Samantekt af því helsta sem gerðist í íþróttum á Vesturlandi árið 2024 og fjallað var um á íþróttasíðum Skessuhorns á árinu. Boltaíþróttum hefur áður verið gerð skil á þessum vettvangi.

Íþróttamenn ársins valdir

Í byrjun ársins voru valdir þeir íþróttamenn sem höfðu skarað fram úr á Vesturlandi á árinu 2023. Anna María Reynisdóttir sem stundar blak var kjörin Íþróttamaður Grundarfjarðar, sundmaðurinn Einar Margeir Ágústsson var valinn Íþróttamaður Akraness, golfarinn Bjarki Pétursson var kjörinn Íþróttamanneskja Borgarfjarðar 2023, Arnar Geir Diego Ævarsson sem stundar skotfimi var kjörinn Íþróttamaður HSH og körfuknattleiksmaðurinn Aron Ingi Hinriksson var valinn Íþróttamaður Snæfells.

Einar Margeir bætti sig á árinu

Fyrri hluti Reykjavík International Games (RIG) var haldinn síðustu helgina í janúar en um var að ræða afreksíþróttamót þar sem keppt er í meira en 20 einstaklingsíþróttagreinum. Átta keppendur frá Sundfélagi Akraness tóku þátt í mótinu og var mótið mjög sterkt þar sem kepptu yfir 300 sundmenn frá tólf löndum. Einar Margeir Ágústsson náði lágmarki fyrir Evrópumeistaramótið í 50 metra laug sem fór fram í Serbíu í sumar. Hann sigraði í 50 metra bringusundi á tímanum 28.52, í undanúrslitum synti hann á 28.31 sem er nýtt Akranesmet og þriðja besta afrekið á mótinu. Einar Margeir sló þrjú Akranesmet; í 50m bringusundi á tímanum 28.31, í 50m skriðsundi á 23.72 og að lokum í 100m skriðsundi á 53.28. Einar Margeir gerði síðan góða ferð ásamt öðrum keppendum á Evrópumeistaramótið í sundi sem fram fór í Serbíu dagana 17.-23. júní. Keppt var í 50 metra útilaug og var hitinn um 30-36 gráður flesta dagana. Einar Margeir gerði sér lítið fyrir og bætti sig í öllum þremur sundum sínum og bætti Akranesmetið í þeim öllum. Þetta var annað Evrópumeistaramót Einars Margeirs en það fyrsta í 50m laug. Hann var meðal yngstu keppenda á mótinu og horft til aldurs voru fáir sem sýndu betri árangur en hann.

Sindri Karl sterkur í langlaupunum

Um miðjan febrúar fór fram MÍ innanhússmót í frjálsum í Laugardalshöll. Sindri Karl Sigurjónsson frá UMSB bætti þar aldursflokkametið í 3000m hlaupi í flokki pilta 15 ára. Hann hljóp á tímanum 9:40,81 mín en fyrra aldursflokkamet átti Fannar Blær Austar Egilsson (USÚ), á tímanum 9:45,55 mín. Það met var frá árinu 2007. Sindri Karl sló síðan um miðjan september 24 ára gamalt aldursflokkamet Kára Steins Karlssonar í 10 kílómetra götuhlaupi. Var þetta í annað skiptið sem Sindri sló metið en í fyrra skiptið var það dæmt ógilt. Nú kom hann í mark á 36 mínútum og þremur sekúndum, í vottuðu hlaupi og metið því hans.

*Ísak Birkir í öðru sæti á Íslandsmótinu í keilu*

Ísak Birkir varð í öðru sæti á Íslandsmótinu í keilu

Íslandsmót einstaklinga í keilu var haldið í byrjun mars og þar átti Keilufélag Akraness marga keppendur. Ísak Birkir Sævarsson komst í úrslit og þar af leiðandi í beina útsendingu á Stöð 2 Sport. Þar hófu þrír bestu leik og sá sem var lægstur lenti í 3. sæti. Ísak Birkir endaði í 2. sæti eftir frábæra spilamennsku. Þetta var þriðja Íslandsmótið á tímabilinu sem Ísak Birkir var í úrslitum, Íslandsmót para, Íslandsmót í tvímenningi og Íslandsmót einstaklinga. Um miðjan júlí spilaði Ísak Birkir á heimsmeistaramótinu í keilu fyrir leikmenn 21 árs og yngri. Spilað var í Suður-Kóreu og komu keppendur frá 39 löndum. Ísak Birki gekk vel í undankeppni og komst áfram í undanúrslit, þar sem hann vann tvo leiki af fimm og féll því úr keppni.

Íslandsmeistarar í 4. deild Blaksambands Íslands

Ungmennafélag Grundarfjarðar varð Íslandsmeistari í meistaraflokki kvenna í blaki. Lið Grundarfjarðar var í fjórðu deild þetta árið og var mótafyrirkomulagið þannig að spilaðar voru þrjár mótshelgar um veturinn. Síðasta mótahrinan var spiluð um miðjan mars og þar tryggðu grundfirsku stelpurnar sér Íslandsmeistaratitilinn og rétt til að spila í þriðju deild næsta vetur. Liðið fór taplaust í gegnum allt mótið sem var frábær árangur.

*Guðrún Karítas bætti Íslandsmet í sleggjukasti*

Guðrún Karítas bætti Íslandsmet í sleggjukasti

Guðrún Karítas Hallgrímsdóttir frá Vatnshömrum í Borgarfirði keppti í sleggjukasti á Bobcat Invitational í Texas, bandarísku háskólamóti í lok mars. Guðrún kastaði sleggjunni lengst 69,76 metra og sló þá Íslandsmet Elísabetar Rutar Rúnarsdóttur en fyrra metið var 69,11 metrar. Íslandsmetið stóð þó ekki lengi því Elísabet Rut svaraði með kasti upp á 70,33 metra og endurheimti því metið. Guðrún Karítas keppti síðan á Evrópumóti í frjálsum íþróttum í byrjun júní. Guðrún keppti í forkeppni í sleggjukasti en missti af úrslitasæti. Hún kastaði lengst 67,57 metra og hafnaði í 17. sæti. Guðrún Karítas og Elísabet Rut Rúnarsdóttir kepptu í sleggjukasti fyrir Íslands hönd á mótinu. Í lok júní var haldið Meistaramót Íslands í frjálsum íþróttum á Akureyri og tók Guðrún Karítas þátt á öðrum degi mótsins. Fyrir átti Guðrún mótsmet í sleggjukasti upp á 65,21 m. en það var slegið á mótinu því sigurvegarinn Elísabet Rut Rúnarsdóttir kastaði sleggjunni 68,70 m. Guðrún Karítas hafnaði í öðru sæti með kast upp á 67,12 m sem var persónuleg bæting.

Sundmenn ÍA stóðu sig vel

Gott gengi var hjá sundfólki frá ÍA á Íslands- og unglingameistaramótinu í sundi í 50 metra laug sem fram fór í Reykjavík um miðjan apríl. Kom hópurinn heim með Íslandsmeistaratitil, Akranesmet, fjögur silfur og 15 brons. Tíu sundmenn frá ÍA tóku þátt á mótinu en keppendur voru alls 183 frá 16 félögum. Bestum árangri náði Einar Margeir Ágústsson sem landaði Íslandsmeistaratitli í 50m skriðsundi. Einar vann einnig til silfurverðlauna í 50m bringusundi og 50m flugsundi. Tveir Íslandsmeistaratitlar, einn unglingameistaratitill og lágmark á HM var uppskera ÍA á Íslandsmeistaramóti aðra vikuna í nóvember en átta sundmenn frá ÍA tóku þátt. Á mótinu voru 174 keppendur frá 10 félögum. Samtals unnu Skagamenn þrjú gull, þrjú silfur og sjö brons.

*Stefán Bjarki Akranesmeistari í pílu 2024*

Stefán Bjarki Akranesmeistari í pílu

Akranesmeistaramótið í 501 í pílu var haldið um miðjan apríl í aðstöðu Pílufélags Akraness í gamla Sementinu við Mánabraut. Siggi Tomm, sem hafði sigrað á mótinu undanfarin ár, var fjarverandi vegna meiðsla í baki og var það skarð fyrir skildi en það þýddi að nýr sigurvegari yrði krýndur. Í undanúrslitum spiluðu annars vegar þeir Rúnar Freyr Ágústsson og Stefán Bjarki Ólafsson og hins vegar þeir Szimon Nabakowski og Ólafur Már Jónsson. Leikar fóru þannig að Stefán Bjarki lagði Rúnar Frey og Szimon hafði betur gegn Ólafi Má. Rúnar Freyr vann síðan Ólaf Má í leiknum um þriðja sætið og hirti bronsið. En þá var það úrslitaleikurinn sem var spilaður þannig að sá sem var fyrstur til að vinna sex leggi stóð uppi sem sigurvegari. Fór sá leikur alla leið í oddaleik þar sem Stefán Bjarki hafði betur, 6-5, og er því Akranesmeistari í 501 í pílu árið 2024.

Valentin vann gull á Mjölni Open

Stærsta uppgjafarglímumót á Íslandi, Mjölnir Open, var haldið laugardaginn 20. apríl hjá íþróttafélaginu Mjölni í Öskjuhlíðinni en þetta var í 18. skiptið sem þetta mót var haldið. Alls voru rúmlega níutíu keppendur skráðir til leiks frá átta félögum víðs vegar um landið. Keppt var í tíu þyngdarflokkum í brasilísku jiu jitsu, sex hjá körlum og fjórum hjá konum. Valentin Fels Camilleri sem keppir fyrir hönd Brimis BJJ á Akranesi vann gullverðlaun í -77 kg flokki. Hann sigraði allar fjórar viðureignir sínar án þess að fá á sig eitt einasta stig og með miklum yfirburðum. Þetta voru fimmtu gullverðlaun Valentins í röð á Mjölnir Open sem er frábær árangur.

Þorsteinn vann úrtökumót í hjólreiðum

Hjólreiðakappinn Þorsteinn Bárðarson frá Rifi keppti á úrtökumóti fyrir HM í Skotlandi í Gravel keppni í hjólreiðum um miðjan maí. Þorsteinn, sem keppti í flokki 45-49 ára, varð í 1. sæti. Í Gravel hjólreiðakeppni er hjólað á malarvegi og utan vegar og eru gravel hjól með grófari dekk en götuhjólin en flokkast samt ekki sem fjallahjól. Þorsteinn fór vegalengdina, sem var alls 110 kílómetrar, í sínum flokki á tímanum 3:34:11 og vann með nokkrum yfirburðum. Þorsteinn keppti svo í október á heimsmeistaramóti í malarhjólreiðum en hjólaðir voru 183 kílómetrar frá bænum Halle og endað í Leuven í Belgíu. Þorsteinn hafnaði í 60. sæti af 250 keppendum sem ræstir voru til keppni. Í ferðinni lenti hann í því að detta og brjóta brúsahaldarana á hjólinu en þrátt fyrir vökvaleysið lét hann ekkert stöðva sig og skilaði sér í mark.

Kristín með brons í hnébeygju á HM

Borgfirðingurinn Kristín Þórhallsdóttir lauk keppni á heimsmeistaramótinu í klassískum kraftlyftingum í -84 kg flokki sem haldið var í Litháen í lok júní. Kristín raðaði niður metum í sínum flokki, setti alls þrjú heimsmet og stóð sig með prýði. Kristín byrjaði vel í hnébeygjunni þar sem hún lyfti seríunni 200-210-217.5 kg og hlaut bronsverðlaun í greininni. Þá tvíbætti hún um leið heimsmetið í hnébeygju í aldursflokknum M1 (40-49 ára). Í bekkpressu lyfti hún mest 112.5 kg og í réttstöðulyftu fóru 215 kg upp hjá henni. Samanlagt lyfti Kristín 545 kg sem er nýtt heimsmet í samanlögðum árangri í fyrrgreindum aldursflokk og skilaði henni 4. sætinu í flokknum af tíu keppendum.

*Patrik Hall bætti Norðurlandamet sitt í bogfimi. Hér er hann ásamt föður sínum og afa*

Bætti Norðurlandamet sitt í bogfimi

Patrek Hall Einarsson úr Borgarnesi, sem keppir fyrir Bogann, tók í byrjun júlí þátt á Norðurlandamótinu í bogfimi utandyra sem fram fór í Óðinsvéum í Danmörku. Hann gerði sér lítið fyrir og vann Norðurlandameistaratitil í flokki U-18 á langboga. Um leið sló hann eigið met sem hann setti á sambærilegu móti árið á undan.

*Drífa þrefaldur Evrópumeistari í badminton*

Drífa þrefaldur Evrópumeistari í badminton

Drífa Harðardóttir frá Akranesi náði þeim frábæra árangri að verða þrefaldur Evrópumeistari í badminton á Evrópumótinu í flokki 35 ára og eldri sem fram fór í Belgíu í lok ágúst. Drífa keppti í öllum þremur greinunum; einliða- tvíliða- og tvenndarleik, og sigraði í þeim öllum.

Ísak Birkir Íslandsmeistari í tvímenningi

Í byrjun nóvember varð Ísak Birkir hjá Keilufélagi Akraness Íslandsmeistari í tvímenningi í keilu með Mikael Aroni úr KFR. Þetta var annar Íslandsmeistaratitillinn hjá Ísak Birki og í fjórða skiptið sem hann keppir til úrslita á Íslandsmeistaramótum.

Einar Margeir stóð sig vel á HM

Einar Margeir Ágústsson hafnaði í 20. sæti í 100m fjórsundi á HM sem fram fór í Búdapest í Ungverjalandi um miðjan desember. Einar keppti einnig í 200m bringsundi og bætti sig þar og kom í mark á 2.09.97, og varð í 27. sæti. Hann var þar með yngsti Íslendingurinn til að fara undir 2.10. sekúndum.

Íþróttaannáll ársins 2024

Samantekt af því helsta sem gerðist í íþróttum á Vesturlandi árið 2024 og fjallað var um á íþróttasíðum Skessuhorns á árinu. Boltaíþróttum hefur áður verið gerð skil á þessum vettvangi.

Samantekt af því helsta sem gerðist í íþróttum á Vesturlandi árið 2024 og fjallað var um á íþróttasíðum Skessuhorns á árinu. Boltaíþróttum hefur áður verið gerð skil á þessum vettvangi.