Vesturlandsmótið í sveitakeppni í bridds var spilað í sal FEBAN á Dalbraut 4 á Akranesi í gær. Mótið var jafnframt silfurstigamót og útskýrir það góða þátttöku spilara sem flestir komu af höfuðborgarsvæðinu. 20 sveitir tóku þátt en spilaðar voru sex tíu spila umferðir. Mótsstjórn var í höndum Þórðar Ingólfssonar, sem reyndar spilaði mestallt mótið í forföllum eins spilarans. Sveitin SLAM varð í efsta sæti og vann þar með silfurstigamótið, en nafn sveitarinnar er myndað af upphafsstöfum spilara sem voru þau Svala Kristín Pálsdóttir, Ljósbrá Baldursdóttir, Aðalsteinn Jörgensen og Matthías Gísli Þorvaldsson.