Rætt við Sefo Jan eiganda veitingavagnsins Turkish kebab

Fyrir utan verslun Nettó í Borgarnesi hefur mjög svo bleikur vagn staðið síðustu mánuði. Tyrkneskur kebab heitir fyrirtækið og eigandinn, Sefo, var upptekinn við að afgreiða viðskiptavini þegar blaðamaður reyndi að panta sér mat og ná smá spjalli við Sefo.

Sefo og fjölskylda hans komu til landsins árið 2022 en áttu í vandræðum með að fá kennitölu. „Við bjuggum í Keflavík en áttum enga möguleika á að vinna eða leggja okkar af mörkum til samfélagsins. Við eigum þrjú börn og um leið og við fengum kennitölu skoðuðum við okkur um og ákváðum að flytja í Borgarnes. Við komum hingað í ágúst í fyrra og ég byrjaði með tyrkneska kebab vagninn í janúar. Konan mín hjálpar mér hérna í vagninum og krakkarnir okkar þrír eru í skóla; tvö á leikskóla og ein í gagnfræðaskóla,“ segir Sefo þegar hann er búinn að selja viðskiptavi mat.

Sefo segir að vagninn grípi athygli bæði heimamanna og ferðamanna, vegna hins skæra litar. „Ég keypti þennan vagn en þetta var húsbíll. Ég breytti honum sjálfur í þennan matarvagn, tyrkneskt kebab, sótti um og fékk leyfið. Ég byrjaði í janúar eins og áður sagði, sem var erfiður tími fyrir svona rekstur en Borgarnesingar og íbúar í kringum Borgarnes hafa verið frábærir að koma hingað til að prófa nýjan mat. Núna í febrúar hafa fleiri ferðamenn komið í mat og vonandi verður sumarið annasamt,“ segir Sefo.

Sem fyrr segir er vagninn staðsettur við Nettó í Borgarnesi. „Ég sótti um að hafa hann hérna í kannski tvo til þrjá mánuði og sjá svo hvernig allt gengur. Ef viðskiptin eru góð eftir þessa mánuði mun ég athuga hvort ég geti fengið lengra leyfi hér. Þetta er fallegt land, ég hef verið í Keflavík og ég hef séð hversu margir ferðamenn koma hingað til landsins. Í framtíðinni verður einn bleikur tyrkneskur kebab vagn í hverri borg á Íslandi,“ segir Sefo og hlær um leið og hann fer á fullt við að þjóna nýjum hópi viðskiptavina.

*Vagninn er með skemmtilega lýsingu á kvöldin. Ljósm. aðsend.*

Bleikur matarvagn vekur athygli í Borgarnesi

Rætt við Sefo Jan eiganda veitingavagnsins Turkish kebab

Rætt við Sefo Jan eiganda veitingavagnsins Turkish kebab