medium

thumbnail

small

custom-size

Kveiktu varðeld á skólalóðinni

large

1536x1536

2048x2048

Samþykktu tekjumörk vegna afsláttar af fasteignaskatti

Metár að baki í fiskeldi hér á landi

Snæfell með tap í fyrsta leik ársins

Úthlutað úr Lista- og menningarsjóði Stykkishólms

Samningur undirritaður vegna byggingar fjölnota íþróttahúss í Borgarnesi

core/paragraph

Nú þegar við höfum kvatt árið 2024 er ekki úr vegi að líta aðeins um öxl. Eins og áður leitaði Skessuhorn til forystufólks í sveitarfélögum í landshlutanum og bað það um að svara laufléttum spurningum; um hvað stæði upp úr frá árinu sem var að líða - og hvers þeir vænta á því nýja. Hér á eftir fara svör tíu sveitarstjóra og oddvita. Liðið ár var sannarlega viðburðaríkt og væntingar um gott ár framundan.

core/image

Haraldur Benediktsson bæjarstjóri hjá Akraneskaupstað:

Verður uppskeruár á Akranesi

-Hvað stóð upp úr á árinu 2024?

Glíman við atvinnumál á Akranesi og afleiðingar af háum vöxtum koma fyrst í hugann af vettvangi starfsins. Við erum svo sem ekki alveg búin að bíta úr nálinni með það – en vonandi fer að rætast úr og ákveðin merki um það með lækkandi vöxtum.

Þá kemur í hugann sumarið og sólarleysið og að ég skyldi ekki hlýða ritstjóra Skessuhorns um að hefja slátt þegar honum vantaði frétt í blaðið! Sá frestur á upphafi heyskapar elti mig svo allt sumarið. Svo náðu krakkarnir mínir takmörkum sínum, það er eitthvað sem ekkert getur skyggt á – sama hvernig allt veltist.

-Hvernig leggst nýja árið í þig, árið 2025?

Ég er þeirrar gæfu aðnjótandi að hlakka alltaf til um áramót og vera bjartsýnn á að nýtt ár verði gott. Árið verður mikið uppskeruár hjá Akraneskaupstað. Þar er verið að ljúka á árinu risastórum framkvæmdum. Nýtt íþróttahús á Jaðarsbökkum, endurbyggingu á Grundaskóla, stækkun Teigasels og svo mætti lengi telja. Íbúar á Akranesi munu upplifa miklar breytingar og gjörbreytt starfsumhverfi margra. Um leið er þolinmæði þeirra er þökkuð, þeim sem hafa þurft að búa við á stundum frumstæðar aðstæður á meðan framkvæmdum stendur. En áfram skal haldið og mörg verk eru enn í vinnslu.

Þá ætla ég ekki að óhlýðnast Magnúsi ritstjóra Skessuhorns aftur – ef hann hringir og vill hefja slátt! En umfram allt vonast ég til að árið verði okkur gott.

Stefán Broddi Guðjónsson sveitarstjóri í Borgarbyggð:

Framkvæmdatímabil er hafið hjá sveitarfélaginu

Liðið ár vekur blendnar tilfinningar. Sorglegar fréttir bæði af innlendum og erlendum vettvangi koma því miður upp í hugann. Vanlíðan og ofbeldi kostaði samfélagið allt of mikið á síðasta ári. Ég vona að sú vakning sem hefur verið í umræðu um líðan og sjálfsmynd ungmenna haldi áfram. Það er umhugsunarvert að þrátt fyrir efnisleg gæði og tækifæri, þá eru allt of mörg sem búa við vanlíðan, einmanaleika og brotna sjálfsmynd, og ég held þetta eigi líka við um fullorðna. Tæknin og fyrst og fremst samfélagsmiðlar ganga út á stutt skilaboð, hröð og einföld svör við öllum spurningum. En svar við spurningu um líðan og sjálfsmynd er ekki stutt, hraðsoðið eða einfalt. Nú þegar gervigreindin er hratt að breyta heiminum þá þurfum við enn frekar að vera að vera á varðbergi um að tæknin breyti heiminum til góðs. Ég held að í framtíðinni verði ársins 2024 minnst fyrir innreið gervigreindar í líf almennings. Sú tækni er að breyta samfélaginu meira og hraðar en við áttum okkur á.

Kosningar einkenndu liðið ár. Undarlega sem það hljómar þá fannst mér klofningur meðal þjóðarinnar í kringum forsetakosningarnar eiginlega meiri en í kringum þingkosningarnar. Þó sú barátta hafi verið snörp þá fannst mér hún drengileg og óska nýrri ríkisstjórn og þingmönnum alls hins besta.

Hjá okkur í Borgarbyggð þá má segja að framkvæmdatímabil sé hafið hjá sveitarfélaginu. Það var sögulega mikið fjárfest á liðnu ári og frekari fjárfestingar framundan; í skólum, íþróttamannvirkjum og götum og stígum. Þá er vinna við aðalskipulag í fullum gangi, skipulag á byggð í Brákarey og þróun á nýjum hverfum fyrir íbúðir og atvinnulíf. Þar munum við uppskera á næstu árum. Sama á við um framfaraskref í skólamálum, málefnum barna, fatlaðra og eldri borgara.

Af einstaka viðburðum í sveitarfélaginu þá var stórkostlegt að taka þátt í sameiginlegri Hinsegin hátíð Vesturlands og Brákarhátíð ásamt öllum þeim mannfjölda sem mætti til leiks í öllum regnbogans litum. Þá var gaman að taka þátt í vel heppnuðu Unglingalandsmóti UMFÍ í Borgarnesi þar sem mikill fjöldi gesta skemmti sér vel og vandræðalaust í bænum okkar um Verslunarmannahelgina.

Á persónulegum nótum þá stendur upp úr í mínum huga að drengirnir mínir þrír voru lánsamir á árinu. Þeir leystu vel úr þeim áskorunum sem þeir tókust á við í skóla, einkalífi og starfi og eru vel gerðir ungir menn sem við Þurý, eiginkona mín, erum þakklát fyrir. Sem fyrr náðum við að ferðast dálítið bæði hér heima og erlendis. Ferðir á Vestfirði voru óvenjumargar þar sem elsti sonurinn er fluttur á Ísafjörð og svo var ferðast um Frakkland.

Linda Björk Pálsdóttir sveitarstjóri í Hvalfjarðarsveit:

Íbúar fóru í fyrsta skipti yfir 800

Það er einkum tvennt sem stendur upp úr á árinu 2024 í Hvalfjarðarsveit. Það fyrra er að á síðastliðnu ári fór íbúafjöldi Hvalfjarðarsveitar í fyrsta sinn yfir 800 og því ber að fagna auk þess sem áframhaldandi fjölgun íbúa er fyrirsjáanleg enda hlutfallslega flestar íbúðir í byggingu á landsvísu í Hvalfjarðarsveit miðað við fjölda fullbúinna íbúða í sveitarfélaginu. Hið síðara er upphaf framkvæmda við byggingu nýs íþróttahúss, sem unnið hefur verið að frá ársbyrjun 2020 og er stærsta einstaka framkvæmd sveitarfélagsins í rúman áratug, stór og mikill áfangi í innviðauppbyggingu.

Persónulega standa hæst allar samverustundir fjölskyldunnar, bæði innanlands sem utan, dýrmætar allar sem ein. Góð heilsa og almenn velgengni fjölskyldumeðlima, stórra sem smárra.

Afar vel, það er ekki útlit fyrir annað en að ör vöxtur samfélagsins í Hvalfjarðarsveit, áframhaldandi innviðauppbygging í takti við framtíðarþarfir samfélagsins og gott þjónustustig vísi áfram veginn enda mannauður sveitarfélagsins þess helsti styrkur, bæði hvað varðar starfsfólk og íbúa.

Árið 2025 er jafnframt spennandi og stórt persónulega þar sem sonurinn mun ljúka sex ára dýralæknanámi frá Slóvakíu í sumar og flytja aftur „heim.“ Eldra barnabarnið mun fagna fyrsta tugnum, nafna mín mun fermast, dóttir og tengdadætur munu halda áfram að blómstra og lífið vonandi ganga áfram sinn vanagang.&nbsp; Við hjónin munum halda uppteknum hætti sem aldrei fyrr í ferðalögum og skemmtilegheitum.

Ég vil að lokum nýta tækifærið og óska íbúum og gestum Hvalfjarðarsveitar, sem og landsmönnum öllum, gleði og gæfuríks árs, lifið heil.

Jón Eiríkur Einarsson oddviti Skorradalshrepps:

Stefnt að kosningu um sameiningu á árinu

Fyrst og síðast hugsa ég mér næst og finnst að fjölskyldunni gangi vel. Við hjónin sjáum börnin blómstra og barnabörnin sömuleiðis og bröltið í búskapnum er bara á nokkuð góðu róli. Alltaf nóg að gera á öllum vígstöðvum og okkar helsti vandi að púsla verkefnunum saman.

Það sem stóð uppúr á nýliðnu ári í sveitarfélaginu Skorradalshrepp er að okkur hefur tekist að snúa rekstri sveitarfélagsins nokkuð vel við með stífum aðhaldsaðgerðum og er nú rekstur þess mjög góður. Einnig vil ég nefna að við höfum verið að leggja áherslu á, í formlegum sameiningarviðræðum, að skoða sameiningarmöguleika við okkar ágætu nágranna í Borgarbyggð. Viðræður ganga vel og er stefnt að kosningum um sameiningu á þessu ári. Að sjálfsögðu sýnist sitt hverjum um ágæti ráðahagsins en ég hef fulla trú á að flestir sjái hag sínum betur borgið saman sem eitt öflugt sveitarfélag í framtíðinni. Annars var árið svo sem í tæpu meðallagi, svo vægt sé til orða tekið. Sauðburðartíð vond svo og tíð til heyskapar. Vextir í hámarki og svona mætti lengi telja en segjum bara eins og skáldið forðum; „horfðu á björtu hliðarnar, heimurinn hann gæti verið verri.“

-Hvernig leggst nýja árið í þig?

Spurt er hvað boðar nýárs blessuð sól. Ekki veit ég það en ber þó þá von í brjósti að árið verði gott og gjöfult og ég trúi því og treysti. Við fjölskyldan böslum í búskapnum, vinnu og félagsmálum sem fyrr.

Að lokum vil ég óska öllum gleðilegs árs og friðar með þökk fyrir liðið ár.

Björn Bjarki Þorsteinsson sveitarstjóri Dalabyggðar:

Verulega viðburðaríkt ár að baki

Árið 2024 var viðburðaríkt ár á ýmsan hátt, bæði hjá mér og mínu fólki og eins hvað varðar starf mitt í Dalabyggð og þau fjölbreyttu samskipti og verkefni sem þar reka á fjörurnar og reynslubankinn hjá mér stækkaði sem því nam má segja.

Hvað Dalabyggð varðar þá ávannst ýmislegt í innra starfi sveitarfélagsins og okkur tókst að koma mörgum spennandi verkefnum í farveg og af stað. Framkvæmdir við íþróttamannvirki hófust og var afar gaman að upplifa þá stund þegar íþróttamenn í Dölum tóku fyrstu skóflustungu að mannvirkinu að viðstöddu fjölmenni. Dalabyggð fagnaði 30 ára afmæli sínu og ýmsir aðrir mikilvægir áfangar náðust í góðu samstarfi og samvinnu bæði innan héraðs og við aðila utan héraðs. Einnig var afar ánægjulegt að upplifa jákvæða þróun hvað varðar útkomu Dalabyggðar í íbúakönnun landshlutanna sem kynnt var á árinu, t.a.m. skoraði Dalabyggð hæst hvað varðar upplifun íbúa hvað varðar íbúalýðræði og á ýmsum öðrum sviðum var jákvæð þróun. Rekstur sveitarfélagsins hefur tekið töluverðum breytingum og var á vissan hátt ögrandi að koma þeim þáttum sem um var að ræða í þann farveg sem tókst sem betur fer oftast í góðri sátt og samvinnu við hlutaðeigandi. Samstarf innan sveitarstjórnar er gott og eins innan starfsmannahópsins kröftuga sem með mér vinnur, samhentur hópur sem myndar sterka og góða liðsheild.

Hvað mig sjálfan varðar þá var árið 2024 viðburðaríkt. Fullt af gleði, skemmtilegum viðburðum í bland við verkefni sem þurfti að takast á við og leysa en sem betur fer flest á jákvæðum nótum. Svo eitthvað sé nefnt þá bættist eitt barnabarn í hópinn í febrúar þegar hann Adrían Bjarki bættist í hópinn okkar Guðrúnar og eru barnabörnin okkar þá orðin fimm og öll hress og kát sem er þakkarvert. Einn sonur okkar útskrifaðist sl. vor sem stúdent og rafvirki frá FVA, tvö barna okkar og fjölskyldur þeirra fluttu búferlum, innan sveitar í öðru tilvikinu og í hinu var um flutning á milli sveitarfélaga að ræða, og svo í lok október ákvað ég með mjög stuttum fyrirvara, sem reyndar einkennir mann stundum, að gefa kost á mér til setu á framboðslista Sjálfstæðisflokksins fyrir kosningar til Alþingis. Fékk ég stuðning og kosningu til að sitja í 2. sæti listans þannig að í nóvember var ég í leyfi frá starfi mínu sem sveitarstjóri Dalabyggðar og einhenti mér í kosningabaráttu sem var bæði skemmtileg og lærdómsrík reynsla sem ég mun búa að um ókomna tíð. Vil ég hér nota tækifærið til að þakka fyrir góðar viðtökur hvarvetna um kjördæmið víðfeðma. Nú eftir kosningarnar er ég orðin varaþingmaður þannig að mögulega fæ ég tækifæri til að setjast á Alþingi ef og þegar fyrsti þingmaður kjördæmisins þarf að bregða sér frá. Ég uni vel við niðurstöðu kosninganna og var mættur til starfa í Dalabyggð mánudaginn 2. desember sl. Vil ég þakka samstarfsfólki mínu og sveitarstjórn Dalabyggðar það umburðarlyndi sem það góða fólk sýndi þessu brölti mínu.&nbsp; Til viðbótar vil ég nefna að auk framangreinds þá vorum við hjónin dugleg að nýta frítíma okkar í góð og skemmtileg ferðalög, bæði við tvö ein og eins með fjölskyldu og vinum þannig að árið 2024 skilur eftir margar góðar minningar þegar horft er til baka nú um áramót.

Nýtt ár leggst vel í mig eins og reyndar alltaf, bæði persónulega sem og í mínu starfi fyrir Dalabyggð. Það eru enn á ný mörg spennandi verkefni og viðfangsefni í farvatninu hjá okkur í Dalabyggð sem ég hlakka til að takast á við með mínu góða samstarfsfólki. Við ætlum okkur að komast í fleiri verkefni tengd ýmis konar innviðauppbyggingu en jafnframt þarf að gæta að því að missa ekki sjónar á rekstrarkostnaði og viðhalda þjónustugæðum í þeim skylduverkefnum sem sveitarfélögum er gert að sinna þannig að þetta er ákveðin línudans en okkur hlakkar til komandi tíma og verkefna því Dalirnir eru svo sannarlega samfélag í sókn. Við erum við að fara af stað í óformlegar könnunarviðræður við nágranna okkar og vini í Húnaþingi vestra varðandi mögulega sameiningu þessara tveggja sveitarfélaga. Það verður mjög áhugavert að taka þátt í þeirri vinnu með góðu fólki beggja vegna Laxárdalsheiðarinnar. Einnig verður áhugavert að vinna með verkfærakistu sem varð til í samstarfi okkar við cohn&amp;wolfe í kjölfar verkefnis sem við fengum styrk frá Byggðastofnun í gegnum C1 sjóð sem sneri að því að styrkja viðhorf bæði innan héraðs sem utan til Dalanna. Við munum leitast við að yrkja bæði landgæði og lýðgæði, sem mætast í lífsgæðum, hér í Dölum og vekja athygli á innan og utan héraðs þeim gæðum sem Dalirnir búa yfir með þeim verkfærum sem urðu til í þessari skemmtilegu vinnu.

Það verður áhugavert að fylgjast með nýrri ríkisstjórn og verkum hennar og er ég vongóður um að landsbyggðin og þeir innviðir sem skipta okkur svo miklu máli fái athygli við ríkisstjórnarborðið sbr. það sem nefnt er í stefnuyfirlýsingu þeirri sem kynnt hefur verið þar sem minnst er sérstaklega á landsbyggðina og eins hefur nýr forsætisráðherra nefnt þá áherslu sérstaklega og því leyfi ég mér að fagna. Vil ég óska nýrri ríkisstjórn, ráðherrum og þingmönnum öllum góðs gengis á&nbsp; kjörtímabilinu. Einnig vil ég óska nýjum forseta Íslands góðs gengis og fannst mér nýársávarp forseta gefa afar góð fyrirheit um áherslur hennar í því mikilvæga embætti.

Ég vona svo sannarlega að það skapist meiri friður í heiminum á árinu sem er nýhafið. Það er sorglegt til þess að vita að almennir borgarar þurfi að líða fyrir valdabrölt einstaklinga víða um heim, því þarf að reyna að afstýra með öllum tiltækum ráðum.

Hvað mig sjálfan varðar þá er árið 2025 óskrifað blað ef svo má segja hvað áform um ferðalög og slíkt varðar en það eiga vonandi einhver skemmtileg tækifæri eftir að koma upp því það er aldrei að vita hvað okkur, fjölskyldu og vinum, dettur í hug að taka okkur fyrir hendur þegar góð og spennandi tækifæri gefast.

Mig langar að lokum að senda hamingjuóskir til vinkonu minnar Írisar Grönfeldt með gleðilega og afar verðskuldaða viðurkenningu sem fólst í því að hún fékk afhenta fálkaorðuna á nýársdag.

Ingibjörg Birna Erlingsdóttir sveitarstjóri Reykhólahrepps:

Næg verkefni framundan og margar nýjar íbúðir að vera til

Árið 2024 stóð heldur betur uppúr hjá Reykhólahreppi árið 2024. Byggðar voru 13 íbúðir á Reykhólum, þar af þrjú raðhús og eitt einbýli, önnur eins uppbygging hefur ekki átt sér stað síðustu áratugi. Mikil eftirspurn hefur verið eftir leiguhúsnæði í sveitarfélaginu síðastliðin ár og munu íbúðirnar koma til með að mæta þeirri þörf. Endurbygging og stækkun Reykhólahafnar var að mestu kláruð á árinu, mikil bót fyrir Reykhólahrepp þar sem hugað var að því að mæta framtíðinni með stærð og orkuskiptum skipa og báta í huga. Verkefnið bætir einnig allt öryggi vegna starfsemi Þörungaverksmiðjunnar á höfninni sem er helsti notanda hafnarinnar. Þá opnaði langþráð verslun á Reykhólum í nóvember og líkamsræktarstöðin Grettir sterki fékk andlitslyftingu og ný tæki í samstarfi með Ungmennafélaginu Aftureldingu. Þá hefur Vegagerðin unnið að því að ljúka við vegalagningu á Vestfjarðarvegi 60 og taka úr notkun tvær einbreiðar brýr í sveitarfélaginu. Mikil uppbygging átti sér stað í Þörungamiðstöð Íslands, þar sem búnaður til ýmissa rannsókna var settur upp í húsnæði félagsins. Í Flatey hefur Orkubú Vestfjarða unnið að uppbyggingu húsnæðis vegna raforkunýtingar í eyjunni.

Utan þess hefur lífið gengið sinn gang. Guðmundur á Grund hélt upp á 70 ára afmælið með stæl og Árný Huld Haraldsdóttir var kjörin íbúi ársins.

-Hvernig leggst nýja árið í þig, 2025?

Árið 2025 leggst reglulega vel í mig.&nbsp; Það stendur ýmislegt til. Klára byggingu íbúða og koma þeim í leigu. Uppbygging hringrásarsamfélagsins í Reykhólahreppi heldur áfram, unnið verður að aðalskipulags- og deiliskipulagsbreytingum í tengslum við hana. Nýtt þéttbýli á Króksfjarðarnesi, stækkun hafnarsvæðis í Karley vegna fyrirhugaðra stækkunar á fyrirtækjum sem þar hafa aðsetur og mögulega tilkomu nýrra fyrirtækja. Þá stendur til að klára byggingu tveggja íbúða í Barmahlíð, breyta hluta heimavistar í Reykhólaskóla í félagsmiðstöð, setja upp gufubað í Grettislaug, leggja ljósleiðara í þorpið og halda áfram að éta upp viðhaldsskuld sveitarfélagsins gagnvart eigin fasteignum. Þá mun verkefnið Brothættar byggðir fara af stað með nýjum verkefnastjóra.

Það er nóg um að vera og mikið umstang í kringum allar þessar framkvæmdir og margt ótalið.

Jakob Björgvin Sigríðarson Jakobsson bæjarstjóri Sveitarfélagsins Stykkishólms:

Hér hefur verið íbúafjölgun undanfarin ár

Það er óhætt að segja að það hafi verið ófá framfaraskref stigin í Stykkishólmi á liðnu ári. Víkurhverfi var stærsta uppbyggingarverkefni sveitarfélagsins á árinu 2024, ásamt umfangsmiklum endurbótum á Sundlaug Stykkishólms og uppbyggingu í Höfðaborg, miðstöð öldrunarþjónustu í Stykkishólmi. Þá héldum við áfram uppbyggingu stígagerðar í bæjarlandi með áherslu á uppbyggingu í skógræktinni í samstarfi við Skógræktafélag Stykkishólms, ásamt öðrum verkefnum. Einnig bættum við aðstæður fyrir tjaldgesti, hófum uppbyggingu á félagsheimilinu Skildi og lengi mætti áfram telja. Þá standa nýju húsin tvö við Aðalgötuna vissulega uppúr á liðnu ári, Aðalgata 15a og 16. Þessar lóðir höfðu lengi staðið auðar og voru margir efins með að byggja á þeim en nú hafa risið tvö glæsileg hús í gömlum stíl sem styrkja bæjarmyndina enn frekar. Af öðru á árinu sem stóð upp úr er helst að nefna að Danskir dagar voru haldnir með pompi og prakt í tilefni af 30 ára afmæli hátíðarinnar. Af þessu tilefni var margt í dagskránni sem minnti á upphaf hátíðarinnar og tókst afar vel til. Það vakti til að mynda mikla athygli að danski Eurovisionfarinn Jørgen Olsen heimsótti hátíðina og steig á stokk á bryggjuballi, nýkjörinn forseti, Halla Tómasdóttir, heimsótti okkur einnig á árinu og margt fleira mætti týna til. Það er óhætt að segja að árið 2024 hafi verið ár framfara og menningar í sveitarfélaginu, en bæði eru grundvallar þáttur í öflugu og blómlegu samfélagi.

Hvernig leggst nýja árið í þig?

Framundan er spennandi ár í Stykkishólmi. Framkvæmdir við gatnagerð stóðu yfir í Víkurhverfi í fyrra og á þessu ári munum við sjá húsin rísa á svæðinu. Þetta er afar mikilvægur áfangi fyrir okkar samfélag að ljúka við gatnagerð í Vikurhverfi enda voru fáar lausar lóðir eftir í bænum vegna mikillar uppbyggingar síðustu ár og eftirspurnin mikil. Ég geri ráð fyrir að það megi búast við því að á árinu verði hafist handa við uppbyggingu 18-24 íbúða í Víkurhverfi og af þeim verði 12 hagkvæmar íbúðir fyrir tekju- og eignaminni sem er uppbygging sem byggir grunn sinn á samstarfsverkefni Sveitarfélagsins Stykkishólms og ríkisins. Fyrst og fremst ber að fagna uppbyggingu og samstarfi sem þessu sem mun koma til með að byggja enn betur undir okkar samfélag og treysta stoðir þess til lengri tíma. Hér hefur verið íbúafjölgun undanfarin ár og við horfum fram á áframhaldandi fjölgun og uppbyggingu. Árið 2025 verður væntanlega stórt ár hvað þetta varðar. Hefur sveitarfélagið verið á undanförnum árum að bregðast við aukinni fjölgun íbúa með uppbyggingu innviða í tengslum við leikskóla og grunnskóla, en uppbygging var í leikskólanum á árinu 2017 við viðbótar húsnæði og 2022 með viðbyggingu og á árinu 2019 hófum við að nýta hluta af Amtsbókasafninu til kennslu og 2022 voru gerðar töluverðar breytingar á grunnskólanum með það að markmiði að nýta húsnæði skólans betur og mæta betur þörfum skólans. Á árinu 2025 er gert ráð fyrir að mæta enn betur húsnæðisþörf grunnskólans. Þá er verið að ljúka við skiplag á athafnasvæðum vegna aukinnar eftirspurnar eftir atvinnulóðum og mikillar uppbyggingar atvinnuhúsnæða á síðustu árum. Einnig eru stórhuga hugmyndir um uppbyggingu í tengslum við ferðaþjónustu á svæðinu, m.a. á við Stykkishólmshöfn. Ég geri fastlega ráð fyrir því að á þessu ári sé svo tíðinda einnig að vænta er tengjast áformum um frekari atvinnuuppbyggingu í hafnsækinni atvinnustarfsemi í Stykkishólmi. Það er því óhætt að segja að það verði spennandi að fylgjast með og vera þátttakandi í þeirri uppbyggingu sem framundan er í Stykkishólmi á næstu misserum.

Persónulega eru líka spennandi tímar framundan hjá mér sjálfum. Næstyngsta barnið, annað af tveimur sem fæddust eftir að ég flutti aftur vestur árið 2018, er að útskrifast úr Leikskólanum í Stykkishólmi í vor og hefja skólagöngu í Grunnskólanum í Stykkishólmi með eldri bróður sínum næsta haust. Þannig munu tvö barna okkar stunda nám í grunnskóla, eitt í leikskóla og það elsta varð stúdent fyrir ári síðan. Á nýju ári er svo fjölmargt annað sem snýr að börnunum sem mun koma til með að vera tilefni til þess að staldra við og gleðjast yfir. Það er sérstaklega mikilvægt og í raun dýrmætt að gefa sér tíma til þess að fagna öllum tímamótum í lífi barnanna sinna með þeim og almennt að gefa sér virkilega tíma með þeim og eiga með þeim gæðastundir. Er þetta sérstaklega mikilvægt að hafa í huga í þeim störfum þar sem stytting vinnuviku nær ekki til, þ.e. að forgangsraða tíma sínum með þeim hætti að það sem skiptir mestu í máli í lífi hvers einstaklings sé í fyrirrúmi. Annars var ég þess heiðurs aðnjótandi að fá að vera í þorrablótsnefnd þetta árið og mun því 1. febrúar næstkomandi stíga á stokk sem skemmtikraftur á Þorrablóti í Stykkishólmi með mjög öflugum hópi Hólmara og Helgfellinga. Einhverjir myndu segja að það væri ekki oft sem bæjarstjórar fái tækifæri sem þetta til að svara fyrir sig og það gæti vel farið svo að ég muni engu spara til.

Björg Ágústsdóttir bæjarstjóri Grundarfjarðar:

Þungt ár veðurfarslega að baki

Hjá mér persónulega stóð uppúr að verða amma í fyrsta sinn. Yndisleg ömmu- og afastelpa fæddist í lok mars. Að hún sé síðan að hluta til nafna mín, Birta Björg, þykir mér enn meiri heiður. Það eru mikil forréttindi fyrir okkur að fá að fylgjast með henni vaxa og dafna, og foreldrunum sömuleiðis í sínu hlutverki.

Heilt yfir var þetta annasamt en gott ár hjá Grundarfjarðarbæ. Spennandi framkvæmdir, eins og við orkuskipti skóla- og íþróttamannvirkja, voru efst á dagskrá, og stór skipulagsverkefni í vinnslu þar sem horft er til framtíðaruppbyggingar, mikil áhersla var á endurbætur leiksvæða bæjarins og fleira mætti nefna. Við höfum fengið góðan stuðning úr Orkusjóði til framkvæmda, auk þess sem í lok árs var tilkynnt um mjög stóran sex ára Evrópustyrk til fráveitu- og umhverfisframkvæmda hjá okkur, sem skiptir miklu máli og býður uppá spennandi verkefni framundan.

Að ýmsu leyti varð árið þó frekar þungt – ekki síst veðurfarslega. Allar framkvæmdir bæjarins, viðhald og önnur verkefni, verða mun þyngri í vöfum þegar tíðarfarið er ekki hagstætt. Í upphafi ársins var hér mjög snjóþungt og það þýðir aukin útgjöld, sem mér finnst aldrei gott. Á móti kemur að skíðafólk naut þess að geta rennt sér í skíðabrekkunum okkar og það gefur heilmikla og jákvæða orku. Um miðjan júlí slógum við vafasamt úrkomumet í Grundarfirði þegar sólarhringsúrkoma fór í 227 mm á einum sólarhring. Af þessu varð nokkuð tjón á gróðri, á vegum og fleiru.

Þegar ég lít yfir árið, þá er ég mjög þakklát fyrir metnaðarfullt starf skólanna okkar sem starfa eftir nýrri menntastefnu bæjarins og eru að blómstra á mjög mörgum sviðum. Áberandi var líka hve íþróttafélögin okkar búa að góðu baklandi og öflugum sjálfboðaliðum, enda frábærir hlutir að gerast hjá þeim.

-Hvernig leggst nýja árið í þig?

Nýja árið leggst vel í mig, eins og reyndar öll ný ár hafa gert, full fyrirheita um nýja daga og ný tækifæri. Snæfellsnesið á klárlega mikið inni, þegar kemur að ferðaþjónustu og uppbyggingu – og ég hlakka til að fylgja eftir uppbyggingu á grunni mikillar vinnu í skipulags- og umhverfismálum síðustu árin, sem bæjarstjórn hefur lagt grunn að. Svo hlakka ég til sumarsins, sem ég er viss um að verður einstaklega gott á okkar svæði!

Kristinn Jónasson bæjarstjóri Snæfellsbæjar:

Opnun Hallarinnar stendur uppúr á árinu

Á síðasta ári stóð fæðing fyrsta barnabarnsins upp úr og sú upplifun að verða afi í fyrsta sinn sem mér finnst ótrúlega skemmtilegt hlutverk. Börnin mín héldu áfram að fylla mig stolti í bæði leik, námi og störfum. Sumarið sem segja má að hafi ekki komið er minnisstætt og þá kannski sérstaklega að því leyti að maður upplifði enn og aftur hvað veður hefur mikil áhrif á hvað maður tekur sér fyrir hendur. Sumarsins 2024 verður þannig minnst fyrir ítrekaðar breytingar á áætlunum. Þrátt fyrir það var sumarið okkur gott með nærandi samveru, útivist og golfleik með fjölskyldu og vinum.

Árið var okkur gott í Snæfellsbæ, talsvert var um framkvæmdir og stendur þar uppúr opnun Hallarinnar, húsnæðis fyrir starf eldri borgara í Snæfellsbæ. Félag eldri borgara á heiður skilinn fyrir frábært starf í Höllinni sem vakið hefur athygli. Mikill fjöldi ferðamanna heimsótti Snæfellsbæ og var fjölgun ferðamanna um 12% frá fyrra ári. Menning og listir hafa skipað stóran sess í Snæfellsbæ undanfarin ár og glatt bæði heimamenn og gesti. Á árinu var í tilefni 30 ára afmælis Snæfellsbæjar sett upp nýtt útilistaverk eftir Erró á Sáinu í Ólafsvík og Kvenfélag Ólafsvíkur lét setja upp útilistaverkið Gleði/Framtíð eftir Sigurð Guðmundsson við Gilið. Bæði verk eru frábær viðbót við flóru útilistaverka í Snæfellsbæ.

Það hefur mikið gengið á á landinu á árinu. Eldsumbrotin í kringum Grindavík eru mér mjög minnisstæð og átakanlegt hefur verið að fylgjast með blómlegu samfélagi takast á við slíka náttúruvá. Manndráp hafa aldrei verið fleiri á Íslandi á einu ári og banaslysin mörg. Pólitíkin tók mikið pláss. Það voru forsetakosningar á árinu og óska ég nýkjörnum forseta alls hins besta, jafnframt vil ég nota þetta tækifæri og þakka fráfarandi forseta Guðna Th. Jóhannessyni fyrir hans störf í okkar þágu. Við fengum líka nýja ríkisstjórn eftir alþingiskosningar í lok árs og óska ég henni velfarnaðar í hennar störfum. Þeim þingmönnum sem náðu kjöri óska ég til hamingju með kjörið og hlakka til samstarfsins um leið og ég þakka þeim sem frá hverfa.

Nýja árið leggst vel í mig, það eru spennandi tímar framundan. Ég ætla að leyfa mér að vona að efnahagsástandið haldi áfram að lagast og vextir haldi áfram að lækka. Tækifæri okkar eru fjölmörg en það er okkar sem þjóð að nýta þau. Við Íslendingar eru rík þjóð í mörgum skilningi og ef við skoðum stöðu okkar í samanburði við aðra þá getum við vel við unað. Ég vona að ný ríkisstjórn verði ríkisstjórn allra Íslendinga, líka þeirra sem búa úti á landi og horfi til þeirra mála sem skipta okkur máli. Ég hef áhyggjur af vaxandi stríðsógn í heiminum sem ég vona að menn reyni að takast á við hana af skynsemi og mennsku.

Hvað mig sjálfan varðar þá hlakka ég til gæðastunda með mínu fólki. Ég hlakka til að fylgjast með börnum og barnabarni vaxa og dafna og ná markmiðum sínum. Ég vonast eftir mörgum árangursríkum ferðum á fjöll og mörgum golfhringjum í góðu veðri næsta sumar. Jafnframt hlakka ég alls „stússins“ í kringum kindurnar mínar með góðum vinum.

Ég vil nota þetta tækifæri til að óska öllum gleðilegs nýs árs og þakka fyrir þau gömlu.

Sigurbjörg Ottesen oddviti Eyja- og Miklaholtshrepps:

Þrátt fyrir afleitt heyskaparsumar var árið gott

Fyrst og fremst ber að nefna hvað ég er óendanlega þakklát fyrir að fá að fylgjast með börnunum mínum vaxa úr grasi, takast á við sínar lífsins brekkur og fagna sínum sigrum og áföngum. Þakklát fyrir að fá að leiðbeina þeim, hvetja áfram og styðja og grípa, sé hrasað. Það er eitthvað sem að er ekki sjálfsagt og ber ávallt að þakka.

Fréttaveita Vesturlands

Horft yfir farinn veg og litið til nýja ársins