Rætt við Sigurð Arnar Sigurðsson skólastjóra um uppbyggingu Grundaskóla á Akranesi

Það hefur vart farið fram hjá nokkrum manni sem fer um Jaðarsbakkasvæðið á Akranesi að mikil uppbygging hefur átt sér stað á skólahúsnæði Grundaskóla. Skólinn er einn fjölmennasti grunnskóli landsins með um 700 nemendur og um 130 starfsmenn í misstórum stöðugildum. Það má áætla lauslega að skólinn sé einn fjölmennasti vinnustaður sveitarfélagsins og hátt í 10% bæjarbúa er að störfum í skólanum þ.e. nemendur, starfsmenn og gestir.

Blaðamaður Skessuhorns kom við á skrifstofu Sigurðar Arnars Sigurðssonar skólastjóra Grundaskóla í síðustu viku sem leiddi hann stuttlega í gegnum allar þessar framkvæmdir sem hafa farið fram á síðustu árum. Sigurður Arnar segir að í upphafi skólaárs 2020-21 hófust umfangsmiklar rannsóknir á skólahúsnæði Grundaskóla vegna ítrekaðra athugasemda frá starfsmönnum og nemendum vegna margvíslegra óþæginda. „Akraneskaupstaður ákvað þá að ráða sérfræðinga frá verkfræðistofunni VERKÍS til að taka út húsnæði skólans. Upplýsingar bárust bæjaryfirvöldum snemma árs 2021 sem bentu til þess að umfangsmikill vandi væri til staðar í skólahúsnæðinu tengt loftgæðum og ýmsum nauðsynlegum viðhaldsframkvæmdum. Ítarleg skýrsla um málið var kynnt bæjarbúum í mars sama ár og í framhaldinu ákvað bæjarstjórn Akraneskaupstaðar að taka málin föstum tökum og ráðast í umfangsmiklar endurbætur og endurhönnun bygginga og voru arkitektar frá Andrúm arkitektastofu fengnir í verkið.“

*Sigurður Arnar Sigurðsson skólastjóri Grundaskóla.*

Unnið dag og nótt

Í byrjun september 2021 var haldinn opinn fundur fyrir alla bæjarbúa þar sem viðbrögð skólans og bæjaryfirvalda voru kynnt í ítarlegu máli. „Á þessum tíma hafði skólinn orðið fyrir hverju áfallinu á eftir öðru og nánast yfirgefið allt húsnæði sitt og starfaði skólinn í sjö til átta byggingum um allan bæ. Unnið var nótt og dag við að halda skólastarfi úti og fást við margvíslegan vanda. Í öllum fréttabréfum skólans og kynningu til foreldra var lagt upp með að allir horfðu fram veginn en ekki bara á vandamálin sem þó væru ærin. Þessi starfsmarkmið skólans hafa gengið eftir því þrátt fyrir ótrúleg vandræði með húsnæði hefur kennsla ekki fallið niður einn einasta dag. Markvisst var unnið með fjölmarga þætti sem skipt var upp í þrjú megin stig sem nægðu frá árinu 2021 allt til byrjun árs 2025.“

Stigin þrjú voru: Björgunaraðgerðir – flutningur, flokkun, sótthreinsun og eyðing, Fyrstu aðgerðir, ráðist skipulega í endurbætur og Langtíma hugsun, uppbygging og lausnir. Í maí 2022 fjallaði Skessuhorn um stöðu mála og ræddi þá m.a. við Sigurð Arnar. Á þeim tímapunkti var skólinn í miklum húsnæðishrakningum en í samtali við blaðið var enga uppgjöf að finna á honum þrátt erfiða stöðu. „Við vinnum eftir áætlun sem við erum mjög ánægð með,“ sagði skólastjórinn á þeim tíma.

Metnaðarfullt verkefni

Sigurður Arnar segir að nú í upphafi árs 2025 sé áhugavert að skoða stöðuna og kanna hvort öll þessi áform sem voru kynnt 2021 hafi gengið eftir. „Eins og sjá má þá hafa gríðarlegar framkvæmdir og endurbætur staðið yfir á liðnum árum. Grundaskóli býr reyndar enn við bráðabirgða húsnæði svo sem lausar kennslustofur en framkvæmdir eru komnar á lokastig og ný og glæsileg skólabygging að komast í notkun. Gert er ráð fyrir að nýbyggingin sem hýsir kennslustofur fyrir verk- og listgreinar, kennslustofur yngsta stigsins og starfsmannaðstöðu verði tekin í notkun nú í febrúar og öllum framkvæmdum verði að fullu lokið í byrjun skólaárs 2025-2026, þ.e. næsta haust. Þá er m.a. átt við nýja aðstöðu fyrir skólaíþróttir. Í endurreisnaráætlun sem kynnt var 2021 var lögð áhersla á í kynningu að endurbygging Grundaskóla væri metnaðarfullt verkefni þar sem horft væri til framtíðar í skólastarfi. Að Grundaskóli yrði í verklok allur hinn glæsilegasti. Skólastjórn Grundaskóla lagði hart að skólasamfélaginu að standa þétt saman í miklum vanda. Að allir legðust á eitt að hugsa ekki um mikinn vanda heldur miklu frekar hvert ætti að stefna, hvað væri hægt að gera í stöðunni og hvernig sterk liðsheild nægði mestum framförum.“

Sigurður Arnar nefnir að lokum að nú nálgast áformuð verklok á þessu risa verkefni og á næstu vikum verður ný C-bygging Grundaskóla opnuð á ný. „Skólinn hefur tekið ótrúlegum breytingum og er opinn og bjartur. Kennslustofum fjölgar og margvíslegar nýjungar teknar inn. Má í því sambandi benda á að tengt tónlist þá er gert ráð fyrir upptökuveri, aðstöðu fyrir útvarpsrekstur eða hlaðvarpsvinnu, aðstöðu fyrir kvikmyndagerð, klippiaðstöðu og upptökuver, nýjar og endurbættar matreiðslustofur, ný smiðja þar sem tækifæri gefst til að vinna með skartgripagerð, ljósmyndun og margt fleira. Í stuttu máli má segja að nýbygging er öll hin glæsilegasta. Arkitektar, framkvæmdaaðilar og skólafólk hafa tekið höndum saman að byggja upp glæsilega framtíðaraðstöðu fyrir skólann. Unnið hefur verið með endurhönnun á rými miðað við kennsluáherslur, hljóðvist og lýsing er góð auk loftræstikerfa af fullkomnustu gerð. Í stað nauðvarnar tengt húsnæðismálum árið 2021 blasa nú við fjölmörg sóknarfæri og það er bjart yfir skólastarfi Grundaskóla í upphafi árs 2025.“

Blaðamaður Skessuhorns fékk leyfi til að skoða sig um í C-byggingu Grundaskóla í síðustu viku og tók nokkrar myndir af framkvæmdum. Stefnt er að því að þegar verklokum lýkur verði bæjarbúum boðið í heimsókn til að skoða aðstöðuna.

*Á fyrstu hæð í opnu kennslurými sem nýtt verður fyrir þemabundna kennslu tengt ólíkum listgreinum.*

*Hér er inngangur að vinnusvæði á 2. hæð skólans.*

Á 2. hæð í opnu rými þar sem kennsla fer fram í svokölluðum Opna skóla. Opni skólinn er þróunarverkefni Grundaskóla og hefur vakið mikla athygli í skólakerfinu. Opni skólinn fékk m.a. veglegan styrk frá Sprotasjóði og þróunarsjóði Barna- og menntamálaráðuneytisins.

*Hér má sjá opið vinnurými stjórnenda og kennarateyma á 3. hæð skólans.*

*Þessi mynd er tekin við nýja kennslustofu á 1. hæð sem hýsir útvarpsaðstöðu Grundaskóla.*

*Ný kaffistofa starfsfólks og gesta verður á 3. hæð en í þessu rými verður rekin kaffitería og einföld mataraðstaða fyrir starfsfólk skólans.*

Að breyta áfalli í sóknarfæri

Rætt við Sigurð Arnar Sigurðsson skólastjóra um uppbyggingu Grundaskóla á Akranesi

Rætt við Sigurð Arnar Sigurðsson skólastjóra um uppbyggingu Grundaskóla á Akranesi