Forvitnast um líf og störf Guðnýjar Ernu Bjarnadóttur nýs lýðheilsufulltrúa Dalabyggðar

Dalabyggð auglýsti á síðasta ári stöðu lýðheilsufulltrúa sveitarfélagsins lausa til umsóknar. Umsækjendur voru níu talsins og var Guðný Erna Bjarnadóttir ráðin í starfið. Blaðamaður ákvað að heyra hljóðið í Guðnýju og forvitnast aðeins um starf hennar.

Kynnast öllu hægt og rólega

Guðný Erna segir að henni hafi verið vel tekið af fólkinu í Dölunum. „Þar sem ég hef bara verið hér í viku hef ég ekki kynnst mörgum en er að kynnast öllum hægt og rólega. Ég fékk að heilsa upp á elsta stigið í Auðarskóla fyrir helgi og hitti einnig starfsfólk skólans,“ nefnir Guðný. En er hún búin að koma sér fyrir í Búðardal? „Eins og staðan er núna er ég að leita að stað til að leigja í Búðardal eða nágrenni en á meðan fer ágætlega um mig á gistiheimilinu,“ segir hún.

Heja Norge!

Guðný er fædd og uppalin í Kópavogi en fjölskylda hennar flutti til Oslóar í Noregi árið 1998 þar sem móðir hennar var í námi og bjuggu þau þar í þrjú ár. Guðný flutti svo sjálf út til Noregs árið 2019. „Ég sótti um meistaranám í Lýðheilsuvísindum í Noregi, komst inn í háskóla í Kristiansand og hóf námið haustið 2019. Ári seinni varð ég svo ástfangin og er í sambúð með Ahmed mínum,“ nefnir Guðný. Hún er með B.Sc. gráðu í íþrótta- og heilsufræði frá Háskólanum í Reykjavík og meistaragráðu í lýðheilsuvísindum frá Universitetet i Agder í Noregi. Þegar Guðný kláraði B.Sc. gráðu frá Háskóla Íslands fór hún að skoða heiminn. „Ég hef alltaf haft gaman af því að ferðast, hvort sem það er innan- eða utanlands og fá að upplifa eitthvað nýtt. Ég fór að skoða heiminn með vinkonu minni eftir að ég lauk grunnnámi og fékk að kynnast ólíkri menningu og lífsstílum sem var frábær upplifun,“ segir Guðný.

Lýðheilsa

Lýðheilsa er samheiti yfir heilsuvernd og forvarnir. Lýðheilsustarf miðar að því að viðhalda og bæta heilbrigði fólks og byggist á samstarfi ólíkra fræðigreina og tekur meðal annars til félags-, umhverfis- og efnahagsmála. „Það sem er skemmtilegt við lýðheilsuna er hvað hún er víðtæk og kemur inn á margt í samfélaginu. Einnig er þetta nýtt starf hjá Dalabyggð og erum við öll að feta okkur áfram með að móta starfið og stefnuna. Með nánu samstarfi við sveitarstjórnina og íbúa Dalabyggðar tel ég að það muni komast á gott lýðheilsustarf fyrir íbúa,“ segir Guðný.

Eflir íþróttaiðkun og forvarnastarf

Ný íþróttamannvirki eru nú í smíðum í Búðardal og er stefnt á verklok í febrúar á næsta ári, en telur Guðný að starfsemi lýðheilsufulltrúa breytist með tilkomu íþróttamannvirkjanna? „Að einhverju leyti, það þarf að skipuleggja starfsemina þar en einnig tel ég að þetta muni efla íþróttaiðkun og forvarnastarf hér á svæðinu. Börn og ungmenni fái góða aðstöðu til að stunda sínar íþróttir og hægt verður að ræða heimsmálin í heitu pottunum,“ nefnir Guðný en hún sjálf æfði sund á sínum yngri árum. „Ég þjálfaði hjá Sundfélagi Hafnarfjarðar. Þar þjálfaði ég börn og ungmenni en var einnig með sundkennslu fyrir fullorðna sem voru ósyndir þegar þeir byrjuðu. Sumarið áður en ég flutti til Noregs vann ég á Heilsustofnuninni í Hveragerði sem íþróttafræðingur,“ segir Guðný.

Starfaði um tíma á Laugum

Nóg er af verkefnum hjá nýja lýðheilsufulltrúa Dalabyggðar. „Á þessari stundu er ég að kynnast fólki og félagasamtökum og starfsemi þeirra til þess að geta komið af stað samstarfi milli okkar. Einnig er verið að vinna hörðum höndum að því að koma félagsmiðstöðinni aftur af stað,“ nefnir Guðný.

Að lokum spyr blaðamaður Guðnýju um hvort hún eigi einhverjar tengingar í Dalina. „Ég á enga ættingja hér í Dölunum en gaman að segja frá því að ég vann tvö sumur á hótelinu á Laugum í Sælingsdal og kom oft í æfingabúðir í Sælingsdal með sundfélaginu. Ég hef alltaf notið þess að vera í Sælingsdal og þegar ég sá að það var verið að auglýsa eftir lýðheilsufulltrúa fyrir Dalabyggð var ég ekki lengi að hugsa mig um áður en ég sótti um starfið. Það að fá að vera hérna í ferska loftinu, fallega umhverfinu og fá að vinna við það sem ég brenn fyrir er algjör draumur. Ég er þakklát fyrir þetta tækifæri sem ég hef fengið til að vinna að bættum lífsgæðum íbúa Dalabyggðar. Ég er spennt fyrir komandi tímum og hlakka mikið til að kynnast íbúunum,“ segir Guðný að lokum.

*Guðný Erna Bjarnadóttir lýðheilsufulltrúi Dalabyggðar.*

Lýðheilsa er víðtæk

Forvitnast um líf og störf Guðnýjar Ernu Bjarnadóttur nýs lýðheilsufulltrúa Dalabyggðar

Forvitnast um líf og störf Guðnýjar Ernu Bjarnadóttur nýs lýðheilsufulltrúa Dalabyggðar