ÍA og KV áttust við í 1. deild karla í körfuknattleik á miðvikudagskvöldið og var leikurinn í íþróttahúsinu við Vesturgötu á Akranesi. Heimamenn voru fyrir viðureignina ósigraðir á heimavelli á öllu tímabilinu og höfðu unnið átta leiki í röð á meðan KV hafði aðeins unnið einn af síðustu sex leikjum sínum.

Gestirnir byrjuðu af krafti í leiknum og komust í 2:8 en Skagamenn tóku síðan við sér og komust yfir í fyrsta skipti í leiknum með körfu frá bakverðinum Kinyon Hodges þegar langt var liðið á fyrsta leikhluta, 17:16. Þegar honum lauk var ÍA með tveggja stiga forystu, 21:19, og allt í járnum. Miklar sveiflur voru í öðrum leikhluta, í stöðunni 27:26 fyrir ÍA náðu þeir 9-0 áhlaupi á tveggja mínútna kafla og staðan allt í einu orðin 36:26 en gestirnir úr Vesturbænum komu síðan til baka og aðeins fjórum stigum munaði á liðunum í hálfleik, staðan 46:42, ÍA í vil.

Þriðji leikhluti einkenndist af mörgum mistökum beggja liða og á köflum var eins og liðin gætu ekki komið boltanum ofan í körfuna. Um miðjan leikhlutann var staðan 53:52 fyrir ÍA en vendipunktur leiksins varð skömmu síðar þegar framherji KV, Friðrik Anton Jónsson, fékk sína fjórðu villu og Arnór Hermannsson liðsfélagi hans fékk tæknivillu í kjölfarið. Fyrir fjórða og síðasta fjórðung var staðan 64:59 ÍA í hag og þeir gengu síðan á lagið en eftir rúmlega sex mínútur voru þeir komnir með þrettán stiga forskot, 77:67, og lönduðu að lokum öruggum 15 stiga sigri, lokatölur 88:73.

Með þessum sigri tylltu Skagamenn sér á toppinn tímabundið en fjórir leikir verða í kvöld í deildinni og með sigri á Selfossi geta Hamarsmenn jafnað ÍA að stigum þegar 17 umferðir af 22 hafa verið spilaðar í deildinni í vetur.

Stigahæstur hjá ÍA var Kristófer Már Gíslason með 20 stig, Srdan Stojanovic skoraði 17 stig, Kinyon Hodges 16 stig og Victor Bafutto skoraði 12 stig og hirti 15 fráköst. Hjá KV var Friðrik Anton Jónsson með 24 stig, Lars Erik Bragason með 20 stig og Arnór Hermannsson með 18 stig.

Næsti leikur ÍA í deildinni er á móti Breiðabliki sem er um miðja deild og verður hann föstudaginn 21. febrúar í Smáranum í Kópavogi og hefst klukkan 19.15. Með sigri í þeim leik yrði það tíundi sigurleikur liðsins í röð í 1. deildinni sem er líklegast félagsmet. Stórleikur verður svo í næstu umferð þegar ÍA og Hamar mætast í sannkölluðum toppslag föstudaginn 27. febrúar á Akranesi.

Níundi sigur Skagamanna í röð