Skallagrímur tók á móti Þór frá Akureyri á föstudaginn í 16. umferð 1. deildar karla í körfubolta. Fyrir leikinn var liðið í neðsta sæti deildarinnar með 6 stig en Þór í sjötta sæti með 14 stig.

Heimamenn byrjuðu leikinn af krafti og ætluðu greinilega að selja sig dýrt í þessum leik. Liðið var reyndar án Luke Moyer en hann var veikur á bekknum. Magnús Engill kom heimamönnum í 16-14 með þriggja stiga körfu en þá tóku gestirnir frá Akureyri sig til og náðu 0-9 áhlaupi og virtust ætla að keyra yfir lið Skallagríms. Magnús Engill dró lið Skallagríms áfram og náðu heimamenn að minnka forystu gestanna fyrir leikhlutaskiptin. Staðan 27-29 fyrir Þór eftir fyrsta leikhluta.

Baráttan hélt áfram í öðrum leikhluta, þar sem Sævar Pálmason fór fyrir liði Skallagríms. Hann náði mikilvægum fráköstum og lék liðsfélaga sína uppi en allt var jafnt þegar leikhlutinn var hálfnaður, 39-39. Reynir Barðdal, leikmaður Þórs, sá til þess að gestirnir frá Akureyri kláruðu hálfleikinn vel og fóru þeir með 43-47 forystu inn í hálfleikinn.

Gestirnir opnuðu seinni hálfleik með snöggum fimm stigum og Pétur Már, þjálfari Skallagríms, þurfti að taka leikhlé. Skallagrímur náði að minnka muninn í fimm stig, 51-56 þegar um sjö mínútur voru eftir af þriðja leikhluta en þá settu gestirnir í fluggírinn og skoruðu 15 stig á móti tveimur frá heimamönnum. Staðan allt í einu orðin 53-71 og stemningin í Fjósinu lítil. En lítill neisti kom þegar leikmaður Skallagríms, Jermaine Hamlin, tróð boltanum og náðu heimamenn að laga stöðuna fyrir loka leikhlutann en staðan var samt 61-72 fyrir Þór frá Akureyri .

Jermaine Hamlin og Magnús Engill leikmenn Skallagríms byrjuðu loka leikhlutann vel og náðu heimamenn að minnka muninn í 72-74 þegar um sex mínútur voru eftir af leiknum. En gestirnir tóku þá við sér varnarlega og áttu heimamenn í mesta basli með að skora körfu á meðan bandaríski leikmaður Þórs, Tim Dalger, fór fyrir liði sínu. Hann náði að breyta stöðunni í 74-84 með góðum körfum og var einnig að finna liðsfélaga sína í opnum skotum og náðu gestirnir að halda í þetta tíu stiga forskot út leikinn. Lokastaðan í Fjósinu, 82-92 fyrir Þór.

Jermaine Hamlin var stigahæstur í liði Skallagríms með 26 stig en hann greip einnig 14 fráköst. Magnús Engill skoraði 24 stig. Í lið gestanna skoraði Reynir Barðdal 32 stig og Tim Dalger skoraði 25 stig.

Næsti leikur Skallagríms er í kvöld gegn Snæfell í Stykkishólmi og hefst leikurinn klukkan 19.15.

Skallagrímur tapaði níunda leiknum í röð