Stefnir á gestir taki með sér að minnsta kosti einn einhleyping og skilji eftir við innganginn!

Rithöfundurinn Sigrún Elíasdóttir mun halda viðburð í Borgarnesi á þessu ári. Tónleikar verða haldnir í tengslum við hljóðbókaseríu sem hún er að skrifa um þessar mundir og mun bera heitið Dagbók miðaldra unglings. Tónleikarnir munu bera nafnið Tinder tónleikar og fannst blaðamanni Skessuhorns áhugavert að heyra í Sigrúnu og forvitnast aðeins um þennan viðburð.

Frumskógur nútíma stefnumótalífs

Sigrún er rithöfundur með MA próf í sagnfræði og ritlist og hefur á undanförnum árum starfað við ritlist og haldið úti sagnfræði hlaðvarpinu Myrka Íslandi, ásamt Önnu Dröfn Sigurjónsdóttur vinkonu sinni. „Dagbók miðaldra unglings verður skáldskapur sem mun fjalla á spaugilegan hátt um líf fráskilinnar, miðaldra konu á Íslandi í leit að einhverju sem óvíst er hvað verður. Í leitinni að ástinni virðist vera sem þurfi meistaragráðu í „Tinderswæpi“ til að feta sig í gegnum frumskóg nútíma stefnumótalífs. Fyrsta serían verður gefin út af Storytel sumarið 2025 og ráðgert að allt að tvær aðrar geti fylgt í kjölfarið,“ segir Sigrún.

Talað mál og tónlist í bland

Viðburðurinn verður haldinn í Grímshúsi í Borgarnesi og fer Sigrún fögrum orðum um rekstraraðila staðarins. „Þau Hlynur og Sóley eru alltaf boðin og búin að taka þátt í alls konar skemmtilegum verkefnum til að halda menningarlífi Borgnesinga á lofti. En dagskrá viðburðarins verður skipt upp, þannig að helmingur verður talað mál mitt og hinn helmingurinn tónlist sem verður notuð til að koma því sem höfundur vill segja betur á framfæri. Næstum eins og söngleikur með tónlist úr ýmsum áttum. Engum dansatriðum verður þó lofað að svo stöddu en okkur langar til að sýna fram á hversu skemmtilegt það geti verið að blanda saman ólíku fólki og listformum,“ nefnir Sigrún.

Setur ábyrgð á tónlistarfólkið

Sigrún hefur fengið til liðs við sig þau Hönnu Ágústu Olgeirsdóttur söngkonu og Jón Sigurð Snorra Bergsson gítarleikari og söngvara. „Þau er bæði reyndar talsvert yngri og efnilegri en ég. En þau eru bæði ótrúleg fært tónlistarfólk og er það heiður að þau skuli vera tilbúin að verða með mér í þessu verkefni. Ábyrgð þeirra er reyndar mikil, þar sem þau munu sjá um söng, umsjón með útsetningu á tónlistinni, undirleik og reyna að fá rithöfund til að geta tjáð sig sæmilega í söng. Það er ekki útilokað að fleira fólk af svæðinu verði fengið til liðs við okkur í einhver hlutverk þegar nær dregur,“ segir Sigrún.

Tinder tónleikar

Blaðamaður forvitnast um hvort að þetta sé eingöngu ætlað einhleypu fólki, hvort að það verði sýnikennsla á forritið Tinder, fyrir, á meðan eða eftir tónleikana. „Nei, reyndar voru þeir ekki hugsaðir sem staður til að hitta aðra einhleypa, þótt það sé vissulega mjög góð hugmynd, sem eflaust er hægt að bæta á stefnuskrána. Að allir taki með sér að minnsta kosti einn einhleyping og skilji eftir við innganginn! Tónleikarnir gætu líka verið tilvalinn viðburður til að fara á fyrsta stefnumót með einhverjum nýjum. Og miðað við áhuga þeirra sem ekki eru einhleypir á þessu swæp líferni, væri kannski ekki úr vegi að taka létta sýnikennslu og vara við helstu mistökum sem fólk gerir í þessum heimi og hvernig best er að koma auga á vitleysinga og gerviprófíla,“ nefnir Sigrún í gríni, en bætir svo við: „Tilgangur tónleikanna verður nú aðallega að bjóða upp á afþreyingu á Vesturlandi. Dagskráin verður sett saman úr flutningi á dægurlögum og skemmtilegum frásögnum sem veita innsýn í tilhugalíf fólks á tímum stefnumóta appa, tímaleysis og frjálsra ásta. Nokkuð sem allir listamennirnir sem munu koma að verkefninu, hafa einhverja reynslu af,“ segir Sigrún og hlær.

„Stílfærðar sögur úr mínu lífi“

Sigrún segir það gefa auga leið að margt af efninu í Dagbók miðaldra unglings sé úr sínu lífi. „Þar eru stílfærðar sögur og hugmyndir úr mínu eigin lífi. Þótt aldrei ætti að taka rithöfund alveg á orðinu þar sem þeir eru jú atvinnu lygarar. Samt sem áður er líklegt að tónleikarnir verði talsvert persónulegir en gleðin á klárlega að vera í fyrirrúmi. Því ef ekki er hægt að hlæja að því sem miður fer, þá erum við illa stödd. Frásagnirnar eru vissulega miðaðar út frá reynsluheimi kvenna en sögurnar eru þær sem ég hef heyrt frá öðrum einhleypum konum í mínu umhverfi, bæði jákvæðar og neikvæðar. Alls staðar eru skrýtnar sögur að finna þar sem manneskjur koma við sögu og verður spennandi að miðla nokkrum þeirra á Tinder tónleikunum,“ segir Sigrún að lokum. Tónleikarnir eru fyrirhugaðir næsta haust en nánari tímasetning liggur ekki fyrir.

Ætlar að halda Tinder tónleika í Borgarnesi

Stefnir á gestir taki með sér að minnsta kosti einn einhleyping og skilji eftir við innganginn!

Stefnir á gestir taki með sér að minnsta kosti einn einhleyping og skilji eftir við innganginn!