Snæfell í Stykkishólmi heimsótti Ármann í 1. deild karla í körfubolta í gær. Snæfell frumsýndi nýjan leikmann í leiknum en Matt Treacy var mættur í treyju númer 33. Ármann var fyrir leik í efsta sæti deildarinnar með 20 stig en Snæfell var í því ellefta með sex stig.

Mikil ákefð og barátta var í liði Snæfells frá fyrstu mínútu leiksins. Gestirnir komust í stöðuna 1-14 eftir um þriggja mínútna leik og var öll stemning Snæfells megin. Nýi leikmaður Snæfells kom inn í leikinn undir lok fyrsta leikhluta og setti strax tóninn með fráköstum og stemnings körfum. Snæfell leiddi eftir fyrsta leikhlutann, 17-30.

Heimamenn í Ármanni komu inn í annan leikhluta með meiri grimmd í varnarleik sínum og náðu fljótlega að koma muninum í 29-36 um miðbik leikhlutans. Góð hittni Snæfells í fyrsta leikhluta var fjarverandi í öðrum leikhluta og náðu Ármenningar að minnka muninn í þrjú stig fyrir hálfleik en Snæfell hélt inn í búningsklefa í stöðunni 38-41.

Snæfell leiddi áfram í byrjun seinni hálfleiks en þegar þriðji leikhluti var hálfnaður setti Adama Darboe leikmaður Ármanns niður þriggja stiga skot og kom Ármanni yfir í leiknum, 52-50. Gestirnir úr Stykkishólmi sýndu mikinn styrk með því að svara með rosalegu áhlaupi, 4-17, og fóru því inn í loka leikhlutann með 11 stiga forystu, 56-67.

Ármenningar voru snöggir að minnka muninn í 66-72 og Gunnlaugur þjálfari Snæfells þurfti að bregðast við með leikhléi. Aftur þurfti Gunnlaugur að bregðast við með leikhléi þegar Ármann komst yfir um miðbik leikhlutans, 73-72, og virtist sem allur vindur væri farinn úr leikmönnum Snæfells. Ármenningar náðu sex stiga forystu þegar um tvær mínútur voru eftir af leiknum, 85-79, en Snæfell minnkaði muninn í 85-84 með þriggja stiga körfu frá fyrrnefndum Matt Treacy þegar 50 sekúndur voru eftir. Ármenningar héldu í sókn og endaði hún með því að Frosti Valgarðsson skoraði þriggja stiga körfu og náðu gestirnir úr Stykkishólmi ekki að svara fyrir þessa körfu. Sigur Ármanns í hörku leik, 90-84 staðreynd.

Stigahæstur í liði Snæfells var Alejandro Rubiera með 21 stig og gaf hann sjö stoðsendingar. Khalyl Waters skoraði 20 stig ásamt því að rífa niður 14 fráköst. Juan Navarro skoraði 19 stig og Matt Treacy skoraði 15 stig.

Næsti leikur Snæfells er í Stykkishólmi gegn Selfossi en leikurinn verður föstudaginn 24. janúar.

Snæfell tapaði í hörkuleik í Höllinni