Snæfell tók á móti Selfossi í 1. deild karla í körfubolta á föstudaginn. Snæfell tapaði naumlega gegn Ármanni í umferðinni á undan á meðan Selfoss vann góðan sigur á Skallagrími. Því mátti búast við hörkuleik.

Fyrsti leikhluti einkenndist reyndar af töpuðum boltum hjá báðum liðum og þar af leiðandi mjög lágu stigaskori. Staðan eftir fyrsta leikhlutann var 15-14 fyrir Snæfelli en 11 tapaðir boltar voru samtals í leikhlutanum.

Gunnlaugur þjálfari hefur greinilega farið vel yfir hlutina í leikhlutaskiptum því að heimamenn fóru hamförum á fyrstu mínútum annars leikhluta. Snæfell fór á 11-2 áhlaup, með Matt Treacy sjóðandi heitan fyrir utan þriggja stiga línuna og gestirnir þurftu að taka leikhlé. Selfyssingar náðu að gera betur eftir leikhléið en heimamenn voru samt sem áður með þægilega forystu og fyrrnefndur Matt Treacy sá til þess að heimamenn fóru inn í hálfleik með 12 stiga forskot, 47-35.

Snæfell byrjaði seinni hálfleik af krafti sóknarlega og herti tökin varnarlega. Eyþór Lár Bárðarson kom stöðunni í 55-37 þegar þrjár mínútur voru liðnar af seinni hálfleik og var mikil stemning í Fjárhúsinu í Hólminum. Heimamenn gerðu vel í að halda þessari forystu en þeir fóru inn í lokaleikhlutann með 14 stig í plús, 70-56.

Gestirnir frá Selfossi mættu í lokaleikhlutann af krafti. Leiddir áfram af Ísak Perdue leikmanni Selfoss, náðu gestirnir 3-12 áhlaupi á fyrstu tveimur mínútunum. Um miðbik leikhlutans var staðan 79-74 fyrir Snæfelli og virtist sem spennandi föstudagskvöld væri framundan í Fjárhúsinu. En leikmenn Snæfells sýndu mikinn styrk með því að snúa leiknum sér í vil með 15-5 áhlaupi til að klára leikinn á síðustu fimm mínútum leiksins. Snæfell vann Selfoss, 94-79.

Matt Treacy var stigahæstur í liði Snæfells með 27 stig en Khalyl Waters var með 15 stig og tók 13 fráköst. Í liði Selfoss var Ísak Perdue stigahæstur með 16 stig og Skarphéðinn Þorbergsson skoraði 13 stig.

Næsti leikur Snæfells er gegn Sindra á Höfn í Hornafirði næstkomandi föstudag kl. 19.15.

Sterkur sigur Snæfells í Hólminum