Bæjarstjóri Grundfirðinga skrifar opið bréf – ákall – til fjárveitingavaldsins

Björg Ágústsdóttir bæjarstjóri Grundarfjarðar birtir í gær opna færslu þar sem hún færir í tal bágt ástand vega á Snæfellsnesi. Fyrirsögnin er; „Snæfellingar hafa fengið nóg!“ Skrifar hún að ástand þjóðveganna hafi sjaldan verið verra. „Vegirnir eru okkar lífæðar, nauðsynlegir grunninnviðir svo við getum stundað vinnu, sótt skóla og tómstundir, ferjað fólk og vörur, flutt verðmætin sem hér verða til, nýtt okkur þjónustu sem komið hefur verið fyrir á höfuðborgarsvæðinu og margt fleira. Vegirnir eru okkar hreinu og beinu líflínur – þegar alvarleg veikindi eða slys verða og þegar líf okkar er í höndum vel þjálfaðs heilbrigðisstarfsfólks, góðra sjúkrabíla og viðeigandi búnaðar. Nema hvað að hér eru líflínur íbúanna hvorki hreinar né beinar – heldur vanhirtar og laskaðar. Slæmir og ónýtir vegir, holóttir, ósléttir, sem ata tjöru á bíldekkin, svo akstur verður hættulegur. Hvernig fer neyðarakstur fram á slíkum „vegum“,“ spyr Björg.

Umtalsvert tjón

„Flutningabílarnir, rúturnar, ungu ökumennirnir, heimafólkið, ferðamennirnir og við öll. Sum okkar þekkja holurnar og brotnu kantana, vitum hvar þarf að hægja á, passa sig – aðrir ekki. Íbúar hafa opnað myndaalbúmin sín uppá gátt. Fólkið sem ferðast á vegunum. Þetta eru ekki fallegar myndir, í okkar annars fagra, einstaka umhverfi. Fólkið okkar hefur þegar orðið fyrir umtalsverðu fjártjóni; bikaðir bílar, brotnar rúður, beyglaðar felgur. Tafir. Tjöruþvottur. Tjónaskýrslur. Sjálfsábyrgð. Þungatakmarkanir, sem þýðir minni farmur, sem þýðir fleiri ferðir, sem þýðir meiri kostnaður.“

Þá skrifar bæjarstjórinn að sé þörf á þrifum eða viðgerðum mæli Vegagerðin með að fólk leiti til fagaðila, og vísar hún þar til fréttatilkynningar Vegagerðarinnar í gær. „Fréttatilkynningu um „hættustig vegna bikblæðinga“ á vegunum okkar. Fólkið okkar veigrar sér við að vera á ferðinni, sleppir því að fara með bílinn í skoðun – eða sjálft sig, læknisferðir eru slegnar af. Það hafa ekki allir getu eða fjárráð til að verka bílana sína eftir svona ferðalag. Nóg var nú fyrir samt.“

Óhreinasta afurðir í olíufjölskyldunni

Björg skrifar að þessa dagana þurfi að hreinsa blæðandi bik af vegunum. „Tjöru, sem er óhreinasta afurðin í olíufjölskyldunni. Hún er bókstaflega skafin, mokuð, ýtt af vegunum og útí vegkanta. Fleiri hundruð tonn, hver veit, af efni sem klætt var yfir eða oní vegina fyrir örfáum mánuðum síðan. Og olían sem rennur í niðurföll bílskúra ásamt sprittinu sem losar hana af bílunum. Efni sem átti að haldast sem lengst og vinna sitt verk, við að líma saman vegyfirborðið. Umhverfisáhrif?“

Ástandið auglýsir sig sjálft

Þá skrifar Björg: „Hlutverk veganna er að þjóna samfélaginu og þörfum þess hverju sinni. Samfélagið hefur breyst, bílarnir hafa breyst – en vegirnir okkar hafa ekki fylgt þessum breytingum. Auðvitað viljum við ekkert auglýsa þetta of mikið, hampa veikleikum svæðisins sem setja mínus í bókhald búsetugæðanna, draga úr líkum á því að fólk vilji búa hér – treysti sér til þess. En það er löngu komið að þeim tímapunkti að ástandið auglýsir sig sjálft. Hrópar á athygli.“

Samgönguáætlun þarf að breyta

Björg skrifar að; „við skiptingu fjárveitinga skuli höfð hliðsjón af gerð vega, ástandi þeirra, notkun eða lengd eftir því sem við getur átt hverju sinni,“ og vísar þar í vegalög nr. 80/2007, 3. mgr. 16. gr. „Samgönguáætlun, sem reglulega skal endurskoða og ákveða fjármagn komandi ára, var lögð fyrir Alþingi 2023. Í 15 ára framkvæmdaáætlun, skipt í þrjú tímabil, voru áform um heilar 700 milljónir króna tímabilið 2024-28, til nýframkvæmda á öllu Vesturlandi, í eitt verkefni! Að vísu voru 1.950 millj. kr. áætlaðar til að endurgera 19 km vegarkafla (Brúarhraun-Dalsmynni) á Snæfellsnesvegi, þjóðvegi 54. Þó ekki á fyrstu fimm árunum, ekki heldur á þar næstu fimm árum, heldur á þriðja tímabili, árið 2034 eða síðar, átti að setja fjármuni í þennan bút. Nýframkvæmd á vegkafla, sem er orðinn svo hörmulega lélegur að það er ekki lengur hægt að lappa uppá hann, heldur þarf að vinna hann uppá nýtt, á árunum 2034-38. Tekur því að nefna aðra álíka slæma vegbúta Snæfellsnesvegar? Innviðaskuld og rúmlega það. Kannski sem betur fer, hefur þessi samgönguáætlun ekki ennþá farið í gegnum þingið. Henni þarf að breyta og við Snæfellingar sættum okkur aldrei við annað. Það er verk að vinna fyrir nýja þingmenn og ríkisstjórn.“

Álykta á öllum bæjarstjórnarfundum

Að endingu skrifar Björg að í mörg ár hafi bæjarstjórnir, einar sér og saman, rætt og ályktað um bágborið ástand þjóðveganna á okkar svæði. Bréf hafa verið skrifuð, fundir setnir, ástand metið, samtöl tekin, myndir birtar, fjölmiðlum svarað – og allt síðan endurtekið. „Bæjarstjórn Grundarfjarðarbæjar hefur ákveðið að álykta á hverjum einasta fundi sínum, þar til bragarbót hefur verið á þessu gerð. Ein ályktun er kannski ekki mikið, en það er yfirlýsing. Ákall. Um að fólkið sé búið að fá nóg.“ Að endingu segir Björg að erindi þetta eigi einkum erindi til þeirra sem útdeila fjármunum, forgangsraða ríkisframkvæmdum og bera ábyrgð á eignum ríkissjóðs; þ.e. okkar landsmanna.“

Segir að Snæfellingar hafi fengið nóg!

Bæjarstjóri Grundfirðinga skrifar opið bréf – ákall – til fjárveitingavaldsins

Bæjarstjóri Grundfirðinga skrifar opið bréf – ákall – til fjárveitingavaldsins