medium

large

thumbnail

1536x1536

2048x2048

small

custom-size

Stuðst við gervigreind til að spá fyrir um fjölda ferðamanna

Fjáröflunarleikur í Borgarnesi á morgun

Árleg vitundarvakning Krafts að hefjst

Að breyta áfalli í sóknarfæri

Verulegur samdráttur í úthlutuðum byggðakvóta

Líklega sá eini sem hefur stjórnun briddsmóta að aðalstarfi

core/paragraph

Ræst verður í fyrsta sinn í Borgarnesi í sumar, utanvegahlaupið Hafnarfjall Ultra. Hlaupið verður laugardaginn 28. júní en Hlaupahópurinn Flandri í Borgarnesi stendur að hlaupinu og skipulagningu þess. Hópurinn hefur um árabil staðið fyrir Flandrasprettum, sem eru 5 km götuhlauparöð sem haldin er mánaðarlega yfir vetrarmánuðina.

Skessuhorn hafði samband við Stefán Gíslason, einn skipuleggjenda hlaupsins og forvitnaðist um hvernig þessi hugmynd hafi kviknað? „Hugmyndin um keppnishlaup í Hafnarfjallinu hefur lengi blundað í einstökum Flandrafélögum. Í vetrarbyrjun hafði Kristinn Óskar Sigmundsson (Kiddó) síðan frumkvæði að því að kalla saman hóp til að reyna að láta hugmyndina verða að veruleika, en Kiddó og flestir aðrir í þessum hópi hafa mikla reynslu af þátttöku í keppnishlaupum utanvega – og að vissu marki einnig af framkvæmd slíkra hlaupa.  Um miðjan desember var búið að leysa flest þau mál sem gátu staðið í vegi fyrir því að hrinda þessu í framkvæmd og þar með hófst undirbúningur af fullum krafti,“ nefnir Stefán.

core/image

<figure class="wp-block-image size-large is-resized is-style-default"><img src="https://umsjon.skessuhorn.is/wp-content/uploads/2025/01/Hafnarfjall-Ultra-hlaup-i-sumar_6-1200x900.jpeg" alt="" class="wp-image-87000" width="840" height="630" /><figcaption>Leiðin upp og niður Hafnarfjall er vinsæl göngu- og hlaupaleið. Ljósm. hig</figcaption></figure>

Er þá skipulagið alfarið í höndum Hlaupahópsins Flandra? „Já, skipulagið er alfarið í höndum Flandra, en fimm manna teymi innan hópsins hefur leitt vinnuna það sem af er. Í þeim hópi eru m.a. ofurhlaupararnir Kristinn og Jósep, en líklega hafa engir hlaupið oftar (eða hraðar) upp á Hafnarfjallið en þeir – og ekki alltaf farið auðveldustu leiðina. Einnig eru í teyminu þeir Bjarni Trausta og Gunnar Viðar. En þó að Flandri sjái um skipulagið getur svona viðburður ekki orðið að veruleika nema ýmsir aðrir leggi hönd á plóg. Aðstandendur hlaupsins hafa mætt mikilli jákvæðni og allir sem leitað hefur verið til hafa sýnt hugmyndinni velvilja og verið tilbúnir að leggja sitt af mörkum,“ segir Stefán.

Þátttakendur í Hafnarfjall Ultra geta valið milli fjögurra vegalengda: Í fyrsta lagið Hafnarfjall Tindur 14,4 km, 912 m hækkun, þá Hafnarfjall sjö tindar 22,7 km, 1.377 m hækkun, í þriðja lagi Hafnarfjall 7 tindar og dalir 33,0 km, 2.453 m hækkun og loks er það Hafnarfjall fjölskylduhlaup 2,3 km, 167 m hækkun. Þrjú lengri hlaupin verða ræst við Menntaskóla Borgarfjarðar, við hliðina á Nettóversluninni í Borgarnesi – og enda á sama stað. Fjölskylduhlaupið verður hins vegar ræst á malarvegi við rætur Hafnarfjalls.

„Allmargir Flandrafélagar hafa reynslu úr sambærilegum hlaupum á Íslandi, Bretlandi, Spáni, Svíþjóð og víðar. Þessi reynsla kemur sér afskaplega vel, því við undirbúning svona hlaups er í mörg horn að líta. Með reynslunni fæst ákveðin yfirsýn yfir það hvað þarf til og hvað getur farið úrskeiðis. Undirbúningurinn snýst ekki síst um að fækka því sem hugsanlega getur klikkað,“ nefnir Stefán. En hver hefur verið fjöldi hlaupara í sambærilegum hlaupum hér á landi og hvað vonist þið til að fá af hlaupurum? „Þátttakan í svona hlaupum er mjög breytileg, en oft mæta nokkrir tugir fólks í hverja vegalengd. Í vinsælustu hlaupunum skipta þátttakendur hundruðum. Aðstandendur þessa hlaups renna blint í sjóinn hvað fjölda þátttakenda varðar. Það væri frábært að fá a.m.k. 100 manns, en sú tala gæti sem best orðið talsvert hærri,“ segir Stefán.

<div class="wp-block-image is-style-default"><figure class="aligncenter size-full"><img src="https://umsjon.skessuhorn.is/wp-content/uploads/2025/01/Hafnarfjall-Ultra-hlaup-i-sumar_2.jpg" alt="" class="wp-image-87001" /><figcaption>Lengsta hlaup Hafnarfjall Ultra, Hafnarfjall 7 tindar og dalir. 33 km og 2.453 m hækkun.</figcaption></figure></div>

Allar hlaupaleiðir verða merktar á áberandi hátt, auk þess sem hluti hlaupaleiðarinnar á fjöllunum fylgir merktri gönguleið. Brautarvarsla verður á mikilvægustu stöðum, svo sem þar sem leiðir skilja. Þá verða tímatökuhlið á toppum Hafnarfjalls og Tungukolls. Vegna öryggis og brautarvörslu er mikilvægt að allir hlauparar hlaupi í gegnum hliðin. „Borgarfjarðarbrúin er að mörgu leyti viðsjárverðasti kaflinn, en þar njótum við góðs af samstarfi við Vegagerðina og lögregluna. Mikil áhersla verður lögð á að tryggja öryggi hlaupara á brúnni. Svo eru auðvitað mjög grófir og brattir kaflar í fjallinu sjálfu, eða öllu heldur fjöllunum, því að í tveimur lengstu hlaupunum er líka hlaupið á Gildalshnjúk og hina tindana fimm. Í vissum tilvikum þarf fólk að mætast ofarlega í Hafnarfjallinu og þar leggjum við áherslu á að hlauparar á uppleið víki til hægri fyrir hlaupurum á niðurleið,“ segir Stefán.

Hvernig gengur að manna svona viðburð, að fá sjálfboðaliða til starfa? „Það er auðvitað heilmikið mál að manna svona viðburð, en samkvæmt fyrstu áætlun munu u.þ.b. 35 manns starfa við hlaupið, allir í sjálfboðavinnu. Fyrstu viðbrögð hafa verið ótrúlega góð og nú þegar erum við komin með þó nokkur nöfn á lista. Viðfangsefnin eru fjölbreytt, þ.m.t. að gæta öryggis fólks á Borgarfjarðarbrúnni, sjá um þrjár drykkjarstöðvar, vísa veginn á stígamótum og sinna hlutverki eftirfara sem gæta þess að síðustu keppendur skili sér í mark. Eitt viðfangsefnið er líka að labba með tímatökuhlið upp á toppa Hafnarfjalls og Tungukolls og vera síðan í varðstöðu þar. Þetta er m.a. gert til að auka öryggi þátttakenda, því að með þessu móti getur hlaupstjórnin séð jafnóðum hvaða keppendur hafa skilað sér á tindana,“ segir Stefán.

Verður Hafnarfjall Ultra hlaupið eitthvað öðruvísi en önnur utanvegahlaup á Íslandi? „Ein helsta sérstaðan er þessi mikla hækkun. Reyndar eru a.m.k. fimm hlaup á landinu með meiri heildarhækkun en lengsta hlaupið í Hafnarfjallinu, en þau hlaup eru öll talsvert lengri (43-106 km). Ekkert hlaup hérlendis býður svo vitað sé upp á svona mikla hækkun miðað við vegalengd. Svo eru hlaupaleiðirnar líka óvenju fjölbreyttar og býsna tæknilegar, ekki síst niðurhlaupin. Þannig hlaup hafa mikið aðdráttarafl. Nú, og svo er Hafnarfjallið náttúrulega fjall sem hér um bil allir landsmenn hafa séð og jafnvel langað til að komast upp á. Já, og svo er þetta stutt frá höfuðborgarsvæðinu þar sem flestir hlauparar landsins búa. Fjölskylduhlaupið okkar skapar líka ákveðna sérstöðu, því að þar geta fjölskyldur á öllum aldri spreytt sig á alvöru utanvegahlaupi, án þess að þurfa að berjast við brekkurnar í marga klukkutíma. Kannski munu öflugustu utanvegahlauparar framtíðarinnar stíga þar sín fyrstu skref,“ segir Stefán.

Að lokum, hvernig hefur skráningin í hlaupið farið af stað? „Skráningin er nýbyrjuð á síðunni, netskraning.is/hafnarfjallultra/ Fyrstu viðbrögð hafa verið einstaklega góð, en of snemmt að spá neinu. Skráningar benda þó til að mörgum finnist þetta spennandi, ekki síst lengsta leiðin (33 km með 2.450 m hækkun). Hér ríkir mikil tilhlökkun – og þakklæti fyrir hvað fyrstu viðbrögð hafa verið jákvæð, bæði heima og heiman. Já, og svo sakar ekki að minnast á að hlaupin verða að sjálfsögðu viðurkennd af Alþjóða utanvegahlaupasambandinu, ITRA, og eru þegar komin þar inn á alþjóðlega hlaupadagskrá sumarsins,“ nefnir Stefán að lokum.

<figure class="wp-block-image size-full is-style-default"><img src="https://umsjon.skessuhorn.is/wp-content/uploads/2025/01/Hafnarfjall-Ultra-hlaup-i-sumar_3.jpg" alt="" class="wp-image-87002" /><figcaption>Fjölskylduhlaupið verður 2,3 km og 167 m hækkun.</figcaption></figure>

<figure class="wp-block-image size-full is-resized is-style-default"><img src="https://umsjon.skessuhorn.is/wp-content/uploads/2025/01/Hafnarfjall-Ultra-hlaup-i-sumar_4.jpg" alt="" class="wp-image-87003" width="842" height="476" /><figcaption>Hafnarfjall tindur er 14,4 km og 919 m hækkun. </figcaption></figure>

<figure class="wp-block-image size-full is-style-default"><img src="https://umsjon.skessuhorn.is/wp-content/uploads/2025/01/Hafnarfjall-Ultra-hlaup-i-sumar_5.jpg" alt="" class="wp-image-87004" /><figcaption>Hafnarfjall 7 tindar er 22,7 km og 1.377 m hækkun.</figcaption></figure>

Fréttaveita Vesturlands

Hafnarfjall Ultra hlaup í sumar