Jörfi ehf – Pípu- og véltækniþjónusta kemur sér fyrir í Nesflóa

Við Nesflóa 1 á Akranesi er þessa dagana nýtt fyrirtæki að koma sér fyrir og hefja starfsemi í 550 fermetra rými í nýbyggðu iðngarðahúsi. Þrjú bil í húsinu verða lögð undir starfsemina; eitt verður vélaverkstæði og svo verður fagmannaverslun í tveimur bilum í húsinu þar sem seldur verður ýmiss búnaður til innan- og utanhússlagna. Ísrör er birgi í öllu sem snertir utanhússlagnir en Hringás verður helsti birgi Jörfa í innanhússlögnum, búnaði og sérlausnum. Nýja fyrirtækið hefur fengið nafnið Jörfi ehf. og verður áhersla lögð á alhliða pípulagningarþjónustu ásamt véltæknilegri þjónustu og ráðgjöf fyrir viðskiptavini. Verslun með sérhæfða varahluti verður rekin í húsinu. Eigendur fyrirtækisins verða þrír og munu þeir allir standa vaktina; Óttar Þór Ágústsson, Bjarki Óskarsson og Einar Pálsson. Auk þess er Merkjaklöpp ehf, eigandi iðngarðanna, með eignarhlut í fyrirtækinu. Blaðamaður Skessuhorns kíkti fyrr í vikunni til þeirra félaga en þeir voru þá í óða önn að gera verslunina klára og undirbúa opnun. Boðsgestir mæta á föstudaginn en mánudaginn 10. mars verður svo verslunin formlega opnuð.

„Við eigendurnir erum með mikla reynslu á sviði pípulagna, vélvirkjunar og stálsmíði. Okkar plön snúast um að byggja upp stórt og öflugt fyrirtæki á okkar sviði,“ segir Óttar Þór Ágústsson framkvæmdastjóri. „Við verðum með vélaverkstæði og erum nú að bíða eftir að vélakosturinn komi í hús. Þá munum við selja vörur og þjónustu frá Hydroscand, sem eru glussafittings og slöngur í flestallar gerðir vinnnuvéla. Loks munum við bjóða upp á almenna þjónustu við pípulagnir; nýlagnir og viðhald, ásamt ráðgjöf til viðskiptavina um val á lögnum og búnaði sem hentar viðkomandi aðstæðum best. Þá erum við að setja upp fagmannaverslun á sviði pípulagna, búnaðar og sérlausna fyrir byggingariðnaðinn. Við munum taka að okkur viðgerðir og samsetningar á búnaði af öllum stærðum og gerðum, sinna viðhaldi og viðgerðum á vélbúnaði og tækjum ásamt sérhæfðri véltækniþjónustu, ástandsgreiningu, sérsmíði vélarhluta og dæluþjónustu,“ segir Óttar Þór framkvæmdastjóri. Hann segir að Jörfi ehf. muni veita ráðgjöf við val á búnaði og aðstoða viðskiptavini við að finna lausnir í samræmi við væntingar þeirra og þarfir. „Einnig höfum við sinnt almennri vinnu við lagnir og búnað veitufyrirtækja og erum með töluverða reynslu á sviði veitukerfa og í rekstri þeirra. Við munum til dæmis bjóða upp á fageftirlit og verkefnastjórnun í stærri og smærri verkefnum.

Nú í upphafi starfa sjö hjá Jörfa ehf. og mun starfsmönnum fjölga á næstu misserum að sögn eigendanna. „Við erum mjög spenntir að vera að hefja starfsemi og byggja upp nýtt fyrirtæki sem við vitum að þörf er á. Í raun erum við að bjóða þjónustu og vöruúrval í verslun sem ekki hefur verið til hér á svæðinu. Við erum í raun að gera þessar lausnir og þjónustu aðgengilegri hér á Akranesi og á Vesturlandi öllu,“ segir Óttar Þór.

Nýtt fyrirtæki að hefja starfsemi á Akranesi

Jörfi ehf - Pípu- og véltækniþjónusta kemur sér fyrir í Nesflóa

Jörfi ehf - Pípu- og véltækniþjónusta kemur sér fyrir í Nesflóa