Rætt við Kristin Óskar Sigmundsson um nýtt starf hjá Borgarbyggð sem forstöðumaður íþróttamannvirkja, ferilinn hjá Frumherja á Sólbakka í Borgarnesi og hlaupasumarið sem er framundan

Kristinn Óskar Sigmundsson hefur verið starfandi hjá Frumherja síðan 2011. „Tíminn er svo fljótur að líða en ég ætlaði bara að vera hérna í stuttan tíma, hélt að ég myndi ekki vera hérna svona lengi,“ segir Kristinn, eða Kiddó eins og hann er oft kallaður, þegar blaðamaður hittir á hann á skoðunarstöðinni á Sólbakka í Borgarnesi. „Hér hefur verið mikið að gera, hef átt góð samskipti við fólk, mér hefur fundist gaman að þjónusta fólk og hef ég alltaf reynt að koma vel fram við viðskiptavininn og þjónusta vel alla sem hér koma. Þó svo að ég hafi gefið fólki græna eða rauða miða á sína bíla, þá hefur í flestum tilfellum allir farið út frá mér sáttir og með brosi á vör,“ segir Kiddó brosandi.

Kominn tími á breytingar

Síðustu misseri hefur Kiddó hugsaði sér til hreyfings en segir að það hafi verið mjög erfiða ákvörðun að taka. „Það var erfitt að taka ákvörðun um að hætta hérna. Það er stór hópur viðskiptavina sem er að koma hingað af öllu Vesturlandi, og jafnvel víðar sem ég hef verið að þjónusta. Ég hef einnig þjónustað Stykkishólm, Hvammstanga og Búðardal einu sinni í mánuði. Maður hefur eignast marga vini og kunningja í starfinu gegnum öll þessi ár. Þetta starf getur verið krefjandi, sérstaklega þegar mikið er að gera,“ segir Kiddó; „En ég hef verið heppinn með samstarfsfólk í gegnum árin,“ bætir hann við.

Eins og áður segir hefur Kiddó verið að að hugsa um að breyta um starfsvettvang. „Ef eitthvað spennandi starf kæmi upp hér í Borgarnesi, þá langaði mig að skoða það. Ég sagði við konuna mína einhvern tímann að mér fyndist vera komin tími á breytingar, ég hefði nú bara ætlað að vera tímabundið hjá Frumherja þannig að þegar þetta starf var auglýst þá lét ég vaða og sótti um. Þetta verður tilbreyting,“ segir Kiddó.

Forstöðumaður íþróttamannvirkja

Borgarbyggð auglýsti laust starf í október á síðasta ári, stöðu forstöðumanns íþróttamannvirkja Borgarbyggðar. Starfið felur í sér faglega og fjárhagslega ábyrgð á starfsemi íþróttamannvirkja í sveitarfélaginu. Til íþróttamannvirkja teljast Íþróttamiðstöð og sundlaug í Borgarnesi, Kleppjárnsreykjum og Varmalandi ásamt grasvöllum og battavöllum við alla grunnskóla í sveitarfélaginu. „Svo er náttúrulega að bætast við fjölnotahús hér í Borgarnesi, sem eru skiptar skoðanir um, en frábært að það sé að koma. Og svo í kjölfarið, vonandi, verður farið í að hanna og reisa nýtt parkethús. Þannig að það eru mjög spennandi tímar framundan,“ segir Kiddó.

Þetta er yfirgripsmikið starf

Kristinn mun hefja störf hjá Borgarbyggð í mars mánuði og er tilhlökkunin mikil. „Það er mjög gott fólk að vinna í íþróttahúsinu og í íþróttamannvirkjum Borgarbyggðar og hlakka ég til að hitta allt þetta góða fólk og vinna með því. Þetta er yfirgripsmikið starf enda margir sem nýta íþróttamannvirki Borgarbyggðar og koma þar við með einum eða öðrum hætti, íþróttamannvirki eru einskonar félagsmiðstöð hvers staðar. Starf mitt til að byrja með mun helgast af því að kynnast því góða fólki sem þar er, bæði starfsfólki og kúnnum, samhliða því að læra á hlutina. Ég kem ekki til með að gera stórar breytingar á einni nóttu, en ég hef þó alls kyns hugmyndir um hvernig er hægt að gera góðan stað enn betri og það mun ég leggja mig fram um að gera í samvinnu við alla sem þar eru,“ nefnir Kiddó.

Helstu verkefni og ábyrgð forstöðumanns eru fagleg og fjárhagsleg ábyrgð á starfsemi íþróttamannvirkja í sveitarfélaginu, stefnumótun og gerð starfs- og fjárhagsáætlana, stjórnun starfsmannamála og ábyrgð og eftirfylgni í framkvæmd starfsmannastefnu. Forstöðumaður hefur náið samband við íþrótta- og tómstundafélög, UMSB, skólasamfélagið og aðra sem sinna tómstundamálum, vinnur að mótun og fylgir eftir þjónustustefnu með hagaðilum, rekstur og dagleg stjórnun íþróttamannvirkja, hefur umsjón með íþróttasvæðum og knattspyrnuvöllum sveitarfélagsins og hefur eftirlit með samningum um rekstur þessara svæða og annast daglega umsjón og eftirlit með framkvæmdum og viðhaldi mannvirkja, tækja og búnaðar.

Stolt sveitarfélagsins

Kristinn var valinn til starfsins úr hópi níu umsækjenda og hefur hann ekki fengið annað en jákvæð viðbrögð frá samfélaginu síðan þá. „Stuðningurinn sem ég hef fengið hefur verið ómetanlegur. Fyrrverandi forstöðumaður hefur gert vel í sínu starfi og langar mig til að óska Ingunni alls hins besta. Ég ætla að gera mitt besta í þessu starfi og reyna hvað ég get til að að allir séu sáttir og íþróttamannvirki Borgarbyggðar verði stolt sveitarfélagsins,“ nefnir Kiddó. „Ég er ótrúlega spenntur og hlakka til að byrja í mars.“

*Kristinn nýkominn í mark í Laugavegshlaupi. Ljósm. kós.*

Hlauptu

Kristinn er öflugur hlaupari og hefur á undanförnum árum verið iðinn við að fara vítt og breitt um land og einnig erlendis að hlaupa og þá aðallega utanvegahlaup. „Það verður stórt hlaup hér í Borgarnesi í sumar, Hafnarfjall Ultra, sem ég er að skipuleggja ásamt félögum mínum í hlaupahópnum Flandra. Hægt verður að hlaupa mismunandi vegalengdir frá Borgarnesi upp á Hafnarfjall og tindana sjö á Hafnarfjalli. Svo er ég búin að bóka mig í Laugavegshlaupið í sumar en það er 55 km utanvegahlaup sem fer fram um miðjan júlí. Þettta verður í áttunda skiptið sem ég hleyp það en ég stefni á að fara tíu Laugavegi. Hlaupið er á milli Húsadals í Þórsmörk og Landmannalauga. Svo er spurning hvort ég bæti um betur og fari 53 ferðir á Hafnarfjallið á árinu, en ég setti mér það markmið á síðasta ári að fara 52 ferðir á fjallið og gerði það, fór síðustu ferðina 29. desember. Annað er ég ekki búinn að plana en það kemur í ljós hvort farið verði í fleiri hlaup þegar líða tekur á árið,“ segir Kiddó að lokum.

*Íþróttamiðstöðin í Borgarnesi. Ljósm. mm.*

*Íþróttamannvirkin á Varmalandi. Ljósm. mm.*

*Íþróttamannvirkin á Kleppjárnsreykjum og til vinstri er leikskólinn Hnoðraból. Ljósm. mm.*

Ég er mjög spenntur fyrir þessu starfi

Rætt við Kristin Óskar Sigmundsson um nýtt starf hjá Borgarbyggð sem forstöðumaður íþróttamannvirkja, ferilinn hjá Frumherja á Sólbakka í Borgarnesi og hlaupasumarið sem er framundan

Rætt við Kristin Óskar Sigmundsson um nýtt starf hjá Borgarbyggð sem forstöðumaður íþróttamannvirkja, ferilinn hjá Frumherja á Sólbakka í Borgarnesi og hlaupasumarið sem er framundan