„Þorðum ekki að draga úr síðasta rekkanum“ – sagði skipstjórinn á Lilju SH

Það var mikið um að vera í Rifs- og í Ólafsvíkurhöfnum í gær þegar bátar voru að koma að landi í blíðskaparveðri. Voru sjómenn í skýjunum yfir aflabrögðunum sem voru svo sannarlega með því besta sem gerist. Alfons Finnsson fréttaritari Skessuhorns fangaði stemninguna eins og sjá má í máli og myndum.

*Emil Freyr Emilsson við löndun úr Lilju SH.*

Línubáturinn Lilja SH var að landa hátt í 20 tonnum eftir eina lögn og var báturinn vel siginn þegar siglt var að landi. Emil Freyr Emilsson skipstjóri sagði í stuttu bryggjuspjalli að þeir hafi lagt níu rekka og þurft að skilja einn eftir þar sem ekki var þorandi að setja meira í bátinn. „Þetta var algjört ævintýri. Mest þorskur af stærstu gerð,“ sagði Emil þegar hann þeyttist á sínum ofurhraða við að húkka úr fiskikörunum milli þess sem hann ræddi við fréttaritara Skessuhorns.

Sama átti við um aðra línubáta sem lönduðu í gær. Þetta var allsstaðar mokafli. Dragnótbáturinn Hildur SH landaði 40 tonnum eftir daginn og var ýsa uppistaða aflans. Dragnótarbáturinn Esjar landaði 25 tonnum. Netabáturinn Bárður SH landaði yfir 50 tonnum í Rifi. Einnig settu línubátarnir Gullhólmi SH og Bíldsey SH í góðan afla. Gullólmi landaði 28 tonnum og Bíldsey 26 tonnum.

Í Ólafsvík voru handfærabátar með hálft þriðja tonn; allt flottan fisk. Guðlaugur Gunnarsson á Hilmi SH sagði að um 60% aflans væri þorskur sem væri yfir átta kílóum að þyngd. Línubáturinn Brynja SH var með fullfermi, eða 13 tonn á 32 bala. Sama mokið var á Indriða Kristins BA sem var með 18 tonn og Tryggvi Eðvarðs var með 20 tonn. Dragnótarbáturinn Hafdís landaði 21 tonni.

„Allt er gott þegar vel fiskast.“ Það orðatiltæki átti sannarlega vel við um aflabrögð báta í Snæfellsbæ í gær.

*Guðlaugur Gunnarsson á Hilmi að landa stórþorski í Ólafsvík.*

*Magnús Hafseinsson á handfærabátnum Kristborgu SH með góðan afla.*

Það var mikil bátaumferð í Ólafsvík í gær. Þarna mætast bátar með mikinn stærðarmun; línubáturinn Sverrir SH að koma að landi og netabáturinn Kap VE á leiðinni út eftir af hafa tekið kör og ís en að jafnaði landar Kap afla sínum í Grundarfirði á vetrarvertíð.

Þegar gamlir sjómenn eru hættir sjómennsku þá er Aðalsteinn Ólafsson ekki hættur veiðum. Hann veiðir bara af bryggjusporðinum um leið og hann fylgist með bátum og aflabrögðum. „Það er bara koli hjá mér núna,“ sagði Aðalsteinn og brosti. „En kolinn er afbragðs matur,“ bætti hann við.

*Línubáturinn Lilja SH kemur drekkhlaðinn að landi í blíðskaparverði á laugardaginn.*

Mokafli báta sem róa á Breiðafirði – myndasyrpa

„Þorðum ekki að draga úr síðasta rekkanum“ - sagði skipstjórinn á Lilju SH

„Þorðum ekki að draga úr síðasta rekkanum“ - sagði skipstjórinn á Lilju SH