Fjölmenni á opnum fundi í Borgarnesi

Mörgum er í fersku minni þegar Kristrún Frostadóttir, þá óbreyttur þingmaður Samfylkingarinnar, hóf fundaröð um landið í febrúar 2022. Þá þegar var hún farin að skipuleggja framboð sitt til formanns Samfylkingarinnar. Landsmenn þekkja svo framhaldið og nú í desember var hún orðin forsætisráðherra í nýrri ríkisstjórn Samfylkingar, Viðreisnar og Flokks fólksins. Síðastliðið fimmtudagskvöld hélt Kristrún síðan fyrsta fund sinn á landsbyggðinni í nýrri fundaröð sem hún hyggst halda mánaðarlega á ólíkum stöðum og viðhalda þannig beinu og milliliðalausu samtali við þjóðina. Hún kveðst komin á þessa fundi til að hlusta og heyra hvað brennur á fólki. Fundurinn í Borgarnesi var haldinn í Alþýðuhúsinu við Sæunnargötu í Borgarnesi. Samkomusalurinn stappfylltist af fólki og fjarri því að nema hluti gesta hafi verið tengdir flokki hennar. Þarna voru bændur, sveitarstjórnarfólk og fólk úr ýmsum stéttum og kimum þjóðlífsins. Blaðamaður Skessuhorns fangaði stemninguna.

Í upphafi máls kvaðst Kristrún vera mætt til að hlusta, hélt einungis örstutta opnunarræðu. Sagði þó í fáum orðum frá verkefnum nýrrar ríkisstjórnar; m.a. glímunni við háa vexti og neikvæða afkomu ríkissjóðs til margra ára. Kvaðst hún skilja vel óþreyju fólks eftir bættri afkomu en tók fram að rekstur þjóðarbúsins væri ákveðin jafnvægislist og það ætti eftir að finna rétta jafnvægið. Nú þyrfti einfaldlega að taka til í ríkisrekstri og ná stöðugleika eftir þung ár.

*Björg Ágústsdóttir bæjarstjóri í Grundarfirði vakti máls á vegaástandinu.*

Landbúnaðarmál fyrirferðarmest

Umræðan snerist fljótt um stöðu landbúnaðar enda voru margir bændur úr landshlutanum mættir á fundinn. Kristrún kvaðst taka kröfuna um fæðuöryggi landsmanna mjög alvarlega og að þær áherslu hefðu komið skýrt fram í stjórnarmyndun í desember. Rætt var um umdeilda tillögu um innflutning osta íblönduðum með pálmaolíu. Ráðherra sagði andstöðuna við málið vera meiri en hún hefði gert sér grein fyrir. Fram kom hjá bændum að ef slíkur innflutningur yrði leyfður jafngilti það að mjólkurframleiðsla á fjölmörgum kúabúum legðist af. „Ég vil ekki að ráðist verði í aðgerðir sem veikja stöðu bænda. Aðgerðir okkar eiga að snúast um að auka fæðuöryggi landsins og í raun bæta stöðu byggðanna,“ sagði Kristrún. Nokkrir bændur færðu málefni þeirra til umræðu á fundinum. Kristján Magnússon á Snorrastöðum sagði stöðu bænda grafalvarlega og sagði nauðsynlegt að stjórnvöld stæðu í fæturnar og styddu bændur. Spurði hvernig ráðherra vildi breyta íslenskum landbúnaði til að hann gæti náð sér á strik að nýju. Vísaði hann til þess að það kæmi spánskt fyrir sjónir að eitt fyrsta mál á málaskrá nýs þings væri að kynna frumvarp í þágu verslunareigenda um tolla sem heimiluðu innflutning á ostum blönduðum með pálmaolíu. Spurði hann um nýliðun og hvernig ætti að standa á bak við ungt fólk sem vildi hefja búskap. Sagði hann búvörusamninga lausa og að ríkisvaldið þyrfti að ganga að því samningsborði með opnum huga. Fleiri bændur tóku undir þetta. Einnig var rætt um frumvarp sem héraðsdómur dæmdi ólögmætt um sameiningu kjötafurðastöðva án aðkomu Samkeppniseftirlits. Eyjólfur Ingvi í Ásgarði benti á að andleg heilsa bænda væri slæm meðal annars vegna mikillar skuldsetningar þeirra. Jafnvel væru dæmi um að bændur hefðu þurft að taka börn sín úr framhaldsskóla þar sem þeir hefðu ekki efni á greiða með námi þeirra. Um landbúnað og stöðu bænda almennt sköpuðust talsverðar umræður á fundinum og tók Kristrún skýrt fram að hún væri meðvituð um að laga þyrfti kjör bænda.

*Það var þétt setið í Alþýðuhúsinu í Borgarnesi.*

Bryddað upp á ýmsu

Þá var á fundinum spurt út í fjölmörg önnur mál; meðal annars stöðu öryrkja og kosningarétt ungs fólks. Kristinn Jónasson bæjarstjóri í Snæfellsbæ ræddi um orkuverð út frá hagsmunum íbúa á köldum svæðum, en það væru um tíundi hluti þjóðarinnar sem kynda þarf hús með rafmagni. Raforkuverð hafi um áramótin hækkað um 23% og væri það mikið áhyggjuefni.

Samgöngumál voru ofarlega á baugi og afhentu fulltrúar sveitarfélaga á Vesturlandi bænaskjal til forsætisráðherra um tafarlausar úrbætur á vegum í landshlutanum. Kristrún þakkaði þeim erindið, kvaðst gera sér grein fyrir alvarlegri stöðu vega og að ný ríkisstjórn hefi tekið við mikilli innviðaskuld í því samhengi frá fráfarandi stjórn. (Vísast í aðra frétt hér á vefnum um það mál).

Þá var rætt um málefni sem tengjast barnavernd og þann mikla og fjölþætta vanda sem sveitarfélög standa frammi fyrir í ljósi þess hversu þungur þessi málaflokkur er orðinn. Ríkið hafi lokað heimilum sem gátu hýst börn í vanda og varpað vandanum yfir á sveitarfélög. Kristrún sagði að til að freista þess að leysa þau mál væri rýnihópur að störfum og nefnd ráðherra væri sérstaklega að skoða lausnir.

Óhætt er að segja að fundur Kristrúnar Frostadóttur hafi verið vel heppnaður og margmennur. Fyrst og fremst kvaðst ráðherra mættur til að hlusta enda voru mörg innlegg gesta spökuleringar um hvað gera mætti betur eða öðruvísi, fremur en að kallað væri eftir beinum svörum. Klappað var fyrir ráðherra í lok fundar og henni þakkað fyrir þetta beina og milliliðalausa samtal.

*Frænkurnar Lilja Rannveig Sigurgeirsdóttir og Kristrún Frostadóttir.*

*Kristrún ásamt hjónunum Ásu Baldursdóttur og Sveini G Hálfdánarsyni.*

Forsætisráðherra ætlar að rækta samband sitt við landsmenn

Fjölmenni á opnum fundi í Borgarnesi

Fjölmenni á opnum fundi í Borgarnesi