medium

large

thumbnail

1536x1536

2048x2048

small

custom-size

Líf og fjör í Grundarfjarðarhöfn

Forsætisráðherra ætlar að rækta samband sitt við landsmenn

Skagakonur unnu Hauka í markaleik

Fyrsti sigur Skagamanna í Lengjubikarnum

Nóg að gera í viðhaldi vega

Sveitarfélög höfnuðu innanhússtillögu sáttasemjara – allar verkfallsboðanir standa

core/paragraph

Á lóðinni Skógarlundi 42 á Akranesi hefur undanfarna mánuði verið í gangi bygging sex íbúða kjarna fyrir fólk með fötlun. Húsið stendur nú ríflega fokhelt næst þjóðveginum og er það fyrsta sem rís í nýju íbúðahverfi. Verkefnið er í höndum einkaaðila undir merkjum Leigufélagsins Brúar hses. Það þýðir að byggingarformið er svokallað húsnæðissamvinnufélag og er með aðkomu bæði Akraneskaupstaðar og Húsnæðis- og mannvirkjastofnunar (HMS). Á bak við Brú er sami byggingaraðili og kom að Leigufélagi aldraðra hses. sem byggði nokkur óhagnaðardrifin fjölbýlishús, m.a. við Dalbraut 6 á Akranesi. Það félag fór í lok síðasta árs í þrot og í kjölfar nauðasamninga keypti Brák íbúðafélag hses. húsin. Verktakar sem komu að byggingu fjölbýlishússins við Dalbraut 6 eiga enn eftir að fá hluta reikninga sinna greidda.

Svo virðist sem framkvæmdum á byggingarstað við Skógarlund 42 hafi skyndilega verið hætt í vetur og liggur húsið greinilega undir skemmdum, samanber meðfylgjandi myndum sem teknar voru í gær. Samkvæmt heimildum Skessuhorns hefur vatn lekið inn í húsið og skemmt þar einangrun og byggingarefni. Þakefni fauk af í hvassviðri í byrjun mánaðarins og á því vatn greiða leið inn í hálfbyggt húsið eins og ástand þess er nú.

Bæði bæjarráð Akraneskaupstaðar og velferðar- og mannréttindaráð bæjarins hafa lýst áhyggjum sínum yfir stöðu verkefnisins. Í bókun velferðar- og mannréttindaráðs frá síðasta þriðjudegi er óskað eftir því að hafinn verði undirbúningur að uppbyggingu nýs íbúðakjarna í ljósi þess að skortur er á búsetuúrræðum fyrir fólk með fötlun. Óskar ráðið eftir að hafið verði samtal við samstarfsaðila um slíka uppbyggingu. Ráðið óskaði jaframt eftir því við skipulags- og umhverfissvið að fundin verði hentug lóð fyrir nýjan íbúðakjarna. Í bókun bæjarráðs frá 13. febrúar um málið er áherslu lögð á mikilvægi samvinnu Húsnæðis- og mannvirkjastofnunar og Akraneskaupstaðar í málinu og að hagsmunir ríkis- og sveitarfélagsins verði tryggðir m.t.t. til fyrirliggjandi stofnframlaga sem og hagsmunir þeirra skjólstæðinga kaupstaðarins sem íbúðakjarnanum var ætlað að þjóna. „Upphafleg markmið byggingaraðila voru þau að íbúðakjarninn væri tilbúinn á síðasta ári en sem stendur er með öllu óljóst hvort verkefnið raungerist,“ segir í bókun bæjarráðs. Stofnframlag Akraneskaupstaðar vegna verksins var samkvæmt samningi 54 milljónir króna og fólst í að bærinn lagði til lóð og tilheyrandi byggingarleyfisgjöld vegna hússins.

Haraldur Benediktsson bæjarstjóri staðfestir í samtali við Skessuhorn að þarna sé í gangi framkvæmd á vegum Leigufélagsins Brúar hses. sem er að byggja íbúðakjarna sem íbúðaúrræði fyrir fatlaða einstaklinga. „Akraneskaupstaður hefur lagt félaginu til, ásamt HMS, stofnframlag til uppbyggingar á íbúðakjarnanum. Leigufélagið Brú hses. uppfyllti kröfur um óhagnaðardrifna starfsemi og því var ráðist í þetta verkefni. Framkvæmdir við húsið hafa nú verið stöðvaðar af hendi byggingaraðilans. Ábyrgð á húsinu og framgangi verksins er alfarið á hans hendi, enda er Brú hses. skráð eigandi þess. Akraneskaupstaður hefur verið í samstarfi við HMS um stöðu og framvindu verksins og byggingafulltrúi gerði sjónmat á ástandi þess 4. febrúar síðastliðinn,“ segir Haraldur.

core/image

<figure class="wp-block-image size-large is-style-default"><img src="https://umsjon.skessuhorn.is/wp-content/uploads/2025/02/Bygging-ibudakjarna-strand-og-husid-liggur-undir-skemmdum_2-1200x800.jpg" alt="" class="wp-image-88428"/><figcaption>Þakpappi á húsinu fauk af í rokinu 5. febrúar síðastliðinn og á vatn greiða leið inn í húsið.</figcaption></figure>

Fréttaveita Vesturlands

Bygging íbúðakjarna strand og húsið liggur undir skemmdum