Breiðablik og ÍA mættust í 1. deild karla í körfuknattleik á föstudagskvöldið og var spilað í Smáranum í Kópavogi. Fyrir leik voru Skagamenn í toppsætinu með 28 stig eftir níu sigurleiki í röð en Blikar í því sjöunda með 16 stig eftir tap á móti Sindra í síðustu umferð.

Jafnræði var með liðunum fyrstu sex mínúturnar en í stöðunni 19:17 náðu heimamenn 8-0 áhlaupi og staðan 27:17. Gestirnir náðu síðan að klóra aðeins í bakkann og staðan var 29:24 fyrir Breiðablik við lok fyrsta leikhluta. Skagamenn komust yfir með þriggja stiga körfu frá Aroni Elvari Dagssyni eftir tæpan fimm mínútna leik í öðrum leikhluta, 38:41, og þeir héldu forystunni þar til Blikinn Alexander Jan Hrafnsson jafnaði metin með tveggja stiga stökkskoti. Staðan var því hnífjöfn eftir fyrri hálfleikinn, 51:51, og ljóst að áhorfendur sem fjölmenntu á leikinn áttu von á góðu í þeim seinni.

Blikar byrjuðu betur í þriðja leikhluta þó ekki væri munurinn mikill á milli liðanna og staðan 64:63 eftir rúmlega fimm mínútur. Spennan hélt áfram og vel var tekist á næstu mínúturnar og fyrir fjórða og síðasta fjórðung höfðu Skagamenn eitt stig í forskot, staðan 71:72. En í honum tóku þeir öll völd strax frá byrjun og skoruðu fyrstu níu stigin sem þýddi að staðan var allt í einu 71:81 eftir þriggja mínútna leik. Fyrstu stig heimamanna í fjórða leikhluta komu ekki fyrr en eftir tæpar fimm mínútur og þeir skoruðu ekki nema sjö stig til viðbótar. Skagamenn gengu á lagið og kaffærðu lið Blika á síðustu mínútunum þar sem Srdan Stojanovic fór fyrir sínum mönnum hjá ÍA en hann skoraði átta stig á þessum kafla og þar af tvo þrista. Lokatölur 80:99 ÍA í vil og tíundi sigurinn í röð í deildinni bláköld staðreynd sem er frábær árangur og er liðið á góðri leið með að tryggja sig upp í Subway deildina á næsta tímabili.

Kristófer Már Gíslason var stigahæstur hjá ÍA með 22 stig og Kinyon Hodges skoraði 20 stig, tók 8 fráköst og var með 9 stoðsendingar. Lucien Christofis skoraði 14 stig, Srdan Stojanovic 11 stig og Victor Bafutto skoraði 10 stig og hirti 12 fráköst. Hjá Breiðablik var Maalik Cartwright með 20 stig, Marinó Þór Pálmason var með 13 stig, Logi Guðmundsson með 12 stig og Veigar Elí Grétarsson með 11 stig.

Skagamenn hafa nú fjögurra stiga forystu á lið Sindra og Hamars, sem eru í öðru og þriðja sæti með 24 stig, þegar fjórar umferðir eru eftir af deildinni. Með sigri á liði Hamars í næstu umferð eru þeir komnir í mjög góða stöðu og þeir eiga síðan eftir leiki við Fjölni, Ármann og Selfoss.

Leikur ÍA og Hamars verður næsta fimmtudag í íþróttahúsinu við Vesturgötu og hefst klukkan 19.15.

Tíundi sigur Skagamanna í röð