medium

large

thumbnail

1536x1536

2048x2048

small

custom-size

Líf og fjör í Grundarfjarðarhöfn

Forsætisráðherra ætlar að rækta samband sitt við landsmenn

Skagakonur unnu Hauka í markaleik

Fyrsti sigur Skagamanna í Lengjubikarnum

Nóg að gera í viðhaldi vega

Sveitarfélög höfnuðu innanhússtillögu sáttasemjara – allar verkfallsboðanir standa

core/paragraph

Forsvarsmenn sveitarfélaga á Vesturlandi afhentu í gærkvöldi Kristrúnu Frostadóttur forsætisráðherra beiðni sveitarstjórna á Vesturlandi um neyðarfund og skipan viðbragðshóps vegna ástands í vegamálum í landshlutanum. Þar óska sveitarfélögin eftir fundi hið fyrsta með oddvitum ríkisstjórnarinnar og viðkomandi fagráðherrum, um skipan viðbragðshóps stjórnarráðsins um aðgerðir til að tryggja öryggi íbúa á Vesturlandi og annarra vegfarenda, svo ekki hljótist skaði á fólki og verðmætum og truflun á atvinnu- og mannlífi, eins og nú blasir við. Kristrún veitti bænaskjali þessu móttöku í lok almenns umræðufundar sem hún boðaði til í Alþýðuhúsinu í Borgarnesi.

Í umræðum um vegamál á fundinum í Borgarnesi sagðist Kristrún gera sér grein fyrir þeirri slæmu stöðu sem vegakerfið á Vesturlandi væri komið í. Fyrri ríkisstjórn hefði einfaldlega skilið eftir sig mikla innviðaskuld sem ný ríkisstjórn þyrfti að takast á við. Óskaði forsætisráðherra eftir því að nýtt fólk í embættum fengi smávegis tíma til að setja sig inn í málin og vildi þannig ekki lofa upp í ermina um tafarlausar úrbætur. „Gefið okkur smá tíma,“ sagði hún en dró ekki úr alvarleika þess að neyðarstig væri komið upp á vegum á ákveðnum svæðum, meðal annars vegna þungaflutninga vegna fiskflutninga, atvinnustarfsemi sem ætti þátt í að halda landinu í byggð. „Kröftugri atvinnustarfsemi fylgja þungaflutningar og aukið álag á vegakerfið. Hið opinbera hefur ekki fylgt þeirri þróun með nægilegu viðhaldi vegakerfisins og þá er komið að okkur að bregðast við því. Við þurfum að byggja upp innviði og erum komin á þann stað að ræða þarf gjaldtöku af umferð, öflun tekna til að mæta þeirri miklu uppbyggingu sem augljóslega þarf að eiga sér stað,“ sagði ráðherra.

Í bænaskjali sveitarfélaga kemur m.a. fram að stórfelldar bikblæðingar á síðustu vikum hafi bæst við afar bágborið ástand sem fyrir var á mörgum vegarköflum. Um þetta ástand hafi sveitarstjórnir á Vesturlandi ályktað ítrekað, jafnvel um árabil, auk þess sem það hefur verið stöðugt umfjöllunarefni á vettvangi Samtaka sveitarfélaga á Vesturlandi. „Lýsing á ástandi veganna hefur víða komið fram, m.a. í bókunum sveitarstjórna. Jarðsig og frostskemmdir hafa gert vegi óslétta yfirferðar, slitlag er gróft og bútakennt eftir áralangar holufyllingar, vegkantar eru víða brotnir og hafa gefið eftir á löngum köflum og víða eru vegir of mjóir. Á sumum stöðum er vatnsagi á vegi mikið vandamál,“ segir í bréfi sveitarfélaganna.

Þá segir í bænaskjali sveitarfélaga til ríkisstjórnarinnar að verulega aukin umferð á Snæfellsnesvegi 54 og Vestfjarðavegi 60 um Dalabyggð, þar á meðal stórauknir þungaflutningar á síðustu árum í tengslum við laxeldi og aðra þungaflutninga, sumar sem vetur, kallar á aukin framlög til vegagerðar, ekki síst til almenns viðhalds. Þó nýjar vegaframkvæmdir séu af hinu góða, þá má ekki gleymast að sinna þarf viðhaldi eldri vega. Í þeim liggja mikil verðmæti sem fara forgörðum, sé viðhaldi þeirra ekki sinnt.“

Páll S Brynjarsson framkvæmdastjóri SSV segir að ítrekað hafi fulltrúar sveitarfélaga á Vesturlandi og SSV fundað með ráðherra samgöngumála, þingnefndum, þingmönnum NV-kjördæmis og forráðmönnum Vegagerðarinnar um það ófremdarástand sem er í vegamálum á Vesturlandi, en án árangurs.

„Í raun og veru erum við búin að beita öllum ráðum til að ná eyrum fjárveitingavaldsins. Í kjölfar neyðarástands veganna sem kom upp í síðustu viku var ákveðið að fara þessa leið. Beinum erindinu beint til forsætisráðherra í ljósi hversu alvarlegt ástandið er. Það verður síðan að koma í ljós hvort brugðist verður við,“ segir Páll í samtali við Skessuhorn.

Fréttaveita Vesturlands

Vilja að neyðarhópur verði skipaður vegna ástands vega á Vesturlandi