Spjallað við Hauk Erlingsson formann Liverpool klúbbsins í Borgarnesi

Haukur Erlingsson segist hafa byrjað ungur að fylgjast með gengi Liverpool liðsins á Englandi. „Ég var um ellefu ára gamall en það var vinahópurinn sem kveikti áhuga minn á Liverpool. Þetta var gullaldarliðið sem vann allt á þessum tíma og var Ian Rush í miklu uppáhaldi hjá mér í þá daga,“ nefnir Haukur og heldur áfram. „Ég hóf söfnum mjög snemma á Liverpool dóti og í dag á ég mjög stórt safn og hef eiginlega ekki töluna á hversu marga Liverpool muni ég á. Hann segist vera með ákveðinn hlut í safninu sem er honum afar kær. „Ég hef alltaf haldið mikið upp á Liverpool hálsmen sem var með þeim fyrstu Liverpool hlutum sem duttu í safnið,“ segir Haukur.

*Steve McManaman ánægður með að hitta á Hauk og áritaði treyju hans.*

Liverpool klúbburinn í Borgarnesi

Haukur spennist allur við þegar hann rifjar upp upphaf klúbbsins. „Þetta ævintýri hófst heima hjá mér árið 2022 en þá bauð ég fólki heim til mín að horfa á nokkra leiki og var það mjög gaman. Það var svo ógleymanlegt kvöld það sama ár, 28. maí, en þá sýndum við úrslitaleik Liverpool og Real Madrid í meistaradeildarinnar í Grímshúsi úti í Brákarey. Þar komu rúmlega 150 manns saman og horfðu. Eftir þetta kvöld var komin mikil stemning fyrir að horfa saman á leiki en núna er Grillhúsið í Borgarnesi okkar heimavöllur en þar mæta allt frá 15 og upp í 60 manns á leiki,“ segir Haukur.

*Yfirfullt herbergi í húsi Hauks, af Liverpool munum.*

Mætir klukkutíma fyrir leik

Haukur mætir á Grillhúsið klukkutíma fyrir leik, skreytir staðinn með sínum munum áður en gestir mæta fyrir leik. „Við vorum með Fánadag hér í nóvember en Liverpool klúbbur Íslands kom þá og var með ýmsa leiki. Þau mættu hér vel fyrir leik Liverpool á móti Southampton en þá komu þau með ýmislegt skraut fyrir staðinn. Ég reyndar var búinn að koma með allt mitt dót að heiman og komu þau því ekki að tómum kofanum á Grillhúsinu,“ segir Haukur og hlær.

*Nóg er að treflum, fánum, húfum og fleiru merktu Liverpool.*

Anfield er eftirminnilegur

Haukur og eiginkona hans, Katla Gunnarsdóttir, fóru á heimavöll Liverpool árið 2016. „Þetta var 40 ára afmælisferð sem kona mín bauð mér í og við vorum í Liverpool í heila viku. Liverpool var þá að spila bikarleik gegn Tottenham og stemningin í Anfield var rosaleg. Við unnum leikinn 2-1 og var þessi ferð mjög eftirminnileg,“ segir Haukur og heldur áfram. „Ég er mikill Fernando Torres aðdáandi en hann spilaði fyrir Liverpool frá 2007 til 2011. Þvílík marka maskína sem sá maður var. En í dag held ég mikið upp á Darwin Nunez þó að hann sé ekki allra, þá vona ég að hann sé að koma til og hef ég mikla trú á honum,“ nefnir Haukur en bætir við að lokum: „Við bjóðum alla þá sem vilja koma og horfa á leiki Liverpool á Grillhúsinu velkomna, hvort sem það eru stuðningsmenn Liverpool eða ekki. Hægt er að fá sér að borða eða drekka með leiknum, nú eða bara spjalla um fótbolta,“ segir Haukur að lokum.

*Rúmlega 150 manns mættu að horfa á leik Liverpool gegn Real Madrid árið 2022.*

Harðasti Liverpool stuðningsmaður á Vesturlandi

Spjallað við Hauk Erlingsson formann Liverpool klúbbsins í Borgarnesi

Spjallað við Hauk Erlingsson formann Liverpool klúbbsins í Borgarnesi