Rætt við Carlos Saavedra, knattspyrnumann og sparkboxara

Carlos Saavedra er spænskur knattspyrnumaður og þjálfari sem hefur leikið fótbolta á Íslandi undanfarin fimm ár. Hann hefur spilað með Skallagrími í Borgarnesi og er nú sömuleiðis einn af aðalþjálfurum liðsins. En í apríl á þessu ári mun Carlos berjast í MMA bardaga á Spáni svo blaðamaður Skessuhorns ákvað að grípa hann í spjall um væntanlegan bardaga.

Fótbolti alltaf fyrst

Carlos ólst upp á Gran Canary og hafði mikinn áhuga á fótbolta en byrjaði að æfa karate þegar hann var 15 ára. „Faðir minn sendi mig um sumarið til frægs karateþjálfara. Þessi þjálfari varð heimsmeistari fimm sinnum í karate og þar lærði ég íþróttina. Heima hjá mér var mjög eðlilegt að vera í bardagaíþróttum en ég varð fljótt þreyttur á karate, svo ég byrjaði í hnefaleikum og í MMA,“ segir Carlos. MMA er skammstöfun fyrir Mixed Martial Arts, það er bardagaíþrótt sem byggir á höggum og glímu, sem tekur til tækni frá ýmsum bardagaíþróttum víðsvegar að úr heiminum. „Ég tók þessu ekki mjög alvarlega þegar ég var yngri en ég tók fótbolta mjög alvarlega. Ég var góður leikmaður þegar ég var ungur og faðir minn bað mig að ákveða hvaða íþrótt ég vildi leggja mig allan í. Ég ákvað að fótboltinn kæmi alltaf fyrst en stundaði sparkbox í öðru sæti. Ég byrjaði í fyrstu keppni þegar ég var 18 ára í sparkboxi, hef unnið alla fimm bardaga, en íþróttin var alltaf næst fótboltanum,“ segir Carlos.

*Leikmaður og nú þjálfari Skallagríms í fótbolta. Ljósm. Skallagrímur.*

Til Íslands að spila fótbolta

Carlos gekk fyrst til liðs við Uppsveitir á Flúðum en flutti til Hamars í Hveragerði og lék einnig með Einherja í Reykjavík. „Ég kom hingað til Íslands til að spila fótbolta, það var líf mitt. Fótbolti var líf mitt, það var að lifa af en núna hafa hlutirnir breyst. Þegar síðasta tímabili lauk hjá Skallagrími ákvað ég að leggja meira í sparkboxið. Ég er með vinnu hérna, hús og allt sem ég þarf og er ekki svo háður fótboltanum. Hlutirnir hafa breyst og núna get ég æft meira í sparkboxi og æft fyrir MMA,“ segir Carlos. „Ég var að vinna á leikskólanum Klettaborg og ungu krakkarnir og foreldrar þeirra kenndu mér mikið í íslensku. En mig langar að læra meira, ég skil nokkur orð hér og þar en ekki 100% en vonandi kemur það,“ segir Carlos og hlær.

*Sigurvegari í sinni síðustu viðureign í sparkboxi. Ljósm. cs.*

Í 20. sæti á Spáni

Carlos átti að berjast í sparkboxi árið 2024 en andstæðingurinn hætti við bardagann. Hann er í 20. sæti í sparkboxi á Spáni og í 1. sæti á Gran Canary. Hann skrifaði undir samning um sparkbox-viðburð í apríl á þessu ári. „Framkvæmdastjórinn vildi hafa bæði MMA og sparkbox á þessum viðburði en ákvað svo að hafa bara MMA. Hann spurði mig hvort ég vildi berjast á þessum viðburði eða hvort hann ætti að finna annan bardagamann. Ég tók þá ákvörðun að segja já,“ segir Carlos og brosir. Allt frá því að spænski bardagamaðurinn Ilia Topuria varð fjaðurvigtarmeistari UFC hefur áhuginn á MMA aukist á Spáni. „Þessi viðburður í apríl verður stór. 15.000 manns verða á leikvanginum í Sevilla og það verður sjónvarpað um allan heim,“ segir Carlos.

Þjálfun í Reykjavík

Carlos er með blátt belti í brasilísku jujitzu og hefur verið að fara til Reykjavíkur að æfa fyrir bardagann. „Ég hef farið til Reykjavíkur, í MMA æfingaaðstöðuna, síðustu þrjár vikur. Ég er aðallega að æfa glímu í Reykjavík og hér í Borgarnesi æfi ég hnefaleika. Kjörstaðan væri sú að ég væri á Spáni til að æfa fyrir þennan viðburð en núna er ég kominn með góða vinnu hér í Borgarnesi og ég vil ekki yfirgefa það starf svo ég mun gera mitt besta til að vera eins undirbúinn og hægt er hér á Íslandi,“ segir Carlos. En hver verður með honum á viðburðinum? „Fjölskyldan mín mun koma frá Gran Canary, ég mun hafa þjálfarann minn í mínu horni og Declan Redmond verður aðstoðarmaður hans. Ef allt gengur vel á þessum viðburði get ég klifrað ofar á stigalistanum, þannig að þetta er mjög spennandi tími fyrir mig,“ segir Carlos.

*Carlos og Declan þjálfarar sparkbox í Borgarnesi, í gömlu æfingaaðstöðunni út í Brákarey. Ljósm. kickboxing Borgarnes.*

Stofnaði sparkbox samfélag í Borgarnesi

Carlos og Declan byrjuðu á sparkboxi í Borgarnesi. „Við byrjuðum með fimm manns á æfingum en fljótlega fóru æfingarnar að spyrjast út og nú erum við 15 manns og það er mikill áhugi fyrir að ganga í samfélagið. Við erum með sex krakka sem eru líka að æfa en á meðan þessi litla líkamsrækt er mjög góð fyrir okkur erum við að skoða hvort við getum fundið aðeins stærra pláss fyrir íþróttina, til að þróa samfélagið og leyfa fleirum að prófa íþróttina,“ segir Carlos. „Við erum með 2-3 æfingar í viku en stundum er erfitt að þjálfa, með svo mikið af fólki í svo litlu plássi, en vonandi í framtíðinni verðum við í stærri líkamsræktarstöð með nóg pláss fyrir fólk til að æfa,“ segir Carlos.

Sex vikur

Bardaginn er eftir sex vikur frá því að þetta viðtal var tekið, Carlos hefur ellefu ára reynslu í sinni íþrótt og hann er á fullu að undirbúa sig. „Ég hef sex vikur núna til að verða betri. Ég er að vinna í glímunni en ég hætti að æfa glímu fyrir sex árum síðan svo ég á eftir að ná mér þar. Ég er að rifja upp það sem ég lærði í brasilíska jujitzu og ég mun bara verða betri,“ segir Carlos að lokum.

Fótbolti er ekki lengur í fyrsta sæti

Rætt við Carlos Saavedra, knattspyrnumann og sparkboxara

Rætt við Carlos Saavedra, knattspyrnumann og sparkboxara