Í birtingu í morgun mátti sjá fjölda glitskýja á himni yfir vestanverðu landinu. Glitský myndast þegar óvenjukalt er í heiðhvolfinu, gjarnan þegar hitastig er undir -70 til -90 °C, og eru þau úr ískristöllum, eða úr samböndum ískristalla og saltpétursýru-hýdrötum. Glitský eru ákaflega fögur ský sem myndast í heiðhvolfinu, gjarnan í um 15 - 30 km hæð. Þau sjást helst um miðjan vetur, um sólarlag eða við sólaruppkomu. Litadýrð þeirra er mjög greinileg því þau eru böðuð sólskini, þótt rökkvað sé eða jafnvel aldimmt við jörðu.