Rætt við veitingamanninn Arnþór Pálsson um veitingastaðinn Skúrinn í Stykkishólmi sem nú nú kominn á sölu

Árið 2015 mættu Dunkin Donuts til landsins, kjúklingurinn kláraðist um tíma á KFC og kjötið kláraðist einnig um tíma á veitingastaðnum Metro. Þetta sama ár var opnaður nýr veitingastaður í Stykkishólmi, á gatnamótum Aðalgötu og Þvervegs, í fyrrum húsakynnum Verkalýðsfélags Snæfellinga. Þetta var veitingastaðurinn Skúrinn en Arnþór Pálsson og Sveinn Arnar Davíðsson ásamt konum þeirra, Þóru Margréti Birgisdóttur og Rósu Kristínu Indriðadóttur, stofnuðu fyrirtækið. Nú eru þáttaskil hjá fyrirtækinu, Skúrinn er nú auglýstur til sölu en veitingastaðurinn er nú til húsa á gömlu bensínstöðinni, Bensó, í Stykkishólmi. Blaðamaður ræddi við Arnþór Pálsson, betur þekktan sem Adda, um þessi áform.

Skemmtilegasta vinna sem ég hef haft

Arnþór er nýkominn af hádegisvakt þegar blaðamaður nælir í hann í smá spjall. „Við vissum ekki mikið þegar við byrjuðum í þessu fyrir tíu árum síðan en á þessum árum hef ég sjálfur þroskast miklu meira en þessi 28 ár þar á undan,“ nefnir Addi og heldur svo áfram: „Þetta er langskemmtilegasta vinna sem ég hef haft en að stofna fyrirtæki fyrir þrítugt og að læra á hvernig allt virkar, hefur verið þroskandi og gefandi. En þú þarft virkilega að vilja þetta, þarft að hafa gaman af þessu og hafa mikinn áhuga á mat. Við höfum verið það heppnir að við höfum getað prófað ýmislegt í gegnum árin, tekið þátt í matarmörkuðum og gert þetta á okkar forsendum,“ segir Addi.

Bestu vængir Íslands í korter

Addi og Svenni hafa leikið sér með ýmsar uppskriftir í gegnum árin. „Við höfum verið með Jólaóvissu þar sem við höfum prófað að útbúa alls konar hamborgara fyrir íbúa Stykkishólms. Við prófuðum að djúpsteikja Mars-bita og selja, við prufuðum að útbúa Donuts hamborgara, gerðum jólapizzu með grænum baunum og rauðkáli en svo byrjuðum við með kjúklingavængi á staðnum,“ nefnir Addi og brosir. Vængirnir á Skúrnum fengu mikla athygli, umfjöllun kom í bókinni Kokkál eftir Dóra DNA, mikil umræða hófst um að bestu vængir Íslands væru í Stykkishólmi og dómar á samfélagsmiðlum voru framúrskarandi. „En svo opnuðu félagar okkar veitingastaðinn Just Wing It, þeir Justin Shouse og Lýður Vignisson, og þá fórum við að einbeita okkur að öðru. Við vorum með bestu vængi á Íslandi í svona korter en þeirra vængir eru svaðalega góðir og erfitt að keppa við þá,“ segir Addi og hlær hátt.

Staðið vaktina

Frá opnun veitingastaðarins hefur ýmislegt gengið á utan þjónustulífsins. „Við höfum alveg á þessum árum gengið í gegnum margt í okkar persónulega lífi. Við höfum eignast börn, keypt og selt íbúðarhúsnæði og margt fleira. En eftir að við vorum búin að vera nokkurn tíma á Aðalgötunni með veitingastaðinn gafst okkur tækifæri á því að kaupa pizzastað sem staðsettur var við hlið Bónus hér í Stykkishólmi og við stukkum á það. Þá vorum við komnir með tvo staði sem var nokkuð erfitt, því það var erfitt að manna störf,“ segir Addi og heldur áfram: „Það var alveg mikið að gera á þessum tveimur stöðum og vorum við með gott starfsfólk. En svo kannski datt traffík á staðina niður í einhvern tíma og vorum við því að baslast í þessu tveir, annar okkar á Aðalgötunni og hinn á pizzastaðnum. Svo kom kvöld traffík á Aðalgötuna en þá þurftum við oft að vera tveir þar og þannig náðum við ekki að vera með pizzastaðinn opinn. Við fengum fyrirspurn um hvort að við vildum ekki færa okkur bara í eitt húsnæði, að leigja bensínstöðina undir allan reksturinn og við hlógum bara að þeirra hugmynd fyrst,“ segir Addi.

Sameinaðir kraftar

Eftir nokkra umhugsun og ráðleggingar tóku drengirnir þá ákvörðun að leigja bensínstöðina. „Það meikaði meira sens að hafa báða staðina í einu húsnæði og við gátum þá gert eldhúsið eins og við vildum hafa það. Gátum þá minnkað sveiflurnar í rekstri á milli sumars og veturs. Það komu nokkrar sveiflur yfir vetrarmánuðina, þá sérstaklega í janúar og febrúar þar sem fólk var mikið að taka mataræði í gegn hjá sér en við höfum ávallt staðið fyrir því að Skúrinn væri slæmur staður til að vera í megrun,“ segir Addi og skellir upp úr, áður en hann heldur áfram. „Við ætluðum að bjóða upp á heimilismat í hádeginu en við vorum búnir að vera með hádegismat frá upphafi og það hafði gefið okkur tækifæri á að vera með staðinn opinn yfir veturinn. Við vorum með hamborgara og pizzur einnig og náðum að klára allar framkvæmdir á nýja Skúrnum um haustið 2019. Við opnuðum með pompi og prakt um mánaðamótin október-nóvember en lokum svo í febrúar 2020 vegna Kovid,“ segir Addi.

Án Kovid væri maður ferskari

Arnþór segir að skrefið sem þeir tóku, að færa sig á nýjan stað hafi verið fínt. „Fyrirtækið stækkaði í grunninn um helming og ég held að án Kovid væri maður aðeins ferskari. Þá hefði maður ekki farið svona mikið niður andlega. En í grunninn lokuðum við aldrei í Kovid, við fylgdum öllum tilmælum, prófuðum að selja mat í gegnum gömlu lúguna en við vorum þá að taka á móti fimm gestum í hádegismat í stað 50 áður. Ég hef oft spáð í því að það hefði verið ódýrara fyrir okkur að loka bara alveg á þessum tíma. En við vildum þjónusta fólkið hér í Hólminum en það tók á,“ nefnir Addi.

Gera upp eftir Kovid

Arnþór og Sveinn Arnar ákváðu, í sameiningu við fjölskyldur þeirra, að þeir skyldu vinna sig út úr þeim erfiðleikum sem reksturinn var kominn í. „Ég var á þeim báti að annað hvort hætta þessu eða koma okkur upp úr þessu. Eftir að hafa rætt við fjölskyldur okkar ákváðum við Svenni að vera hér á staðnum, samfleytt í níu mánuði. Alla daga á vaktinni og slepptum við því flest öllum stundum með okkar fjölskyldum. Og við náðum að koma okkur upp úr þessum tíma,“ nefnir Addi. „En þessi Kovid tími var svo mikið alls konar. Ég fékk til dæmis ekki Kovid á meðan allir í minni fjölskyldu, Svenni og allir starfsmenn hér veiktust. Kannski ég hafi fengið þetta en aldrei komist að því, hver veit. En við duttum einhvers staðar á milli hjá ríkinu varðandi styrk. Ég og Svenni fengum borguð laun í tvo mánuði en svo sáum við fram á að geta borgað okkur laun svo að við spáðum ekki meira í það. En það er bara eins og það er,“ segir Addi.

Hægt að hafa reksturinn skipulagðari

Við erum komin á heimili Adda en kötturinn Snæbjört byrjar að væla um mat í dallinn sinn. „Ég veit alveg að það er hægt að gera reksturinn betri en það sem við erum búnir að gera. Ég viðurkenni það alveg að við erum ekki mikið í Excel-skjölum að fara yfir tölur og við erum ekki þessir týpísku viðskiptamenn eða Business-kallar. En við höfum alltaf haft gaman af því sem við höfum verið að gera og við höfum haft gaman að því að reka svona veitingastað í svona litlum bæ en ég held að við höfum náð að gera Skúrinn að einum umtalaðasta skyndibitastað á Vesturlandi og er hann örugglega með þeim vinsælustu,“ nefnir Addi þegar sonur hans gengur inn. „En það leiðinlegasta við það að stoppa er það að ég trúi að það sé hægt að gera þetta betur og stærra en eftir þessi tíu ár og Kovid, þá vantar allan neista í að gera meira. Ég finn að það er erfiðara að gera meira og væri það ósanngjarnt gagnvart fjölskyldum okkar að taka annan kafla eins og árið 2023, þar sem unnum í níu mánuði í röð. En ef einhver ferskur sér svona tækifæri á borðinu, þá er svo margt sem hægt er að gera. Hér er allt til alls á þessum veitingastað. Hér er hægt að byrja á núlli en samt með gott orðspor á bakinu og tækifærið er mjög gott,“ segir Addi og brosir en bætir við: „Þetta er auðvitað hlutlaust mat en ég er stoltur af að standa með þessu fyrirtæki okkar og langar mig til að þakka öllum þeim sem gert hafa sér ferð hingað til okkar á þessum árum,“ segir Arnþór að lokum.

*Arnþór og Sveinn tóku þátt í matarmörkuðum. Ljósm. þmb.*

Kovid er mjög stór þáttur í þessari ákvörðun

Rætt við veitingamanninn Arnþór Pálsson um veitingastaðinn Skúrinn í Stykkishólmi sem nú nú kominn á sölu

Rætt við veitingamanninn Arnþór Pálsson um veitingastaðinn Skúrinn í Stykkishólmi sem nú nú kominn á sölu