólk í Þinghamri